Бокс • 02 Тамыз, 2018

ММА-дан Қазақстан құрамасы V Азия чемпионатында топ жарды

66 реткөрсетілді

Орталық коммуникациялар қызметінде «Қытайдың Харбин қаласында ММА Бүкіләлемдік Қауымдастығының тұжырымдамасы бойынша ММА-дан V Азия чемпионаты» тақырыбына арналған баспасөз конференциясы өтті.

27-29 шілде аралығында Қытайдың Харбин қаласында ММА Бүкіләлемдік Қауымдастығының тұжырымдамасы бойынша ММА-дан V Азия чемпионаты өтті. Ерекше ауыз толтырып айтарлық жайт, Азияның ең мықты ММА шеберлерінің басын қосқан бұл дүбірлі додада Қазақстанның ұлттық құрамасы топ жарып, командалық есепте жеңіске жетті.

Қазақстандық спортшылар барлық он салмақ дәрежесінде сынға түсіп (8 ер, 2 әйел) 3 алтын, 5 күміс пен 1 қола алқаны еліміздің қоржынына салды.

Атап айтсақ, Нұржамал Садықова (әйелдер арасында 52 кг дейінгі салмақ дәржесінде), Аслан Ораз (70.3 кг дейінгі салмақ дәржесінде), Нұрнияз Қошбаев (+93 кг салмақ дәржесінде) қарсыластырын ойсырата ұтып, чемпион атанса, Ақбөбек Ерғалиева (әйелдер арасында 61 кг дейінгі салмақ дәрежесінде), Талғат Жұмағалиев (56.7 кг дейінгі салмақ дәржесінде), Дастан Амангелді (61.2 кг дейінгі салмақ дәрежесінде), Нұрбек Қабдырахманов (65.8 кг дейінгі салмақ дәрежесінде), Мұрад Абдурахманов (93 кг дейінгі салмақ дәржесінде) күміс алқаны иеленді. Ал, қола медальді Думан Балмұханов (84 кг дейінгі салмақ дәрежесінде) қанжығасына байлады.

Жалпы командалық есепте Қытай елінің спортшылары екінші орынды иеленіп, қырғыстандық ММА шеберлері үшінші орынды еншілесе, Қазақстан құрамасы суырылып алға шығып, бұл мықтылар үштігінде көш бастады.

Ендігі кезекте ММА-дан еліміздің ұлттық құрамасы қыркүйек айында Қытайдың Бейжің қаласында IMMAF тұжырымы бойынша юниорлар арасында өтетін Азия чемпионаты мен әлем чемпионатына және ағымдағы жылдың қарашасында Бахрейнде шымылдығын түретін біріккен әлем чемпионатына дайындалатын болады. Бахрейнде өтетін аталған чемпионатта тұңғыш рет әлемдегі ең ірі екі әуесқой ММА федерацияларының (WMMAA және ІММАF) өкілдері кездеспек.

Баннер
Соңғы жаңалықтар

Ұқсас жаңалықтар