«Бұл бағытта үлкен жұмыс жасалды. Өткен жылы Елбасы да денсаулық сақтау саласы бойынша бірнеше міндеттер қойды. Ең бірінші дәрі-дәрмекпен қамтамасыз ету, сонымен қатар отандық фармацевтикалық өндірушілерді және медицина саласындағы жекеменшік секторды қолдап салаға инвестиция тарту, цифрландыру жұмыстарын жүйелі жүргізу қажет. Өздеріңізге мәлім, біз биылдан бастап тегін медициналық қамтамасыз ету мәселесін республикалық деңгейге көшірдік. Өткен жылда осы тегін дәрі-дәрмекпен қамтамасыз ету үшін 100 миллиардтай ақша бөлінген болатын. Оның жартысы республикалық бюджеттен, жартысы жергілікті бюджеттен қарастырылды. Жылдың басында азаматтардың көпшілігі тегін дәрі-дәрмек алу бойынша бірнеше қиындыққа душар болды. Біз сол күндерден бастап туындаған мәселелерді шешумен айналыстық. Жалпы, еліміз бойынша фармация комитетіне 2 мыңнан астам азаматтан ақпараттар келді. Барлық жағдайларды тексердік. Созылмалы аурумен ауыратындар тізімге кірмеген. Соларға тегін дәрі-дәрмек жоспарланбаған. Екінші мәселе жергілікті деңгейден қажетті қаржыландыру болмағандықтан, көп азаматтарға дәрі-дәрмек жетпеген. Мемлекеттік бюджет есебінен дәрі-дәрмекпен қамтамасыз етілген пациенттер саны соңғы 5 жыл ішінде 15 пайызға артқан. Дәрілік заттармен қамту процесінің тиімділігі мен ашықтығы мақсатында биылғы жылдан бастап амбулаториялық дәрі-дәрмектерді сатып алуды орталықтандыру жүргізілді, онлайн трансляция режімінде сатып алуды ұйымдастыру нәтижесінде бюджет қаражатын үнемдеуге қол жеткізілді. Қазір өңірлік қоғамдық денсаулық сақтау басқармалары осы сомаға орталықтандыру кезінде анықталған тапшылықты жабуға және емделуге мұқтаж барлық азаматтарды дәрі-дәрмекпен қамтамасыз ету бойынша қосымша өтінімдерді қалыптастырды», деді Денсаулық сақтау министрі.
Сонымен қатар ол осы айда 2019 жылға арналған дәрі-дәрмекті сатып алу жүргізілетінін жеткізді.
Рауан ҚАЙДАР,
«Егемен Қазақстан»
