![Ұлттық ұлан делегациясы Түркияда болды](/article_photo/1532486791_article_b.jpeg)
Алғашқы күні қазақстандық әскери делегация Ыстанбұл қаласы жандармериясының қолбасшысы, генерал-лейтенант Нух Короглумен кездесіп, көп миллионды мегаполистегі жандармерияның атқаратын қызметімен танысты.
Келесі күні қазақстандық делегация Анкараға жол тартып, Түркия Республикасының Қорғаныс министрі, армия генералы Хулуси Акар, Түркия Республикасы Қарулы Күштерінің Бас штабының бастығы, армия генералы Яшар Гюлер және Түркия Жандармериясының Бас қолбасшысы, армия генералы Ариф Четинмен кездесу өткізді. Сапар барысында жоғары лауазымды әскерилер екіжақты қарым-қатынас туралы сөз етті. Түрік тарабы Ұлттық ұлан үшін әскери киім үлгілері мен қару-жарақ, арнайы құралдар, оқ-дәрілерді жеткізуге ынта танытып отыр. Осыдан кейін қазақстандық делегация назарына қорғаныс-өнеркәсіптік кешенінің «Нуролтехнолоджи», «AVS», «Гази Фишек» өнеркәсіптері ұсынылды.
Әрі қарай қазақстандықтар жандармерияның жедел штаб орталығында болып, мемлекеттік шекараны барлау және пилотсыз ұшу аппараттарын қолдану арқылы күзету мүмкіндіктері, сондай-ақ бірегей ақпараттық кеңістікке біріктірілген тұлғалар мен көлік құралдарын танитын мобильді жүйемен танысты.
Сонымен қатар сапар аясында түрік әскерилері Криминалдық орталықта арнайы операцияларды қамтамасыз ету құрылғыларының көрмесін ұйымдастырды. Делегация мүшелері инженерлік қызмет мүлкіне қызығушылық танытып, арнайы инженерлік техника мен мина-іздеу құралдары бар роботтар назарға ілікті.
Келіссөздер барысында мамандардың кәсібилігін жоғарылату және әскери білім беру бойынша мәселелердің шешілуі қаралды. Осылайша, Жандармерия училищесінде оқытылатын Қазақстан курсанттарының санын жылына
8 адамға дейін көбейту туралы шешім қабылданды. Сондай-ақ Түркия Республикасының академияларында Түркия әскери оқу орындарын аяқтаған Қазақстан Ұлттық ұланынан жіберілген түлектердің оқуларын әрі қарай жалғастыру туралы келісімге қол жеткізілді. Бұдан бөлек Түркия оқу орындары базасында арнайы мақсаттағы мамандармен (мерген, жарғыш техник, суға сүңгуші және тағы басқа) өткізілетін курстардың саны артты.
Түркия Ішкі істер министрі және Жандармерия Бас қолбасшысымен кездесу барысында Қазақстан Ұлттық ұланын Еуропа және Орталық теңіз елдерінің Жандармерия және полиция күштерінің қауымдастығы (FIEP) құрамына кіргізу мәселесі сөз етілді. Аталған ұйымға бірқатар Еуропа мемлекеттері мүше. Бұл өз кезегінде ұландықтарға ассоциация мүшелерінің арнайы бөлімшелері әрекетінің тактикасын үйренуге, олардың оқу-материалдық базасында жиын дайындықтарын өткізуге, сондай-ақ бөлімшелердің материалды-техникалық қамтылуын көтеруге мүмкіндік береді.
Тәжірибе алмасу аясында түрік тарабы жыл сайынғы «Әскери керней» халықаралық әскери-музыкалық фестивальға қатысуға, сондай-ақ Алматы облысы 5574 әскери бөлімі арнайы мақсаттағы бөлімшелерді жауынгерлік және әдістемелік дайындау орталығы базасында өтетін арнайы мақсат бөлімшелерінің оқу-жаттығуларына қатысуға ынта танытты.
Сапар барысында қазақстандық делегация «Ататүрік» кесенесіне барып, гүл шоқтарын қойды.
«Егемен-ақпарат»