«Қазақстанның үздік тауары» республикалық көрме-байқауының облыстық кезеңіне Атырауда 40 кәсіпкерлік қатысты. «Жалпы аймақта 56 мыңнан астам шағын және орта бизнес субъектісі бар, бұл салада 120 мың адам жұмыспен қамтылған, дейді облыстық кәсіпкерлік және индустриялық-инновациялық даму басқармасы басшысының орынбасары Гүлзада Қайырғалиева. – Өткен жылы 1,7 млрд теңгенің өнімі өндірілді. Көрсеткіш жыл санап артып келеді».
Қазір кәсіпкерлерге мемлекет тарапынан қолдау жақсы. Жергілікті атқарушы билік те бизнес бастаймын дегендерге көмек көрсетуден аянған емес. Биылдың өзінде 500 млн теңге шағын несиелеуге бөлініп отыр. Өңірде кәсіпкерлік саласы негізінен қызмет көрсету мен жеңіл өнеркәсіпке негізделген.
Көрме-байқаудың қорытындысы бойынша «Өндірістік мақсаттағы үздік тауарлар» аталымында Атырау мұнай өңдеу зауыты, «КасХим», «НовоСтройПроект» серіктестіктерінің өнімдері жүлдегер болды. «Халық тұтынатын үздік тауарлар» аталымында «Caspiy Lana Atyrau» ЖШС өнімдері, «Эталон» жарнама агенттігінің сувенир бұйымдары, «Оразбаева ЖК» ұлттық киімдері жеңімпаз деп танылды. «Үздік азық-түлік тауарлары» санаты бойынша «Trans Tech International» нан өнімдері, «АсылАгро» шұжықтары және «АтырауАгроФеликстің» көкөніс салаттары үздіктер қатарында аталды. Атырау қалалық әкімдігі тағайындаған «Үздік әлеуметтік кәсіпкер» атағын «Бум-2020» ЖК иеленсе, «Сұлтан» ШҚ ешкі сүтін өңдеуге бағытталған жұмысы «Үздік инновациялық жоба» ретінде марапатталды.
Көрме-байқаудың үш аталымы бойынша облыста озып шыққан тоғыз кәсіпкерлік енді республикалық кезеңде сынға түседі.
Бақытгүл БАБАШ,
«Егемен Қазақстан»
АТЫРАУ
