![6697 әскери бөлімде жас сарбаздар ант қабылдады](/article_photo/1533099621_article_b.jpeg)
«Біздің қоғамның идеалы – ол өзінің тарихын, тілін, мәдениетін білетін, бұл ретте заманауи, шетел тілдерін меңгерген, алдыңғы қатарлы және жаһандық көзқарасы бар қазақстандық болу керек», деп атап көрсеткен болатын Елбасы Н.Назарбаев «Төртінші өнеркәсіптік революция жағдайындағы дамудың жаңа мүмкіндіктері» атты Жолдауында. Отан алдындағы борышын өтеуге шақырылған жастарымыздың арасында білімді де білікті азаматтар аз емес.
6697 әскери бөлімге келген сарбаздардың ұзын саны екі жүзден асады. Олардың дені Қызылорда, Тараз, Павлодар, Атырау облыстарынан шақырылғандар. Жүрек тебірентер рәсімге аталған өңірлерден сарбаздардың ата-аналары мен туыс-туғандары да арнайы келіпті. Біреулері балаларының, ал екіншілері бауырларының елін қорғайтын азамат болғанына көз жеткізіп ерекше қуанышқа бөленді. «Сіздердің қызметтеріңіз – әрбір қазақстандық отбасының тыныштығы мен ертеңгі күнге деген сенімділігінің кепілі. Сіздер бұл жерден отансүйгіштік, адамгершілік қасиеттерді бойларыңызға сіңіріп әрі төзімді болуға үйренесіздер», деді Қазақстан Республикасының Ұлттық ұланы «Орталық» өңірлік қолбасшысының тәрбие жөніндегі орынбасары, полковник Савердин Имиров шара барысында.
«Бүгін біздің бөлімде салтанатты және айтулы күн. Жас сарбаздарымыз Қазақстан халқына және оның заңды түрде сайланған Президентіне адал қызмет етіп, Отанымыздың абыройын асқақтата түсетін болады» деп атап өтті 6697 әскери бөлім командирі, подполковник Ерлан Ипатов.
Оқу-жаттығуда болып келген сарбаздарымыз ант қабылдау салтанатында дайындықтарының жоғары деңгейде екенін көрсетті. Олар саптық амалдарды, жауынгерлік қарудан ату машық-дағдысын, сондай-ақ жауынгерлік техниканы жүргізуді және басқа да әскери іс-қи-
мылдарды жетік меңгерген.
Отан алдында ант қабылдаған солдаттарымыз алдағы уақытта қоғамдық қауіпсіздікті қамтамасыз етіп, қылмыстық атқару жүйесі мекемелерін күзету секілді жауапты міндеттерді орындауға кірісетін болады.
Қымбат ШҰҒАЙЫП,
кіші сержант