«Шығыс Қазақстан облыстық денсаулық сақтау» мемлекеттік мекемесі өңірде медициналық, әлеуметтік ғимараттардың көптеп салынуына ықпал жасауда.
Атамыз қазақ «дені саудың, жаны сау» деп қалай орынды айтқан. Елбасы Н.Назарбаев Қазақстан халқына Жолдауында адамдардың бос уақыттарын мәнді де сәнді өткізіп, өздерінің денсаулықтарын шыңдауларына көңіл бөлулері қажеттілігін айтқан.
Шығыс Қазақстан облыстық денсаулық сақтау басқармасын өз ісінің білгір маманы Ерлан Масалимов басқарады. Ерлан Тоқтарұлы шаруамыздың барысымен танысқан соң атқарып жатқан істерінен мағлұмат берді.
Өңір басшысы Бердібек Сапарбаев денсаулық сақтау саласын күнделікті назарда ұстап отырады. Соңғы екі-үш жылда облыста бірнеше емхана мен ауруханалар іске қосылды. Бұрын аудан орталығы болған Катонқарағай ауылында күн талабына сай жаңа аурухана пайдалануға берілді. Ол осы заманғы медициналық жабдықтармен және қондырғылармен жабдықталған. Бұрындары ауыл тұрғындары Үлкен Нарындағы орталық ауруханаға немесе шалғайда жатқан облыс орталығы Өскеменге емделу үшін шығынданып сапар шегетін. Облыс орталығындағы ауруханада кезек көп, сондықтан бірден дәрігер қабылдауына тап болу да оңай шаруа емес. Өңір басшысы бұл проблеманы жақсы білетін, сондықтан диагностикалық орталыққа келіп, басшылармен, дәрігерлермен тілдесті, кезекті азайту туралы ойларын ортаға салды. Сөйтіп, кезек мәселесі біртіндеп шешілді.
Ал енді алыстағы ауылдардың тұрғындары облыс орталығына немесе Астана мен Алматыға сабылмас үшін не істеу керек? Ең алдымен, компьютерлік томография және шағын диагностикалық орталықтар ашу қажеттігі туды. Алманияның «Сименс» маркалы компьютерлік томографиясы облыстық ауруханаға орнатылғаннан бері сырқат жандар жүрегі, өкпе-бауыры, асқазан, бүйрегін тексерту мүмкіндігіне ие болды. Аса сапалы қондырғылар сырқат жандардың ауруын тез анықтайды, сосын сол бойынша ем қолданыла бастайды. Сондай-ақ, диагностикалық орталықта магнитті-тербелісті томография да іске қосылып, сырқат жандарды тексеруде.
Шығыс Қазақстанның кейбір аудандары облыс орталығынан шалғайда. Мәселен, Үржар – 600, Зайсан – 500, Мақаншымен іргелес Бақты кедені 700 шақырымда жатыр. Қазіргі таңда адамдардың денсаулығы, оларға жағдай жасау қажеттігі туындағаны белгілі. Сондықтан да, Зырян қаласында шағын диагностикалық орталық ашылды. Бұдан былай Катонқарағай ауданының тұрғындары таяқ тастам Зыряндағы шағын орталықта емделіп, денсаулықтарын түзеуге мүмкіндік алды. Зайсан мен Аягөзде де шағын диагностикалық орталықтар ашылуға әзір. Зайсанға көрші Тарбағатай, Күршім аудандарының, ал Аягөзге Жарма, Үржар аудандарының тұрғындары келіп, тексерістен өту құқығына ие болды. Облыс әкімі сонымен бірге жақында тоғыз реанимобиль көліктерін сатып алуға қаржы бөлгізді.
Үстіміздегі жылы «Жол картасы» бойынша 800 миллион теңге қаржы Күршім, Үржар, Аягөз аудандарындағы ауруханаларға бөлініп, күрделі жөндеу жүргізілді, арнайы жабдықтар мен қондырғылар сатып алынды. Елбасының айтқан тапсырмасы – су тарту, газ орнатып беру мәселелері де назардан тыс қалған жоқ. Мәселен, бірнеше аудандардағы ауруханалар мен емханалар сумен қамтамасыз етіліп, дәрігерлердің балалары балабақшаға орналастырылды.
«Үйі жоқтың күйі жоқ» деп қалай орынды айтылған. Соңғы бір жылда ғана облысқа 138 дәрігер қызметке келді. Қазір білімді де білікті дәрігерлерді ауылдарға шақыру оңай емес. Ең алдымен, олардың тұрмыстық жағдайларын шешіп беру керек. Пәтер болмаса, дәрігерлер ауылдан ат-тондарын ала қашады. Семей, Алматы және Астанадағы дәрігерлік білім беретін жоғары оқу орындарында өзім бірнеше рет болып, еңбекке орналастыру жөніндегі жәрмеңкеге қатыстым, нәтижесі жаман болмады, келсе өкінбейтіндерін айтуға тура келді. Шынында да, бірер жылда жас мамандарға 86 пәтер кілті берілді. Қызметке орналасқан кезде көтермелеу сыйлықтары жасалды. Тек Өскеменнің өзінде дәрігерлерге 48 пәтер берілді, дейді басқарма басшысы.
Ана мен бала бағдарламасы бойынша сәбилердің өлімін азайту жөнінде өңірде арнайы бағдарлама қабылданған. Семейдегі перинаталды орталықта, Зайсан, Аягөз, Зырян аудандарындағы емханаларға 500 миллион теңгенің жабдықтары мен қондырғылары сатып әперілді. Қазір УЗИ барлық жерде орнатылған, қажет кезінде көмек көрсетіледі.
Біздің мекеменің араласуымен бұл күндері Семейде 300 орындық жедел жәрдем көмегі ауруханасының кұрылысы басталды. Сонымен бірге, 80 орындық балаларды туберкулез ауруынан емдейтін аурухана құрылысы да қанат жайды. Өскемен жібек-мата комбинаты қалашығында жаңадан қан тапсыру орталығы құрылысы басталды. Қазір Семейде магнитті-тербелісті томограф жұмыс істеп тұр, ал Өскеменде аталмыш қондырғы жақын арада қойылмақ, дейді сала басшысы.
Оңдасын ЕЛУБАЙ.
Шығыс Қазақстан облысы.