«Ақ сарай» деген атауға ие болған жаңа неке сарайының салтанатты ашылуына Қарағанды облысының әкімі Ерлан Қошанов та қатысты. Өңір басшысы АХАТ бөлімінің жұмысымен танысып, дәл сол кезде салтанат залында тіркеуден өтіп жатқан жас жұбайлардың, алтын және күміс той иелерінің қуаныштарына ортақтасты.
– Қарағандылықтарға дәл осындай сарайдың керектігі көптен бері белгілі болатын. Мұны қалаға жасалған сый деп қана түсінбеу керек. Бұл патриоттықтың және меценаттықтың, ерен еңбектің жарқын үлгісі. Еліміздің әр тұрғыны, әр кәсіпкері «Рухани жаңғыру» бағдарламасын жүзеге асыруға қатысуы өте маңызды, – деп атап өтті өңір басшысы.
Бұған дейін Қарағандыдағы неке сарайы ескі және тар ғимаратта орналасқан-ды. Енді АХАТ қызметкерлері кең де самаладай жарық, жайлы жерде жұмыс істейтіндіктеріне қуанышты екендіктерін айтады. Бұл жерде шілде айының өзінде 500-ден астам тіркеу актілері жүзеге асырылған екен.
Жалпы, мейрамхана және қонақ үй кешені ретінде салынған жаңа ғимараттың аумағы 16,5 мың шаршы метрді құрайды. Жоба құны 3 млрд теңге тұрады.
«Ақ сарайдың» бой көтерген жері де некеге отырушы жас жұбайлар үшін өте қолайлы.Жаңа ғимарат қаланың қақ төріне салынған әрі дәл жанында Әнет баба атындағы орталық мешіт орын тепкен.
Қайрат ӘБІЛДА,
«Егемен Қазақстан»
