…қайдан – қайдан қайдан ғана біліппін! Сенің… бұ жалған да опасыз дүниеден мен пақыр тіптен де ойламағандай, ешбір күтпегендей де жағдаятта өтіп кете барарыңды. Осы ғұмырымда, сені әйтеуір бір көреріме, көкейімдегі сол бір түйткілді-түйінді ағымнан жарыла ақтарарыма өзімді әбден сендіріп алғандығымның, сол берік сенімімнің, адами пендешілігімнің күндердің күнінде осылайша оп-оңай ақ күйреп шығарын, мен бейбақ біліп жатыппын ба.
Сен екеуміз хат арқылы танысқан едік-қой. «Қызыл советтің» қызып тұрған кезі еді-ау. Институттан кейін, «кіндік-оңтүстігімнің қырмызы қызғылықтарына» әбден тойған басым, «сормаңдай-солтүстіктің де қып-қызыл шыжғылықтарын» байқап көрмекке Теміртауға жолдамамен сұранып келіп, үш айдан соң бір жылдық «қызыл сәбеттік әскери міндеттің хикаяттарына» тағы да өзім тіленіп кетіп, сол жақта сарылып сарсылып жүргенімде – менімен әскери қызметтес болған, сенімен көршілес тұратын балаң – жігіттен адресіңді өтіне қалап сұрап алдым. Жекеулік әңгіме үстінде сыр – суыртпақтата отырып, өзің жайлы біршама мазмұнды мағлұматтарға құныға қанығып та алған едім.
Екеуміз бүтін жыл бойы үзбестен хат жазысып, – сен орысша, мен қазақша, – бірте-бірте сырласып-мұңдасып, жүз көріспегендік демесе – бұрын-бұрындардан таныс-білістердей боп кеткен едік. Замандарынан – замандастарынан алабөтен, жандары жұмбақ-ты жаратылған дүниеәуи шайырлардың «мәңгілік сезім» жайындағы жалынды да жасын жырларынан әрдайым пікір алмасып, бір-бірлерімізді қуаттап-қолдап, қанаттандырып тұратынбыз. (Сол хаттардың бір де біреуінің бүгіндері сақталмағанына қайранмын!?. – өзіме-өзім қапалыдаймын). Біздердің достығымыз – сырттайлық десе де – достық сыйластықтан тіптен де өзгеше өрбіп, түсінікті де түсініксіздеу, тылсымды сезімдер әлеміне қарай ұласып кете барған-ды. Асау сезімдердің, іңкәр жүректердің табысуы – жүзбе жүз көрісуі – һақиқи жарасуы ғана қалып тұрғандай-ды...
* * *
1976. Қаңтар. Целиноград. Вокзал. Әппақ, ару әлем. Көгілдір көгершін аспан. Жүзіңді өпкен шыңылтыр, кәусар аяз. Бір жылдық әскери қу міндетімді әзер дегенде тәмамдап, аз ғана елде аялдап, Теміртаудағы «бөлмелес» болған – «Құдай жан-дүниелерімізді үйлестірген» – қимас дос-ағам Серігімді серік етіп саған келдім.
Пойыз тоқтар-тоқтамас, тамбурда тықыршып тұрған біздер, ашық есіктен – перрондағы сабылысқандардың ара арасынан – қасиетті де киелі Сарыарқаның арқыраған қысқы шілдесінде талшыбықша майыса қолтықтасып, тағатсыздана көз талдырған сендерді – дос-құрбың екеуіңді жазбай таныдық…
Сол бір уақыттардағы үздіге де үзіле дабыл қаққан жан-бейбағыңның іштей шарбысуы, атқақтай аптыққан жүрек байғұсыңның жәйімен отыға бастауы… кейін-кейіндері ойлап-тексеріп бақсам – бүгіндері де: өкінішің мен қуанышың қырық қырқысқан бұ ғұмырыңдағы ешнәрсеге айырбастамастай ең бір жаныңа жақын дүниелерің – қимас асылдарың, «мән-мағыналарың мен бар болмысың» да екен ғой.
