Азия кубогы бәсекесінің жекелей сынында жарыс жолына шыққан отандасымыз Александра Опачанова алтын жүлдеге қол жеткізсе, жұптасып өнер көрсетуде Мария Пойда мен Алина Мочулге тең келер қарсылас табылмады. Ал жарыстың соңғы күніндегі жекелей сында Алина Мочул жеңімпаз атанды. Сондай-ақ қыздар арасында төрт адамдық ескек есуде Мария Пойда, Светлана Германович, Александра Опачанова және Виктория Чепикова күміс, ерлер арасында жұптасып сынға түскен Евгений Васильев пен Михаил Таскин қола жүлдегер атанды.
«Қазақстан құрамасы Азия кубогы бәсекесінде жақсы өнер көрсетті. Нәтижеміз жаман емес. Үш алтын, бір күміс және бір қола медаль жеңіп алдық. Бұл додада Гонконг, Оңтүстік Корея, Вьетнам командалары өте жақсы дайындықпен келгені анық байқалды. Жарыс өз жерінде өткен соң, кореялықтар бір емес, үш құрамын бірден қатыстырды. Ал Вьетнам құрамасында еуропалық мамандар жұмысқа тартылған. Сол себепті, олардың деңгейі әлдеқайда өскен. Ал біз үшін ең басты қарсылас – Өзбекстан құрамасы болды. Олар Азиядағы өте мықты командалардың бірі», дейді академиялық ескек есуден Қазақстан ұлттық құрамасының бас бапкері Анна Белоногова.
Бас бапкердің айтуынша, Азия кубогы тамыз айында Индонезияда өтетін Жазғы Азия ойындарының алдындағы ең үлкен дайындық. «Алда Азия ойындары келе жатыр. Ол біз үшін биылғы жылдың басты додасы. Азия ойындарында алтынға таласу қиын болады, себебі, Қытай ең мықты команда саналады. Десе де біз жүлде алу үшін бар күшімізді саламыз», деп атап өтті бас жаттықтырушы.
Әли БИТӨРЕ,
«Егемен Қазақстан»
