Балықшылар мерекесіне арналған шара көктің иісі бұрқыраған, жан-жағын жасыл желек қоршап, салқын самал ескен, табиғаты тамылжыған Қиғаш өзенінің жағасында басталды. «Амангелді» ЖШС мен «СевКаспийФиш» балық зауыты, «Ақсу-Қиғаш»ЖШС, балық қорғау инспекциясы, «Каспий-балық» ӨК, Орман шаруашылығы мекемесі, «Сәрсенбаев» шаруа қожалығы, «Каспий таңы» ӨК және округтер мен жеке кәсіпкерлер құрған ақшаңқан киіз үйлер салтанаттың сәнін келтіріп-ақ тұр. Одан бөлек көршілес Ресей Федерациясының Красный Яр ауданынан келген кәсіпкерлер де өз өнімдерін ұсынды. Жағалай киіз үйлермен қоршалған алаңда ерекше бір аура орнағандай. Бұл алда болатын шараның ауқымды екенінен хабардар етіп, аяқ басқаннан-ақ көтеріңкі көңіл-күй сыйлады.
Балық шаруашылығы қызметкерлері күніне арналған «Қажырлы еңбек, мерейлі мамандық» атты салтанатты шарада облыс әкімінің орынбасары Әлібек Нәутиев қатысушыларды мерекемен құттықтады: «Бүгінде балық шаруашылығы облысымыздың экономикалық дамуына өзіндік ерекше үлесін қосып келе жатқан үлкен салалардың бірі. Әрине қиындықсыз жұмыс болмайтыны белгілі. Бұрынғы балық шаруашылығы тарих қойнауына кетсе, қазір қайта құрылып, дамып келе жатыр. Тәуелсіздік жылдары бұл саланы қайта дамыту бағытындағы Елбасымыздың үлкен еңбегін атап өтуіміз қажет. Себебі ата кәсібін жалғастырып жатқан Каспий өңіріндегі қиыншылықтарды жоюда, көршілес төрт мемлекетпен бірлесе отырып оның қойнауындағы байлықтарды бөлісуде, мұны ортақ пайдалану мәселелерін шешуде үлкен істер тындырылды. Осыдан бір-екі жыл бұрын балықшылар 400 тонна ғана балық ауласа, биыл олардың лимиті 9 мың тоннаға жетті. Бұрынғы Атырау балық зауытының бір бөлігі болған Шортанбай балық зауыты қайта түлеп, жаңғырып, салаға өзіндік үлесін қосып отырғаны сіздерге аян», дей келе елеулі еңбектерімен ерекшеленген балықшыларды облыс әкімінің алғыс хатымен марапаттады.
Аудан әкімі Бибоз Шаяхметов аудандағы балық шаруашылығы бойынша тындырылған жұмыстар жөнінде баяндама жасап: «Аудан көлемінде балық шаруашылығын дамыту және өркендету бағытында Теңіз ауылдық округінде 2016 жылдың наурызынан бастап Ресей-Қазақстан азаматтарының қатысуымен «Каспий Интер Фиш» ЖШС құрылды. Серіктестіктің жылдық балық қабылдау қуаты – 2000 тонна. Тұрақты түрде 20, маусымдық қызметте 60 адам жұмыс істейді. Шортанбай балық зауыты өндірістік базасында «Сев Каспий Фиш» ЖШС құрылып, жұмысты қарқынды бастады. Байда ауылдық округінде «Каспиан Фиш» ЖШС-іне қарасты балық зауыты іске қосылды. Бұлардан басқа ауданда саланы дамыту бағытында бұрыннан «Каспий Балық» ӨК, «Каспий Таңы» ӨК, «Амангелді атындағы» ЖШС, «Ақсу-Қиғаш» ЖШС, «Сәрсенбаев Е» ШҚ аудан көлемінде балық аулап, өңдеп, экспортқа шығарумен айналысады» деп атап өтті. Салтанатты шарада бірнеше сала ардагері мен озат жұмысшылар марапатқа ие болды.
Әрине қандай мерекенің де ән шашусыз сәні кірмейтіні анық. Кең даланың төсінде ән әуелеп, спорттық жарыстар өтті. Осылайша Қиғаш өзенінің жағасына жиналған балықшылар атаулы күндерін айрықша мерекеге айналдырды.
Қанат ҒҰМАРОВ
Атырау облысы