Гастрольде жүрген «Челябинск эстрада ансамбліне» билет алып қойыпсыңдар. Біздер – Серік екеуіміз екі билетті еншілеп, кешкі жолығысарымызды егжейлеп, оның туыстарының үйінің тұсынан троллейбустан түсіп қалдық; сендер, ары – сол жағалаудағы оқуларыңа жүріп кеттіңдер.
Серіктің туыстары ақжарқын, кеңпейіл кісілер екен. Асты-үстімізге түсіп бақты. Мол етке, үлкен ағаш тегене толы сарымейіз құрт езілген сорпаға бөгіп, кешқұрым буымыз бұрқырап, «Целинник» сарайына бет алдық...
* * *
…Көрісуіміздің бір күні өтті. Таңертесімен, жұмысына жетуге тиіс Серігімді автовокзалдан Теміртауға аттандырып салдым. Айналып кетейін, «құлың боп кетейін» Серігім! – тәптіштеп түсіндіріп, жақсылап тұрып, мені екі інісіне «аманаттап» кетті ғой. (Сөйткендегі... менікі?..)
Троллейбуспен «ЦУМ»ға дейін жетіп, автобусқа ауысып отырып, сол жағалаудағы – сол кездергі жалғыз-жарым жаңа құрылыс – сендердің институттарыңа келдім. Сылаңдаған оқу орынының дәліздерінің геометриялық әрқалай бұрыштармен айқыш-ұйқыш өрнектелген төбелері есімде қалыпты… Екінші қабатта, улыған-шулыған дәлізде, шай қайнатымдай ғана уақыт бір-бірлеріміздің жүздерімізді аялай бағысып тұрдық та – кешке «Целинниктің» алдында сұғанақ көздерден аулақ-аулақ жолығысарға сөз байластық.
…Шыдамымды шырқырата шідерлеп, елең-алаң, ұшарға әзер тұрғанымда – қазақы қоңырқай қыз маған қарай жымия жақындай берді. Сен жіберіпсің, – аз-з-з-дап қана кешеуілдеріңді сұрана ескертіпсің.
Целиноградтың со күнгі тымықты, тылсымды кеші – «Победа» даңғылындағы, универмагтың арқасындағы «Родина» кинотеатрына бардық. Бірінші дүниежүзілік соғыс жайындағы кино екен – біздерді онша еліттіре қоймады-ау…
Түнгі Целиноград. Күні бойғы ақкөз аяз – біршама демін қайырып алған соң – кештете көккөзденіп-көкбеттеніп, сақұр-сұқыр қайнай бастаған. Құдайға шүкір, Арқаның кеші әдеттегі айқай-бұрқасынына баса қоймады. Сонадайдан табалағандай боп көрініп тұрған «Есіл» қонақ үйіне ішім қыжылдай қайта-қайта қарайлай бердім. Ресторанына кіріп, дем басып, бой да ой жылытарға қу қалта жұқанақ. Орталық алаңда арлы-берлі қыдырыстағансып, аяз қысып, сендер тұратын қазақы шағын ауданға қатынайтын автобусқа отырдық. Аялдамадан түсіп, көшелеріңе бұрылар бұрышта, қалқиған электр бағанының қалқасында кідірістеп қалдық… Құрқылтайдың ұя-қалтасындай – мап-мамық, оймақтай биялай киген аялы алақандарыңды ебедейсіз қолдарыммен күрей алып, қалтырай-дірілдей құшағыма құшырлана тарта бердім… Қол ұстасып, көшелеріңе түсіп, жүз-жарты қадамдай жүргенімізде – сен қос алақаныңды кеудеме қойып, үстінен алаулай бөрткен үлпі бетіңді басып, қоянның көжегінше үркектей де тұрып: «Енді қашан келесің?.. Енді қашан көрісеміз?!» дедің, менің ертең-бүрсүгіні қайтарыма байланысты. Мен: «Күнде-күнде келемін! Күніге көрісеміз!» дедім… Сен: «Үйге жақындап қалдық, жеңгем шығып қалады» дедің үздіккендей, жарықшақ та жалтақ үнмен. Мен: «Кім шықса да жібермеймін!» дедім... Пенденің амалы қайсы, қимастық ыстық лебіңді бұрқ шығарып, құшағымнан тыпырлай босанып, аяқтарыңның ұшынан тездете қалқи басқан күйі, «аққу-әлем – аққу-құс – аққу-арман» – түн түндігін түре де төңкере, мені есімнен тандыра, қол бұлғай ұзай бердің.
