Мәдени шара жоспары бойынша жоғарыда айтылған жерде қазақ көшпенділерінің қыстағы орын теппек. Ұйымдастырушылардың мәлім еткеніндей, қонақтар сол кездегі технология бойынша жүн тазалап, тоқыма тоқып, шитті және саман кірпіштер құю мүмкіндіктеріне ие болады.
Ғалымдар Жаңғыз төбе және Жұмақ дөңдерінің маңындағы жерлер (қазір ол Самарқан су қоймасындағы арал мен түбек) арғын руынан шыққан Тәтіғұлдың Оразбек, Ниязбек және Тұрлыбегінің қыстаулары болған деген дерек келтіреді. Ал ақсақалдар бұл жерлерде жұрт кем дегенде ХІХ ғасырдың 20-жылдарынан бері қыстап келген дейді.
Мұражай мамандары қыстақты құру барысында көпжылдық ғылыми-зерттеулерді негізге алған. Мысалы, мұнда ішкі жабдықтары бар, төбесі шыммен жабылған үй, малға арналған қора-қопсы орналасады. Сондай-ақ тоқыма тоқитын станок пен жүн тазартуға арналған құрылғылар, ас әзірлейтін алаң: от үстіндегі қазан және самаурын қоятын тұрмыстық орын болмақ.
Қыстақтың тұрмыстық аумағы сол кезеңнен дерек болып қалған суреттерді негізге ала отыра құрылған. Жабдықтың басым бөлігі Теміртау тарихи-өлкетану мұражайынан алынбақшы.
Аталған фестивальға Қарағанды, Теміртау, Абай, Саран және Шахтинск қалаларынан жүзден астам белсенді жас қатысатын болады. Оларға арналып семинар мен тренингтер, интерактивті ойындар мен түрлі викториналар ұйымдастырылады.
«Жауыртаудағы кездесу» фестивалі Теміртаудың 73 жылдығына орай өткізілмек.
Қайрат ӘБІЛДА,
«Егемен Қазақстан»
ҚАРАҒАНДЫ
