![«Анаға апарар жол» АҚШ-ты шарлайды](/article_photo/1532489344_article_b.jpeg)
Америкалық «World Wide Motion Pictures Corporation» компаниясы Мәдениет және спорт министрлігі тапсырысы бойынша Ш.Айманов атындағы «Қазақфильм» АҚ және «Новый мир» Продакшн» ЖШС-інің бірлесе түсірген «Анаға апарар жол» фильмінің солтүстікамерикалық өңірде дистрибуциялау құқығын сатып алды. Естеріңізге сала кетейік, аталған фильм былтыр Қазақстан атынан «Оскар» және «Алтын глобус» «Үздік шетел фильмі» аталымына ұсынылған еді.
Бас продюсері Әлия Назарбаева, режиссері Ақан Сатаев бұл фильмге кіл жұлдыздарды жинаған. «Анаға апарар жол» фильмінде еліміздің танымал актерлері – Алтынай Нөгербек, Әділ Ахметов, Аружан Жазылбекова, Берік Айтжанов, Болат Әбділманов түскен. Бұл эпикалық фильмнен көрермен қазақ отбасының 1930 жылдардан бастап, күні бүгінге дейінгі бастан кешкен тағдырын көре алады.
«Продюсерлерімізге, түсірілім тобын және маған да фильмді АҚШ кинотеатрларында көрсету – үлкен абырой. «World Wide Motion Pictures Corporation» компаниясы фильмдегі шынайылықты көріп, ондағы оқиға желісі әлемнің барлық аудиториясына ұғынықты болатынына сенім білдіргеніне қуанып отырмын», деді бұл жөнінде режиссер Ақан Сатаев.
«Бірнеше ұрпақтың тарихын баяндайтын, оның үстіне «Оскар» сыйлығына ілгеріде ұсынылған терең драманы прокаттауды мақтан санаймыз. Америкалық отбасылар, әсіресе аналар қауымы жанға жылу сыйлайтын фильмді қуана көреді», деді «World Wide Motion Pictures Corporation» компаниясының бас директоры Пол Д.Хэнкок.
«Анаға апарар жол» фильмі АҚШ-та шектеулі прокатқа биыл күзде азия-америкалық ұйымдардың қолдауымен шығады.
Айта кетелік, «Анаға апарар жол» фильмінің тұсаукесері 38-ші халықаралық Мәскеу кинофестивалінде өтіп, сыншылардың оң бағасын алған. Сонымен қатар, фильм түрлі кинофестивальдерден жүлде алып, халықаралық көрсетілімдері өткен. 19 шілде күні осындай көрсетілім Вашингтондағы Карнеги институтында «Рухани жаңғыру» бағдарламасы аясында өтті.
Бағашар ТҰРСЫНБАЙҰЛЫ,
«Егемен Қазақстан»