Жиынға қатысқан бірінші вице-министр Арман Евниев Қазақстанның қол жеткізген бәсекеге қабілеттілік деңгейін қолдау және оның одан әрі кеңеюі үшін агроөнеркәсіптік кешенді мемлекеттік реттеудің тәсілдері қайта қаралып, ішкі нарықтың қорғалуына, сыртқы сауда нарығын кеңейтуге, сауда-логистикалық инфрақұрылымды дамыту мен агроөнеркәсіптік кешен субъектілерін қаржыландырудың қолжетімділігін арттыруға баса назар аударылғанын атап өтті.
«Шығарылған жалпы ауыл шаруашылығы өнімдері 3,9 пайызға, өндірілген тамақ өнімдері 6,3 пайызға артты. Ауыл шаруашылығы өнімдерінің экспорты 3 айда 47 пайызға, оның ішінде өңделген өнімдер экспорты 26 пайызға ұлғайды. Ауыл шаруашылығына салынған инвестициялар көлемі 1,4 пайызға өсіп, 88 млрд теңгені құрады. 2018 жылы егістік жерлер көлемін 50,2 пайызға (11,4 млн га) қысқарту жоспарланып отыр. Қазіргі уақытта азық-түліктің негізгі 30 түрінің 25-і бойынша қамтамасыз етілуі 80 пайыз, ал кейбір түрлері бойынша 100 пайызды құрайды. Ішкі нарық осы өнім түрлерімен қамтамасыз етілуде. Импортқа тәуелді құс еті, алма, ірімшік және сүзбе, шұжық, қант, балық бұл тізімге кірмейді. Елбасы халыққа Жолдауында агроөнеркәсіптік кешен алдында еңбек өнімділігін түбегейлі ұлғайту және қайта өңделген ауыл шаруашылығы өнімі экспортының өсімін 5 жыл ішінде кемінде 2,5 есеге арттыру міндетін қойды. Бұл міндетті шешу саланы дамытуда мүлде жаңа көзқарасты талап етеді», деді ол.
Жиын барысында ол жоғарыда аталған міндеттерді ескере отырып, Ауыл шаруашылығы министрлігі агробизнес және үкіметтік емес ұйымдардың өкілдерін тарта отырып, 2017-2021 жылдарға арналған Қазақстан Республикасы агроөнеркәсіптік кешенін дамытудың мемлекеттік бағдарламасына түзетулер енгізу бойынша жұмыс жүргізіп жатқанын жеткізді.
Рауан ҚАЙДАР,
«Егемен Қазақстан»