Мен шегіншектей жылжысам да, патша көңілденіп, автобустың аялдамасына келіп, есі-басымды түгелдегенсіп біршама тұрдым ау. Сосын, автобус күткенді өзіме ерсі санадым да, еліре бастаған Арқаның ақ түтегін қақ жара, Серіктің кіші інісі тұратын жатақханаға қарай қыран құсша самғадым!
Келесі күні, кешкілік – сен, дос-құрбың, мен – үшеуіміз – Серіктің мединститутта оқитын екінші інісінің келіншегінің туған күніне бардық. Орыс қожайынның жартылай жертөлесінде пәтер жалдап тұрады екен. Оншақты ғана жастар болдық. Ойнап-күліп, шерлерімізді тарқатысып, көңілді өткіздік. Түн жарымында шуылдасып-дуылдасып тарқастық. Сен, дос-құрбың, мен, Серіктің кіші інісі – төртеуіміз «Целинсельмаштың» Құдай бұйыртқан жатақханасы қайдасың!» деп тартып кеп бердік. Өйткеніміз, ертесіне ертелеп, менің – Теміртауға, одан әрі елге оралуым керек-тін. Серіктің інісінің «служебныйымен» үшеулеп – «эскорттап!» тұрып шығарып салатын болдыңдар.
Төтелеп жүргендіктен, түтей бастаған ойсан омбы қарды күрпілдете кештік. Серіктің інісі алда, қолтықтасып алған бақытты үшеу (анығында... «екеу» шығар) арқасында, оқтын-оқтын бұрқасын беттен қарпып, – тылсымдана жарқыраған «Ғылмани» мешітіне жалтақ-жалтақ көз тастай, Аллаға іштей құлшылығымызды айтып, – аршындай басып жүрдік…
Төрт адамдық, тап-тұйнақтай – жұмыртқа-бөлме. Біз үшін босатылып, жинастырылып қойған екен ғой. Серіктің інісі жоғарғы өз жайына жайғасты. Сенің дос-құрбың төменгі – екеумізге қарсы жайға орналасты… Жыр-сырымызды түн баласынан қызғана да қорына сыбдырласқан біздер таң сыз бере айқаса жантайыстық…
Сол бір кезінде, сенің «соншалықты намысқой!» екендігіңді де қайдан біліп түсініппін. Сен… ызаланып, қапаланып, бірақ та оныңды «екеуге» білдірместен, «тарс!» жабылып қалдың.
Таң да атып, ендігі «эскортталынып-әспеттелініп» жатпасақ та, уағдаласқан «служебныйымызбен» автовокзалға жеттік. Серіктің інісі екеуміз үрпиіскен сендерді (турасында... сені болар) өздіктеріңе бес он минутке қалдыра тұрып, сонадайдағы қалқиған қарауыл киосканың арқасына барып, – «жолашарға» деген сылтау-салдармен, – бір «орысбайдың» аруағын разы етіп, қылғытып салдық. Әлем-тапырық ішкі дүниеме ол жарықтықтың шипасы қаншалықты тиіп-тимегенін білмедім-ау... «Арқаның кең құшақ ауасының да шалабұлттана тарылып, кілегей шұнақтың қылқындыра шаққылап-сорғылап тұрғанын тағы да қайтерсің!?.»
