Кеше Астанада республикалық «Бәйгеге барыңды сал, жас қалам!» жас журналистер мен карикатурашылар байқауының жеңімпазы мен жүлдегерлерін марапаттау рәсімі өтті.
Бұл байқау биылғы жылдың 9 маусымы күні ел Тәуелсіздігінің 20 жылдығына орай «Нұр Астана» республикалық жастар апталығы мен Астана қаласының жастар саясатын қолдау мемлекеттік қорымен және «Елорда жастары» қоғамдық қорымен бірлесіп жарияланған болатын. Оның мақсаты – жас журналистер мен жас суретшілер арасында шығармашылық белсенділікті арттыру, олардың үздік идеяларын іске асыруға ықпал етіп, шығармашылық бәсекелестікті күшейтуге атсалысу, сондай-ақ соңғы кездері кенжелеп қалған карикатура, очерк, памфлет пен фельетон жанрларын дамыту.
Сөйтіп, жарты жылдан бері еліміздің түкпір-түкпірінен «Нұр Астана» газетінің редакциясына түрлі жанрда келіп түскен 60-қа тарта мақала мен 20-ға тарта карикатураның арасында мына жас талаптылар жеңімпаз бен жүлдегерлер атанды. Бірінші орынды «Алаш айнасы» газетінің тілшісі Мәриям Әбсаттар жеңіп алды. Екінші орынға Жамбыл облыстық «Ар-Ай» жастар газетінің тілшісі Қамар Қарасай мен Семей мемлекеттік педагогика институты Бейнелеу өнері және сызу факультетінің студенті Жанна Жүнісова ие болды.
Бұл жерде жас суретші қазылар алқасының мүшесі болған әріптесіміз, белгілі суретші, Айдарбек Ғазиздің қолынан диплом алғанын айта кеткен жөн. Үшінші орын Әл-Фараби атындағы Қазақ ұлттық университеті журналистика факультетінің студенттері Махаббат Жайылхан мен Мөлдір Дарханбаеваға және Қарағанды облыстық «ЛимоНад» жастар журналының редакторы Дулат Аманжолға берілді.
Ал Орал қаласының С.Сейфуллин атындағы дарынды балаларға арналған №11 мектептің оқушысы Алпамыс Файзолла, Алматы облысы, Жамбыл ауданы, Ұзынағаш ауылындағы орта мектеп оқушысы Нұргүл Құрманбек пен Алматы қаласы, А.Қарсақбаев атындағы №41 мектептің оқушысы Айзада Бижанова ынталандыру сыйлығын иеленді.
Байқау қорытындысында жеңімпаз бен жүлдегерлерге дипломдарды қазылар алқасының мүшелері – белгілі қаламгер, публицист Шархан Қазығұл, «Нұр Астана» газетінің бас редакторы Ғабит Мүсіреп, «Егемен Қазақстан» газетінің тілші-суретшісі Айдарбек Ғазиз бен Астана қаласы жастарды қолдау мемлекеттік қорының директоры Аманбек Төлепберген табыс етті.
Дастан КЕНЖАЛИН.