Николя РУЧТИ (Швейцария):
– Мен бұрыннан да Азия елдерін жақсы көретінмін. Бірнеше жыл Қытайда тұрдым. Кейін Қазақстанға баруға мүмкіндік туды. Шынымды айтсам, бұрынғы кеңестік елдердің бірі болғандықтан, сол заманның архитектурасын көретін шығармын деген күдік басым болды. Әйтсе де, Қазақстанның бас қаласына келгенде, шаһардың сұлулығына ерекше тамсандым.
«Tour de France»-қа жиі қатысатын «Астана» велокомандасын біздің елімізде көп адам біледі. «Астана» велокоманданың атауы ретінде ғана қабылданады. Бірақ өз көзіммен көрген соң, мен қала туралы үнемі айтып жүремін.
Габриэль МАКГУАЙР (АҚШ):
– Мен Орталық Азияның мәдениеті мен әдебиетіне қызығып, Қазақстанға қазақ тілін үйрену үшін бардым. Алдымен Оңтүстік Қазақстанда тұрдым. АҚШ-қа кетпес бұрын Астанада жұмыс істеу туралы ойлана бастадым. 2007 жылы Астанаға қыдырып келдім. Әу баста қалада биік ғимараттар көп, көшеде адам аз болғаны маған таңсық көрінді, тіпті, ғылыми фантастика секілді болды. Мені Қазақстанда ең бірінші таңғалдырғаны – 20-дан асқан, жұмысы, тұрақты табысы бар адамдардың ата-анасымен тұруы болды. Бізде ата-анаңды тек демалыс күндері көруге барып қайтатындықтан, бұл дәстүр маған ерекше әсер етті әрі бірден құрметтеуге лайық үрдіс екен деп ойладым. Себебі бұл туыстық қарым-қатынастың беріктігін көрсетеді.
Ханс ДРИССЕР (Нидерланды):
– Қазақстанның елордасы Еуропаның ешбір қаласына ұқсамайды. Мен ұшақтан түскен кездің өзінде қаланың ауасын жұтып тұрып, ерекше рахаттанғаным есімде. Ал қаланың архитектурасын көріп, шексіз фантазияның куәсі болдым. Астана туралы естіп – білген бір бөлек, барып қаланы көрген – тіптен бөлек. Астанада ескі мен жаңа жақсы үйлесім тапқан. Астана бизнес үшін қолайлы. Жас, әдемі қала жаңашылдығымен өзіне баурап әкетеді.
Элоиза КЛЕЧЕСКИ (Филиппин):
– Шетелге шыққан сайын жаңалыққа байып қайтасың. Тіпті халықтар арасындағы ұқсастықтарға кез болатын сәт те аз болмайды. Қазақстанға барған сапарымда осындай ұқсастықты байқадым. Менің ойымша қазақтар мен филиппиндіктер арасында рухани жақындық бар тәрізді. Мысалы, отбасылық байланыс, туыстық қарым-қатынас, достықты қадірлеу тәрізді игі қасиеттер қос халыққа ортақ қасиет екеніне көз жеткіздім.
Әзірлеген Гүлнұр ҚУАНЫШБЕКҚЫЗЫ,
«Егемен Қазақстан»