Елге жасаған жақсылық еселеніп қайтатыны анық

Қазақстанда әлеуметтік салаға қамқорлық таныту аясы кеңейе түсуде

Қазақстанда үздік білім беру, үздік денсаулық сақтау, үздік мемлекеттік басқару, үздік әділ сот болуы тиіс. Жаңа әлеуметтік Стратегия – әрбір қазақстандықтың игілігі жөніндегі менің қамқорлығым. Бұл біздің еліміздегі барлық атқарушы биліктің де қамқор­лығы болуға тиіс.  Мен өзімнің Қазақстан халқы­на жаңа Жолдауымды осы мәсе­леге арнағалы отырмын.

Нұрсұлтан НАЗАРБАЕВ.

“БЕРЕКЕ-А” – ҚАЙЫРЫМДЫЛЫҚТЫҢ ДОСЫ

Қалың құйқалы оңтүстікте қа­йы­рымдылық жасағанды сауап­қа балайтын жаны ізгі адам­дар көп. Шық бермес Шығайбайдай “тап­қаным өзімдікі” деп бауы­ры­на тыға бермей, пайдасының бір бө­лі­гін тұрмыс қиыншылығынан қа­жып жүретін адамдармен бөліседі. Асфальт жол салуға маман­дан­ған, оған керекті бар технология, қондырғылар, шағын зауыт, техникаларына дейін түп-түгел “Береке-А” корпорация­сы­ның президенті Рәшкүл Ос­панәлиева ханым осындай жан. Таңертеңгілік жұмысқа келгенде қабылдау бөлмесінде адам­дар кезекке тұрады. Жұмыс жағ­дайы­мен емес, бір берсе осы Рәшкүл беріп қалады-ау деп үмітін ар­қалап келгендер. – Мүмкіндігімше жағдай­ларын сұрап, барар есік, шығар тауы жоқ­тарға қаржылай көмек беруге ты­ры­самын, – дейді Рәшкүл Жә­лел­қызы. – Бірақ, ішінде әркімге қол жайып масылдық өмірге үйреніп қалғандар да болады екен. Отбасы жағдайын сұрап “шын қиналып жүрсеңіз не ері­ңізді, не балаңызды жұмысқа ала­йын” десем, “не сенен жұмыс сұрап келдім бе, берсең ақшаңды бер, бермесең өйтіп қыжыртпа” дейтіндер де кездеседі. Ал, солар менің бір салаға толық маман­да­нып, бар техникам болу үшін мил­лиондаған доллар несие ал­ғанымды білмейді, білсе де құ­лақтарына қыстырмайды. Ау, мен тәуекелдің арқасында, Елба­сы­ның кәсіпкерлерді қолдауы­ның арқасында осындай биікке жеттім ғой. Әйтсе де қайырымдылық – Рәш­күл ханымның сүйекке сің­ген әдеті. Жұрт Оспанәлиева сай­лау­ға түссе бір қуанып қалады. Үкі­мет үлкен көшелерді, даң­ғыл­дар­ды жөн­деуге қаражат бө­ле­ді, ішкі орамдар кейінге сырғытылады. Кездесу барысында сондай кө­шеде тұратындар Рәшкүлге ама­нат айтады. Сайланғанша уәдеге қарқ қылып, кейін ұстатпай кететін кейбір депутаттардан жөні, жо­сығы бөлек. Уәде берді, орын­дай­ды. Осылайша, талай қысқа орамдар Рәшкүлдің демеуші­лігі­нің арқасында тегін асфальтталды. Асфальт дайындайтын зауыт­тары толық компьютерлендірілген, жол салатын, тегістейтін тех­нологиялары жаңаланып тұ­ра­­тын, Германия, Қытай секілді мемлекеттерден арнаулы мамандар шақыртып, жаңа қондыр­ғы­лар­дың қыр-сырын жұ­мысшы­лары­на үй­ре­­тетін, кәсіби ше­бер­лігін жетілдіретін корпорация қыз­ме­ті­не бүгінде об­лыс­тан бө­лек, рес­пуб­лика­лық ауқымда да сенім үлкен. “Бере­ке-А” кор­­порациясы жұрт аузында ғасыр­лық жоба атанған “Батыс Қытай – Ба­тыс Еуропа” автомагистраліне өз үлесін қосуда. Корпорация көп салалы. Тек, асфальт салумен шектелмейді. 2008 жылы Сарыағаштың бірнеше ауылдарын су алғанда тез ара­да он үй салып берді. “Достық” ауылында аз қамтамасыз етілген отбасыларға өз қаржысы есебінен алты үй, Қазығұрт ауда­нын­да он үй салды. Корпорация қанатын жайып, үлкейгеннен кейін қайырым­ды­лық іс-шараларын да көбейткен. Облыс орталығындағы “Қамар” қайырымдылық мекемесінің тәр­биеленушілері мен ардагерлер ұйы­мына тұрақты қаржы бөліп тұрады. Аты-шулы ВИЧ оқиғасы кезінде де сырт қалмады. Бір ба­ла­ның тұрақты емделуіне бар керекті қаржысын төлеп беріп оты­ра­ды. Студенттерге грант бөл­генде де көмегін көрсетіп келеді. Шымкент шаһары Қазақ­стан­дағы үшінші қала