Мен, қоштасып тұрып, дос-құрбың екеуіңе мыстан жасалынған жүрекше цепочка-сувенирлер ұсындым. Сен, маған, сол жабылған қалпыңда қалсаң да – жаралы күйіңді екі досымызға білдірмеуге барынша тырысып бақтың. «Тектілігіңді байқаттың…» Әрине, сен: «Енді қашан келесің, қашан көрісеміз» деген жоқсың бұл жолы...
* * *
…Ананың өтініші, әсіресе тіленгендей болғаны – «орыс боп кетесің, құрып та кетермісің, елге кел» деген – үкім!.. Теміртауға жете салысымен медучилище директоры Дзюба деген аюдай ақырған мырзаға кіріп, бәрі-бәрін езбелеп түсіндіргенсіп, «қымбаттым-ау... баспанаң бүгін-ертең дайын еді ғой!?» деген аса зор қамқорлық ниетіне қайрылмастан (бәрі-бәріне ішім күйіп-жанып тұрса да), «жолдамамды» бұздырып, құжаттарымды түгел жиыстырып қолыма алдым. Үш ай жолдастығы – үш жүз жылдық достықтай болған, адамилығы – асқақ, ниет-көңілі – дархан, алақаны – ашық, жүзі – жарқын Серік дос-ағам мені көздеріне жас алып тұрып аэропорттан шығарып салды. (Сондай жанды да жадымнан жырақ қалдырдым-ау ә...)
Езбесін езгілеген туған елімнің ортасына қайта оралған күннен бастап, бір де біреуіне соқыр тиын жауап болмаса да, саған – ұзақты жыл бойына қандары сорғалаған ақталу жеделхаттарымды жолдап жаттым. (Сол... тағдыры тәлкекті ойланбастық тірлігімнің астарында титімдейін де жаманшылық ой-пиғылдың болмағандығын дәлелдеп баққан бейкүнә хаттарымды).
Өзіңе қайтара барып, түбірінен түсінісіп жатарға... шешіле алмадым. Оның үстіне, бұ жалғандағы маңдайыма жазылған «мәңгілік цейтнот» та болар – «жігіттің жолын жоқшылық байлар» – қол-аяғымды құрсаулады да тұрды емес пе (Бұл, әрине, «ұлы мәртебелі сылтау-салдар» да ғана болар бәлкім).
Саған шер-шеменді бейкүнә хаттарымды жолдаған сайын, дос-құрбыңа да жарыстыра үшбу-хаттар жөнелтіп отырдым. Шетін жағдайдың шет-жағасын білдіріп, ара-орта – араша түсуін өтіндім де. Ол бейбаққа рахым-рахмет бір Алладан әрине, қолынан келгенін жасап бақты...
Ендігі, айтқан-айтпағаныңда не: түптің-түбінде, барлық тірі әрекеттер бекершілікке айналып, тәлейлі тағдыр шырмауындағы асыл сезімдеріңнің тағы-тағы... арыны басылып, бірте-бірте сөнген әулие-шоқтай боп шықты.
Имандай шындығым сол – сені... бір сені ешуақытта да көңіл-қуысымның төрінен шығармадым. Әрдайым... бәрі-бәрін көз алдымнан жіпке тізбелегендей елестете қайырып отырдым. Бірақ бірақта... бір нәрсені – менің: «әйтеуір бір жолығысармын, түсінісерміз» дегенімді тоспастан бұ жалған да опасыз дүниеден өтіп кете барарыңды еш білмеппін, мүлдем де ойламаппын.
«Отыз бір жыл, алты ай!!!» Міне, менің, «бұ дүние-жалғанмен өздігімше алысып-араздасқанымдағы» – көп-көп пендешіліктерімнің бірінің ғана құн-салмағы.
