Ел Тәуелсіздігінің 20 жылдығындағы салтанатты жиналыста сөйлеген сөзінде Елбасы Нұрсұлтан Назарбаев Қазақстанның бүгіні мен болашағын айқындайтын бағыт-бағдарымызды көрсетіп берді. Президентіміздің осыншалықты кезеңде дамыған елдердің қатарына қосылуға деген үлкен талпынысы мен үлкен талабы жақсы істердің, жақсы игіліктердің иірімі болды. Туысқан елдің тұғырлы бірлігін біріктірген еліміздің ынтымағына үлкен баға берді. Елбасы осы азғантай уақыттың өзінде бірліктің, ынтымақтастықтың және татулықтың қаншалықты қайтарымды болатындығын ісімен де, өнегесімен де көрсетті.
Тәуелсіздіктің 20 жылдығы тамаша табыстарға толы. Осы кезеңде Елбасымыз Нұрсұлтан Назарбаев егемен елімізді небір күрделі кезеңдерден тура бағыттан адастырмай алға бастап, тәуелсіздіктің тұғырын бекітетіндей берекелі істер бекемдегенін барша қазақстандық анық сезініп отыр. Қазақстанды әлемге танытты, мемлекеттілігін қалыптастырды, алыс-жақын шетелдерге абыройын асқақтатты. Астананы Арқаға көшіріп, ғасырлық жобаны жүзеге асырды. Елбасының әр қадамы өз елінің экономикалық дамуы мен халқының тыныштығын, әлемде бейбітшілікті нығайтуға бағытталып келе жатқаны сөзсіз. Ортақ отанымыз – Қазақ елін әлемдік қаржы дағдарысынан қиындықсыз шығарып, дамудың даңғыл жолына бастап келе жатқанын әлем мойындап отыр. Сондықтан да ол халқына қалаулы, еліне елеулі тарихи тұлға. Айта берсе, тәуелсіздік жылдары атқарылған шаруалар қисапсыз көп. Оны күнделікті өмірімізде сезініп те келеміз.
Елбасының елімізде ұлтаралық келісімді нығайтудағы бастамалары қашанда халықтан қолдау тауып жатады. Қазақстан халқы Ассамблеясы Президент бастамасымен дүниеге келген, Тәуелсіздіктің төл перзенті. Нұрсұлтан Әбішұлы, біздің басты жетістігіміз – жүзден астам ұлттар мен ұлыстардың бір елде татулықта, бірлік пен бейбітшілікте өмір сүріп жатқанымыз, мұны айрықша бағалау, қастерлеу керек деп үнемі атап өтеді.
Біз тәуелсіздіктің нәтижесінде салт-дәстүрімізді, тілімізді сақтауға қол жеткіздік. Тәуелсіз мемлекеттің бір белгісі мемлекеттік тіл екенін ұмытпайық, ағайын. Сондықтан да тәуелсіздікпен келген табыстарымыз бен жетістіктеріміз де ортақ. Біз егеменді еліміздің ертеңі үшін еселі еңбек етіп, ұлағатты ұрпақ тәрбиелеуіміз керек. Ел ертеңінің темірқазығы болатындай ұрпақтарымыз да достықтың, татулықтың үлгісін көрсетуі қажет. Сонда ғана тәуелсіздік тұғыры бұрынғыдан да беки түседі, өміршеңдігі ұзарады.
Паввел МАГЛЕЛИ, Қазақстан халқы Ассамблеясының мүшесі.
Ақтөбе облысы.