болады деген сөз Елбасының аузынан айтыл­ды. Алайда, күннің көзі көбірек түсетін, халқы көп өңірдің та­би­ғаты осы қисынға кел­генімен, Шым­кент­тей шаһары­ңыз­да, бас­қа­сын айтпағанда, Неке сарайы жоқ бола­тын. Дүниеге сәби әкелуден Қазақстан бойынша алдыңғы орында тұрса да сәу­летті ғимарат­тары­мен де мақтана ал­май­тын. Облыс бас­шысы Асқар Мыр­захметов осы лауа­зымға та­ғайын­да­лы­сымен-ақ Шым­кент­те­гі көп жоқтың ор­нын толты­рып берді. Облыс әкі­мі­нің тікелей тапсырмасы бо­йын­ша сәу­лет­шілердің бәрінің басын қо­сып, түрлі салалар бо­йынша конкурс жариялаған. Кә­сіпк­ер­лер­мен келелі кеңес өткіз­генде осы жоба­лар­ды алдарына тартты. “Ха­лық өздеріңіздікі. Қа­ла өзде­рі­ңіздікі. Елде болса ерінге тиеді деген. Биз­нестің әлеуметтік жауапкершілігі аясын­да қандай үлес­теріңізді қоса­сыз­дар?” деген. Кә­сіпкерлер тосы­лып қалды. Қа­пе­лімде қал­таң­дағы ақшаға қол сұғу қиын екен. Об­лыстық депутаттар корпу­сын­дағы жалғыз ха­ным, «Береке-А» кор­пора­ция­сы­ның президенті Раш­күл Ос­панәлиева орнынан тұрып кетті. – Жігіттер, неге тосылып қал­дыңдар? Қаржыны маңдай терімізбен тапсақ та еліміздің, Отаны­мыздың арқасы. Қала көркейіп жатса, бәріміздің мерейіміз ғой. Осылай деген ол бағанадан бері көз қиығымен бағып отыр­ған сәулетті құрылыстың жоба­сы­на қолын созды. Бұл – бүгінгі күнде Шымкент шаһарының шы­­ра­йын ашып тұрған Неке сарайы еді. Қымбаттау тисе де қазақтың қайсар қызы осындай тәуекелге бар­ған. Жігіттер де қарап қал­ма­ды. Бір-бір жобаны меншіктеген. Қазір Шымкент атты кісі түсіп қарай­тындай әсем қалаға айналды. Бизнестің әлеуметтік жауапкершілігі аясында қандай ны­сан­дар салынды дегенге келсек, қыс­қа мерзім ішінде «Даңқ» мемо­риа­лы, «Шәмші әлемі» кешені, Ш.Қалдаяқов ескерткіші, дарын­ды композиторлар мен әнші­лер­дің «Жұлдыздар» аллеясы, Жастар орталығы, Неке сарайы, Даңқ­ты спортшылар және Жас жұ­бай­лар аллеясы, орталық субұр­қақ ашылды. Дендросаябақ ау­ма­ғында жаңа демалыс орны іске қосылды. Қазығұрт, Түлкібас аудандарында спорттық-мәдени сауықтыру кешені, Түркістан қа­ласында Жеңіс саябағы, Отырар ауданында «Батыр аналар» гүл­зары, «Менің Қазақстаным» ал­лея­сы халық игілігіне берілді. – Біздің бизнесіміз тәуел­сіз­дігіміздің алғашқы жылдарынан-ақ Тұңғыш Президентіміздің қалт­қысыз қамқорлығымен көркейіп келеді. Әрине, қиындықтар, күр­де­лі жағдайлар көп кездесті. Со­лар­дың бәрін жеңуде біз Мемлекет басшысының жәрдемін сезініп, жігерленіп жүрдік. Бүгінде «Береке» бүкіл елге белгілі. Автомобиль жолдарын, көпірлер салуда, жалпы, құрылыс бизнесінде алдыңғылар сапындамыз. Маман­дары­мыздың шеберлігін ше­тел­дер­де және өзімізде шың­дай­мыз. «Бизнестің әлеуметтік жауапкершілігі» бағдарламасы бо­йынша да ел алғысына бөлену­де­міз. Қа­ра­пайым халықтың рахметі мен батасын алмай адамның көгеріп, өсіп-өнуі мүмкін емес. Сондық­тан жұмыс істеген ал­ғаш­қы күн­нен бастап мен бұған өзімнің шама-шарқыма қарай көңіл бөліп келемін, – дейді Рәшкүл ханым. Шымкент қаласы, Қазығұрт, Төле би, Сарыағаш және Бәйді­бек аудандарында “Береке-А” кор­пора­ция­сының қайы­рым­ды­лық жұ­мыстарының ізі сайрап жатыр. Мә­селен, «Корпорация «Береке- А» ЖШС Оңтүс­тік Қа­зақ­стан облысы бойынша әлеу­мет­тік жобаларды іске асы­руға 729 553 838 теңге қарас­тыр­ған, оның дені орындалды. Оңтүстіктегі депутаттар кор­пусындағы жалғыз қазақ­ қызы Мұхаммед пай­ғам­бардың хадисінде айты­ла­тындай “қайырым­ды­лық, сауап­ты істер адамды мың түрлі пәле­ден сақтайды” дегеніне осы­лай үлес қосып келе жатыр. Бақтияр ТАЙЖАН. Оңтүстік Қазақстан облысы.