Жақында сол кезеңде оқу бітіргендеріне 40 жыл болған журналистика факультетінің студенттері кездесті. Бұл кездесуге шақырылған әріптесіміз, тараздық ақын Байтанғали Төлентаев жастық шағын еске алып, былай дейді: «Менің есімде қалған бір оқиға, халқымыздың аяулы ұлы, зиялы қауымның зерделі зейін иесі, М.Әуезов атындағы академиялық драма театрының ғажайып режиссері, профессор Асқар Тоқпанов ағамен қызықты кездесу өткен болатын. Театрдың талантты тарланымен ұйымдастырылған бұл кездесуге факультеттің студенттерімен қатар оқытушылары, жастар қатысты.
Асқар Тоқпанов нағыз өнер саңлағы екен. Кездесу кешінде театр өнерінің мәнімен шығу тарихынан бастап, өзі еңбек етіп жүрген ұжымның ізденістері, қол жеткен табыстары, ұлт рухын көтерудегі атқаратын қызметі жайлы тебірене сөз сөйледі. Аристотель театр жайлы жан-жақты еңбек жазыпты. Ұлы Гете «Ұлт болып қалыптасу үшін ол халықтың театры болуы керек», деп қалай әдемі айтқан. Ұлы режиссер студенттерді театрға келіп тұруға шақырды. Асқар ағаның нағыз киелі өнер иесі екенін байқатқан тағы бір жай бар еді.
Ол кісі құстарша сайрап, түрлі құстардың үндерін дәл келтіретінін байқатты, дейді Байтанғали. Қарлығаштың, торғайдың, қырғидың, тіпті көп адам көре бермейтін байғыздың үндерін естіген кезімізді шығыс шаһарындағы әсем бір бақтың ішінде жүргендей сезінген едік.
Қызығы, осы кездесуде мен сөйледім. Кураторымыз Тұрымтай Дүйсебаева апайымыз менің сөйлеуімді мақұл көрген еді, дейді ақын.
– Асқар аға, нағыз өнер иесі екенсіз, осынау өнер жолында жаңа биіктерге самғай беріңіз, – деп құрметті қонаққа Қазақ университетіне 40 жыл толуына байланысты жарық көрген үлкен кітапты (1974 жылы жарық көрген) сыйладым. Асқар Тоқпанов аға өте риза болып, факультет басшылығына өз алғысын жеткізді. «Білімді бол, өркенің өссін», деп маған да жылы сөздерін айтты. Сол жолы болашақ фототілші Рахымбай Ханалы дос бізді суретке түсірген. Екі-үш күннен кейін екі суретті шығарып әкеліп берді. Біреуін Асқар ағамызға беруім керек еді... «Сол екі сурет менде әлі де сақтаулы, дейді Байтанғали Төлентаев. – Енді ел газеті «Егемен Қазақстанға» ұсынамын».
Сапарбай ПАРМАНҚҰЛ,
«Егемен Қазақстан»
АЛМАТЫ
