Түркия Республикасының Президенті Режеп Ердоған жеке өзінің және түрік халқының атынан Нұрсұлтан Назарбаевты құттықтап, Қазақстанның өсіп-өркендеу және даму жолындағы жетістіктерін атап өтті.
«Астана қысқа уақыт ішінде заманауи мегаполиске айналып, Қазақстан тәуелсіздігінің және оның даму көрсеткішінің символы болғанына қуаныштымын. Сондай-ақ біз өңірдегі экономикалық дамудың орталығы саналатын түркі әлемінің ең жас елордасы – Астананы көркейтуге түрік компаниялары, сәулетшілері, инженерлері мен құрылысшылары үлес қосқанын мақтан тұтамыз», делінген жеделхатта.
* * *
Франция Республикасының Президенті Эмманюэль Макрон екі ел арасындағы стратегиялық серіктестіктің нәтижелеріне және оны әрі қарай нығайту перспективаларына назар аударды.
«Стратегиялық серіктестігіміздің он жылдығы ортақ жетістіктеріміздің қорытындысын жасауға және болашақты бағамдауға мүмкіндік береді. Мен серіктестігіміздің ұзақ мерзімді сипатқа ие болғанын қалаймын.
Франция Қазақстанның экономиканы әртараптандыруға, соның ішінде жаңартылатын энергия көздерін, қала шаруашылығын, цифрландыру саласын және агроөнеркәсіп кешенін дамытуға бағытталған ұмтылысын қолдайтынына сенім білдіремін», – деп атап өткен Франция Республикасының Президенті.
* * *
Иордания Королі II Абдалла Нұрсұлтан Назарбаевты елорданың 20 жылдығымен және туған күнімен құттықтап, Мемлекет басшысы мен барша Қазақстан халқына табыс, бақ-береке және амандық тіледі.
«Бүкіл Иордания Хашимиттік Корольдігінің атынан Қазақстан мен оның елордасының одан әрі өсіп-өркендей беруіне тілектестік білдіремін.
Сіздің дана басшылығыңызбен Қазақстан жаһандық қауіпсіздік пен тұрақтылықты орнатуға бағытталған қызметін жалғастырып, өзінің даму жолында айтарлықтай жетістіктерге жете береді деп сенемін», делінген жеделхатта.
* * *
Люксембург Премьер-Министрі Ксавье Беттель Люксембург Үкіметі мен жеке өзінің атынан Мемлекет басшысын Қазақстанның жаңа елордасы – Астананың 20 жылдық мерейтойымен құттықтады.
«2015-2017 жылдары Қазақстанға барған сапарларым әрдайым жадымда сақталады. Біздің Астанадағы кездесулеріміз Люксембург пен Қазақстан ынтымақтастығының маңызды кезеңі болды әрі халықтарымыздың өзара достығы мен сеніміне негізделген екіжақты қарым-қатынастарымызды нығайтуға септігін тигізді», делінген жеделхатта.
* * *
Өздерінің жылы лебізге толы құттықтаулары мен Қазақстанның өсіп-өркендеу жолында табысқа жете беруіне тілектестік білдірген жеделхаттарын Монако Князі II Альбер және Бахрейн Королі Хамад ибн Иса әл-Халифа да жолдады.