...Иә, менің, сені – «әйтеуір бір іздермін» деген арман-тілегім орындалған-ақ еді. Бірақ есесіне – тағдыр тәлейінің менен кезекті рет ақылдырақ та зорырақ шыққаны шығар – 2004 жылы, жазғы шілденің шіліңгірінде есігіңнің алдына барып тұрып қайтыппын! «Қызыл сәбеттегі» Целиноград, одан, бүгіндері Астанаға айналып шыға келген ежелгі Қараөткел – Ақмолаға Құдай берген шығармашылығымның арқасында жолым түсіп, «Анықтама бөліміне» соғып, сенің адресіңді алуындай-ақ алған едім. Әлде... асып-сасқан мен бейбақ мән-жайды ретімен жеткізе алмадым немесе құрғыр темір есіктің арғы жағындағы жатырқағандар жөнін түсінбеді – жабырқай жыламсыраған балауса дауыстың: «не ищите ее здесь больше!» дегеніне бола қайырылып кете барыппын (Кейіннен, кеш білдім емес пе – әлгі сөздің астар-мәнісін өзімнің түсінбегендігімді де білмегендігімді).
...«Анықтама бөліміне» қайтара бара беріппін. Одан да, «сол... есікке қайта-қайта бара берсемші, бағып жатсамшы!?» (Сол бір кез, сенің... төсек тартып жатқан кезің де екен ғой). Кейіннен есітіп-біліп, бәрінің де аян болғанындай, екі айдан соң, – Жаратқанның әмірі-дә, – сен дүниеден озып кете барыпсың. «Бұ дүниенің таусылмас қазына-қызғылықтарын біздерге – жадсыздарға – бүтінінен, бейпілінен бұйыртып».
Көп-көп ғұмырым өкініш өксікпен өтпеді ме; қай уақытта, қалай, қайтіп берем десе де Бір Жаратқанның ырқы ғой: қырықтың жетеуінде, – 1999 жылы, – төрт-бес жылдай деліқұлданып ауырып, есеңгіреп, жазған басымды енді-енді көтергендей болып жүргенімде, о бастағы бойыма дарытқан «сыйын» Өзі қолыма қайыра ұстатты...
2007. 19 наурыз. Астанаға келіп, шығармашылық-шаруаларымның арасында «Анықтама бөліміне» кезекті мәрте соқтым. Бұл жолы, ондағылар, сенің бұрынғы – қыз күніңдегі – «Аршалинская» көшесіндегі үйлеріңнің адресін берді.
«Сайтан айналдырса – төзімсіздік танытсаң – қиын!». Әрі кезгілеп, бері кезгілеп, жүйкелеп, бұрынғы үйлеріңді таппадым («Өзіңе» деген... дәтсіздік те сезіктендіріп, үркітіп, тайсақтатты да тұрды емес пе, бір жағынан).
...2007. 29 маусым. Баспадағы кітабымның шаруасымен кезекті рет Астанаға келіп, қайтарда, – «үмітсіз сайтан», – Сенің «Аршалинская» көшесіндегі үйлеріңді қайтара іздедім. Бұл жолы – қайтпасқа бекіндім!
Ақ жауын себелеп тұрған-ды. Әрине, жақсы ырымға – оң нышанға баладым (Ішің уілдеп, жан-дүниең үдере үрпиіп тұрса да). «Аршалинскаяның» тұтам-қарыс пұшпағын ескі мешіттің жанынан құйрығынан қатып ұстап, жалғасын – бұзылып жатқан бәз-бұрынғы базардың күншығысындағы алапат жаңа құрылыстың арқасынан таптым. «Жарықтық Қараөткелдің жері-ай!..» Иқы-жиқы, ылжыраған көшелерге түстім. Осының алдында, наурызда келгенімде бейуақи суыққа ұрынған екенмін, соным – «бронхитым» беймезгіл қайта қозып, мазасызданғаныма қарамастан, көрінген қарайғаннан «78а» үйді сұрастырып жүре бердім, жүре бердім...
