«Театр киімілгіштен басталатынының» мән-мағынасын білсек те, тіршілік атаулы кәдімгі пештен басталатыны даусыз. Осынау өмірлік ғақлия тізгініндегі қарапайым әрі аса қажет іспен айналысып жатқан кәсіпорынның бірі – Бурабайдағы қазандық механикалық зауыты. Ұжымды 30 жыл басқарып, зейнеткерлікке шықса да, қазіргі басшылықтың қалауымен бас конструктор қызметін атқаратын Виктор Кондрашев кәсіпорынның қазіргі атауы «АзияЭнергоПроектМонтаж» ЖШС Щучье өндірістік филиалы деп шұбыртып жатпайтындығы да түсінікті. Жұртшылық баяғыдай атайды. Мәселе онда емес, мәселе мәнде, атқарылған іске сай жұртшылықтың жүрек қабылдауында. Бас директор Марат Ахметов те солай ойлайды. «Әрине, өндіріс орнының өз жоспарлары бар. Бірақ, түпкі мақсат – адамдар жүрегіне жылылық шуағын ұялату», – дейді бүгінгінің басшысы.
Мұның төркіні қайырымдылық қой. Ол үшін қуат керек. Оны түпкі мақсатын түсінген мейірімді жүректер жасайды. Қуат демекші, кез келген сұраныстағы қазандықтарды дайындап, орналастырып беретін, құрылыс материалдары және құрылыс ісімен айналысатын кәсіпорын 2008 жылы 562,9 миллион теңгенің өнімін өндірсе, 2011 жылы көрсеткіш 1020 миллион теңгеден асқалы отыр. Кәспорынның негізгі тұтынушылары қатарында Қорғаныс министрлігі, Ішкі істер министрлігі, Көлік және коммуникация министрлігі, «Қазақстан темір жолы ҰК» АҚ-тың барлығы біраз гәптің бетін ашқандай. Оның үстіне жыл сайын Қызылорда, Семей, Павлодар, Атбасар, Ерейментау, Қаракемер, Астраханка, Құсмұрын, Приозер, Риддер, Курчатов, Қосшы, Первомай қалалары мен Қопа стансасының, Ертіс кенішінің қазандықтарын жөндеу де Бурабай кәсіпорнының мойнында. Алматы, Астана, Ақтөбе, Атырау, Семей, Балқаш, Степногор, Ембі, Щучье, Ганюшкин және басқа қалаларда заманалық қазандықтар орнатылды. Дәл қазір Ақтау қаласындағы мұнай жинақтау пунктінің қазандығы құрастырылып жатыр. Ұжым жаңаөзендіктерге де қол ұшын беруге дайын екендігін білдіруде. Зауытта жұмыс істейтін 220 адамның орташа жалақысы биыл 105,1 мың теңгеге жеткен «АзияЭнергоПроект Монтаж» ЖШС-ның кез келген ұсынысты қабылдай алатыны шүбә келтірмейді. Өйткені, ол бюджетке жарты миллиард теңгеге жуық төлемдер аударып, Бурабай курортты аймағын дамытуға сүбелі үлес қосып отыр.
Щучье қаласының тіршілік ауанын қалыптастырушы кәсіпорын жергілікті билік түзген сан-алуан шараларға белсене қатысады. Зауыт кәсіптік лицейге, интернационалист-жауынгерлер одағына, күрес федерациясына, мешіт пен шіркеуге, соғыс және еңбек ардагерлеріне, ұжымның бұрынғы жұмысшыларына дәстүрлі көмек-қолдау шараларын өткізуді абзал парыз санайды. Есепке келсек, 2008 жылы 881895 теңгенің, 2009 жылы 910485 теңгенің, 2010 жылы 1515679 теңгенің демеушілік көмегі көрсетіліпті. Оның ішінде табиғат апатынан зардап шеккен Алматы облысындағы Қызылағаш ауылының тұрғындарына арналған 335 мың теңге қаржы бар. Ал, биыл жергілікті мешіт құрылысына 533 мың теңге, қарттар айлығын қолдауға 295 мың, ауған соғысы ардагерлерін көтермелеуге 125 мың, Ақмола облысы күрес федерациясын қолдауға 110 мың теңге, ұжым мүшелерінің тұрмыс жағдайын көтермелеуге 250 мың теңге, тағы басқаларын қосқанда 3 миллион теңгеден астам ақшалай қаржы жұмсалыпты.
Іргелі кәсіпорында «Үздік цех», «Үздік маман», «Үздік өндіріс шебері», «Кәсібі бойынша үздік» байқаулары игі дәстүрге айналғанының тәлімдік мәні бар. Іріктеу талаптарының қатаңдығына қарамастан, биыл жергілікті лицейдің алты түлегі ұжым қатарын толықтырды. Бұл да жүрек жылытатын үрдіс.
Бақберген АМАЛБЕК.
Ақмола облысы, Бурабай ауданы.