Жедел-жәрдем бекеттерінің ашылуына қатысқан Санитарлық авиация республикалық орталығының директоры Нұржан Отарбаевтың айтуынша, жедел медициналық жәрдем жүйесін жаңғырту аясында елімізде барлық жедел қызмет түрлерін бір жүйеге біріктіру міндеті қойылған. Мақсат – 10 мың адамнан аз тұрғыны бар ауылдарды да жедел жәрдеммен қамтамасыз ету. Тіпті, шағын бөлімшелердің тұрғындарына да медициналық көмек қолжетімді болуы керек. Сондай-ақ ауылдық дәрігерлермен бірлесе қызмет ету арқылы жедел жәрдем дәрігерлері жәрдем берудің халықаралық стандарты бойынша тәжірибе алмасады.
Ал өңірде қай жерден болсын жедел жәрдем шақырса, барлық ақпарат бір жүйеге түсіп, кім жылдамырақ көмектесе алады, ұшақ немесе тікұшақ қажеттігін анықтай алады. Облыс орталығындағы жедел медициналық жәрдем орталығы еліміздегі барлық стансалардың қызметі сарапқа салынған республикалық байқауда үздік те атанды. Бұл күндері жедел-жәрдем орталығы GPS-навигациясы жүйесін пайдалануда. Басқару жүйесі автоматтандырылған түрде жұмыс істейді.
Жалпы, GPS-навигациясы жүйесі қазір облыс орталығынан тыс аумақтарда да қолданылуда. Бақылаушы мамандар аудан орталықтарын, ауылдарды монитор терезесі арқылы қадағалай алады. Тосын оқиға орын алып, адамдар зардап шеккен болса, дереу сол жаққа жетеді немесе жақын орналасқан амбулаториялық ауруханаға хабарласады. Бұл қондырғылар энергиясыз екі сағат жұмыс істей алады екен. Қоңырау шалған адамның байланыс нөмірі автоматты түрде сақталады. Жан-жақты жабдықталған реаномобильдегі арнайы құралдар арқылы реанимацияға жеткізілуі тиіс науқастарға алғашқы көмек көрсетіледі. Дәрі-дәрмек, оттегі аппараты, реанимациялық сөмке, әр дәрігерде планшет бар.
Бас дәрігер Қанадан Ахметжановтың айтуынша, үш жыл бұрын облыстық жедел жәрдем стансасына санитарлық авиация енгізілді. Өңірде «Жедел жәрдем» кластері құрылды. Осылайша жедел жәрдем қызметінің аудандық бөлімшелері облыс орталығындағы орталыққа бірігіп, жаңа деңгейде жұмыс істеуде. Орталық құрамында «Фольксваген» 4 санитарлы автокөлігі «Ан-2» ұшақтары және «Еврокоптер» бар.
Өңірдегі барлық аудандар, қосалқы стансаның жедел жәрдем көліктерімен, заманауи медициналық жабдықтармен және бір рет қолданатын құралдармен жабдықталған. Тұрғындарға сапалы медициналық көмек көрсету үшін кардиометрлер, кувездер, узи-аппараттар және эхонцефалограф сатып алыныпты. Мысалы, 26 бригада күніне 550 шақыртуға барады. Жедел жәрдем орталығында 76 дәрігер, 170 фельдшер, барлығы 544 қызметкер күні-түні қызмет етеді. Өткен жылы 11 жас дәрігер келіпті. Орталық жанынан аудандардан келетін дәрігерлер үшін оқу орталығы ашылған. Жедел-жәрдем дәрігері Сергей Грищук биыл республика бойынша «Үздік фельдшер» атанды.
Ал жедел жәрдем бекеттері ашылған екі ауыл облысаралық, республикалық маңызы бар Павлодар – Семей тас жолына жақын орналасқан. Бұл жол аралығы айтарлықтай қауіпті жол бөлігі саналды. Былтыр бұл жерде 50 жол-көлік апаты орын алыпты. Енді жаңадан ашылған бұл бекеттер өңір, аудан жолдарындағы жол апаты кезіндегі өлім-жітімді азайтуға септігін тигізеді. Жетер уақыттары да қысқарды. Алдағы уақытта тағы да 5 жаңа жедел медициналық жәрдем бекетін ашу жоспарлануда.
Фарида БЫҚАЙ,
«Егемен Қазақстан»
ПАВЛОДАР
