Аталмыш көрменің маңызы жайлы көпшілікті хабардар еткен облыстық музей басшысы Марғұлан Оспанов, бұл шара Елбасымыздың «Рухани жаңғыру» бағдарламасы аясында, сонымен қатар жуықта атап өтілген Астананың 20 жылдық мерейімен орайлас қолға алынып отырғанын, мұнда жеткізілген ұлағаты мол тарихи-танымдық жәдігерлер елордалықтардың санасын жаңғыртып, зердесін жетілдіруге үлкен әсер етерін атап өтті.
Алғаш 1991 жылы шаңырақ көтерген ұлы ағартушы атындағы мемориалдық музей өз қорына сол дәуірге тән 12 мың дана жәдігерді топтастырған еліміздегі жалғыз мекеме. Яғни бұл дүниелердің арасында өте құнды қолжазбалар, заттық бұйымдар, әкімшілік құжаттар мен фотодеректер бар.
Қостанайлық ағайын астаналық көрермендер үшін музей қорынан таңдап алынған маңызы зор деген жәдігерлерді әкеліпті. Атап айқанда, ағартушы Ыбырай Алтынсариннің бастамасымен мектеп құрлысын салу туралы Қостанай уезінің бастығы Михайловтың мәлімдесі, 1884 жылы Қазан қаласында жарық көрген атамыздың «Шариғатул – ислам» кітабының түпнұсқасы, Ыбырайдың атасы Балғожа бидің немересіне жазған хаты, ағартушы дүниеден өткеннен кейін оның артында қалған дүние-мүлкі туралы 1890 жылдың 24 наурыз күні толтырылған тізім және марқұмның «қайтыс болғаны туралы» 1890 жылдың 13 сәуір күні артында қалған жесірі Айғаныс апамызға берілген куәлік, сонымен қатар әулет шежіресі, Орынбор шекаралық комиссия төрағасына Балғожа бидің Ыбырайды орыс-қазақ мектебіне қабылдату туралы мәлімдемесі, Орынборда қазақ балаларына арнап салынған мектептің макеті (бұл мектепте 1850-1857 жылдары Ыбырай атамыз білім алған), ағартушы-қайраткердің 1889 жылы Қостанай қаласындағы екі кластық қазақ-орыс училищесінің оқушыларымен бірге түскен портреті және оның мектебінен түлеп ұшқан шәкірттері: Қорғанбек Бірімжанов, Ғабдығани Балғынбаев, Ахмет Байтұрсынов, Нұрғали Құлжанов, Спандияр Көбеев, Бекет Өтетілеуов, Міржақып Дулатов, т.б. деректі дүниелерін көріп, көзайым болдық.
Бекен ҚАЙРАТҰЛЫ,
«Егемен Қазақстан»
