![Астанада робот техникасы бойынша байқау жеңімпаздары анықталды](/article_photo/1529639072_article_b.jpeg)
Меморандумға Біріккен Ұлттар Ұйымы Балалар қорының (ЮНИСЕФ) Қазақстандағы өкілі Юрий Оксамитный және Тұңғыш Президент − Елбасы Қорының атқарушы директорының орынбасары Сұлтан Айтжанов қол қойды. Меморандумға сәйкес екі тарап та еліміздегі балалардың құқықтарын қорғау мақсатында қоғам ішінде қажет ақпарат беру саласында тығыз жұмыс істемек.
Юрий Оксамитный атап өткендей, балалық шақ – адамның дамуындағы ең маңызды кезең. Саламатты, табысты және бақытты өмірдің іргетасы қаланатын кезеңде жас жеткіншектердің жалындаған отты идеяларын ел игілігіне жарата білуіміз қажет. «Біздің қор Қазақстандағы әр баланың денсаулығына, тамақтануына, қорғанысына және білім алуына құқықтарын жүзеге асыру үшін қызмет атқарады. Тұңғыш Президент – Елбасы қорымен тығыз қарым-қатынасымыздың арқасында балаларды кішкентай кезінен дамыту, үлгілі ата-ана болу, жастар тәрбиесі, инклюзивті білім беру мәселелеріне қоғамның назарын аудара аламыз деген сенімдемін», дейді Ю.Оксамитный.
Ал Сұлтан Айтжановтың айтуынша қор балалар мен жасөспірімдердің интеллектуалды және шығармашылық әлеуетін ашуға көмектесетін әртүрлі жобаларды жүзеге асырып келеді. Жас дарындарды қолдау – жалпыұлттық маңызы бар іс-шара. Әлеуметтік жобалар, соның ішінде балалар үйлері мен интернаттармен жыл сайын белсенді жұмыс атқарылып келеді. Сонымен қатар инклюзивті білім беру саласында жұмыс істеуде. Республикалық балалар паралимпиадалық старттары, «Мейірім» инклюзивті балалар шығармашылығы байқауы, «Аман келешек» фестивалі ерекше қажеттіліктері бар балаларды қоғамда әлеуметтік бейімдеуге бағытталған.
«Бұдан бұрын Тұңғыш Президент қоры ЮНИСЕФ және басқа да ұйымдармен бірлесіп, балалар күніне арналған әлеуметтік бейнеролик жариялаған болатын. Болашақта ЮНИСЕФ-пен бірлескен жобаларды шығармақ және әлеуметтік науқандарды қолдауды жоспарлы түрде жүзеге асырып отырады», дейді С.Айтжанов.
Меморандумға қол қойылғаннан кейін «KazRoboProject-2018» 10-21 жас аралығындағы балалар мен жастар арасында білім беру робот техникасы бойынша республикалық ғылыми-зерттеу және шығармашылық жобалар байқауы ашылды.
Байқау Қазақстанда балалар мен жасөспірімдер арасында білім беру мен спортты, робот техникасын дамытуды көздейді. Іс-шараның ұйымдастырушылары алға қойған міндеттерге сәйкес, өңірлердегі үздік жобаларды анықтау және республикалық конкурсқа қатысу үшін үздік командаларды қалыптастыру, сондай-ақ дарынды мектеп оқушыларына профильдік университеттер мен компаниялардың назарын аудару – басты бағдар.
29 мамыр – 9 маусым аралығында еліміздің 16 аймағында байқаудың іріктеу кезеңдері өтіп, оған 200-ге жуық жоба ұсынылған. Байқау екі жас категориясы бойынша, яғни бірінші топта 10-15 жасар балалар, екінші топта 16-21 жас арасындағы жеткіншектер өзара бақ сынасқан. Еркін тақырыптағы жобаға қатысушыларға қойылған басты шарт – жоба қоғам үшін пайдалы болуы тиіс.
Айта кетейік, байқауды қазақстандық білім беру және спорттық робот техникасы «Казроботикс» федерациясы ұйымдастырды. Іс-шараның бас серіктесі – ҚР Тұңғыш Президенті – Елбасының қоры, сондай-ақ байқаудың шешуші кезеңінің ресми серіктесі «Инфокоммуникациялық технологияларды дамыту қоры» екенін айта кеткен жөн.
Жалпы өңірлер бойынша іріктеу кезеңдері барысында «Нұр Отан» партиясының «Жас Отан» жастар қанаты, «Қазпошта» АҚ, «Зерде» ұлттық инфокоммуникация холдингі» АҚ, ««Астана EXPO-2017» ұлттық компаниясы» АҚ қолдау көрсетті.
Мирас АСАН,
«Егемен Қазақстан»