«Аршалинская» дейтініңнің өзі бірнеше көше көрінер екен, – «1», «2», «3» дегендей. «78а» әрқайсысында да бар сияқты. Менің – «қара басып», алжасып жүруім де содан келсе керек-ті.
Қаншама «жолым ауыр» дегеніммен де, – қаншалықты тыпырлай титықтамасам да, – Құдайдың бейпілінен берер кездері баршылық, шүкір. Бұл жолы да, Жаратқанның өзі жарылқап, мені – ақ жауынның астында үйінің шатырын реттестіріп жүрген қара қазаққа кезіктірсін. Оң тұсынан жақындап келіп, аман-саулықтасып, жағдайымды жөпелдете жеткіздім. Ол да Құдіреті күшті сыйлаған жан екен. Төбеңнен тесіп тұрып түсіндіріп, қолмен қойғандай ғып көрсетіп, анығынан ұғындырды: «мына ауладан төтелеп кесіп өтіңіз, одан олай, содан былай бұрылып, ақ кірпішті үйге барыңыз» деді.
Ішім... сезді – тапқанымды. Көңілім толайып, шатырдағы жақсы қазақпен ілкім әңгімелескім кеп кетті.
– Ау, ағайын, айыпқа бұйырма, «бұл үйлерді бұзылады» деп жатпады ма? Ал сендердікі не жөн?..
– Е-е... 1-тамызда «президенттің легализациясы» бітеді. Соған дейін шама-шарқымызша қоқырайтып алғандарымыз жөн, «жарымды компенсациясына» ілігуіміз үшін. Бұрынғы үйлеріміз белуардан батпаққа батып кетпеді ме – құны көк тиын болады емес пе. Мына үйді үш-төрт жылдың қарасы – ұрынып шабынып, тұрғызып бағудамыз. Аса әспеттеп әуреленбедік. Себебі... түсінесіз ғой енді?..
Еппен басып, құрылысы толық біте қоймаған, айрап-жайраған аулаға ендім. Әрі-сәрі байқастап едім – ит байлаулы екен. Ақ кірпіштен жап-жақсы өрілген еңселі жап-жаңа үй айналасымен үйлеспей-ақ тұр. Өйткені қайта әрленіп жатқан үйлер шамалы-ақ. Көп қазақтардың үйлері бәз-баяғы – батпаққа батқан қалпы. Ойы-бойымды жинақтап, есікті тықылдаттым. Көзіңді оқыс қарырдай, әппақ сазандай, қырмызы қырықты енді-енді еңсергендей келіншек сылаңдай шықты. «Баяғыдағы, жастық шақтарғы, студенттік достар бір-бірлерімізді сағыныса іздестіріп жүр едік» деп жүздірте, қосып-шатып (өтірік айтып), сені сұрадым. Ішкі аласапыранымды сездіртіп те алған шығармын-ау.
– Ол-л-л... қайтыс боп кеткен. Білмеген екенсіздер ғой?..
Тартымды да тұщымды жанарлары сол сәтінде-ақ солып сала берген әп-әдемі келіншек маған таңданысты кейіппен – аңырая қарап та қалған.
– Қа-а-а-шан?!.
– 2004 жылы... қыркүйекте.
– Не-е-е-ден?..
– Науқастанып... Дұрысы... қаласаңыз, мен сізге жолдасымды – інісін шақырайын?
«Аһ-һ-һ... өртенгір де өтеусіз жалған дүние-ай!?»
Сенің ініңе туып-өскен отаныңның табалдырығында тұрып көңіл айттым. Айналып кетейін інің: «ішке кіріңіз, ішке кіріңіз» деуде ғой. Бірақ-та, бір Құдайдың өзі кешірсін, «ішке кірерге, дұға қыларға... басқалайға да» мен пақырда дәл сол мезетінде дәрмен де хал-ахуал да жоқ-тын. Анығында... «бетім – дәтім» жоқ-тын. Бейқамдығым – алаңсыздық жадсыздығым адами сиықтан мүлдем шығарып тастағандай да еді.
«Тіріге не дауа!» Сондайлық мүшкіл халімнің өзінде... «екі ер бала, бір қыз-қызғалдағыңның бар екендігін, ер балаларыңның – сен бұ дүниеден озып кете барғаныңда – бүгіндері шаңырақ иелері екендігін, жолдасыңның... ендігі үйленіп кеткендігін, тағы-тағысын бірдеңелерді де» сұрастырып-білістіріп үлгірдім.
Сенің ініңнен – сол-л-л ма... сол емес пе – дос-құрбыңның телефонын сұрап алудан да тартынбадым. Мен білетін дос-құрбыңнан басқа, онымен аттас, тағы екі дос-құрбың болыпты. «Үш бірдей аттас... қайсысы?..»
Мен, желкеммен жылжығандай боп, сен бұ дүниеге келген, аялы да алтын, ұяңның ауласынан ақырын-ақырын ғана жылыстадым...
Астанаға келгеніме қаншасыншы тәулік десеңші!.. Құдайдың жазғы шілдесінде де жарым-жарты күн тыным болмады: күннің шыққанынан – шықпағаны; аспан – ауын жиып болмастан – себелейді де тұрады...
Маған... бәрібір – аспан аударылып түссе де! Ілбіп келемін. Миы шыққан қара жерде тайғанақтап та келемін. Жоқ... турасында – сүйретіліп, салақтап, сылпылдап. Ішіндегі бары ақтарылып, қаңғырлап қалған бөшкедеймін де-ау. «Бар-жоғым – болған-болмағандығым – бәрі-бәрі бекершіліктей де ме?..»
* * *
...Құдай – кең! Оған сенің ниет-пиғылдарыңның ақ-қарасы, басқасы – бәрі-бәрі белгілі. Бірақ... сенің – науқастанып, қиналып жатқаныңда: «мені де ойыңа алып... шыбын жаның онан сайын шырқырамағандығына» кім кепіл?! Оны қайда қоямыз?..
И-и-иә... бәрін де білгенімше білерме-ақ едім, егер де, сол... «өзімбілем өктемдіктерім» болмағанда, – сол... Жаратқан Жалғыз Иемізге жақынырақ бола білгенімде. Иә-иә?..
«Отыз бір жыл, алты ай!» Жалған дүниедегі бұрынды-соңғы пендешіліктерімнің бір парасы ғана.
Алдарымызда төрткөзденіп, тікқұлақтанып, қапысыз күтіп тұрған қанша-қаншама «өзімбілемдіктеріміз – өктемдіктеріміз – жадсыздықтарымыз» бар екен-ә? Тағы-тағы, басқа-басқа, нелеріміз де қалды екен-ә, а?..
Жалғанға жаның жағынып келіп... түстен кейін тұлыпқа қарап ұлығанда-ұлымағанда не? Деген де, не күтіп тұрғанында да, қайткенде де, – әуелі бір Алла, – былайғы бұйырар итшілік ғұмыр: «болмасқа бола шаптықпадым», – «қылышымды тасқа шаппадым», – «түбінде тыныш жүргенді теріс көрмедім». Тек қана, мына жалғанда түсінісерге жан таппай жалғызсырап қалғанымда, сол... өзіңді бір көре алмай қалған өзегімді өртеген өкінішім – өзіммен мәңгілікке бірге қалар, бірге жасар. Бәлкім... осы аян етілген имани сөздерімізді һақиқи қабыл көріп, көкірек төрлеріне тоқыр Алланың барша сүйген құлдарының да.
Игілік ӘЙМЕН
Астана