ТАЛИБТЕРМЕН БЕЙБІТ КЕЛІССӨЗГЕ КЕЛІСТІ
Ауғанстан президенті Хамид Карзай талибтармен бейбіт келіссөз жүргізуге келісімін беріп, оларға Катарда өздерінің өкілдіктерін ашуға рұхсат етті. Бұл туралы ол кеше жасаған үндеуінде жариялады. Карзайдың сөзіне қарағанда, егер АҚШ әскери топпен байланыс орнатуды қажет деп тапса, онда Кабул бұл қадамға да барады. Бұған дейін Ауғанстан талибтер Катарда өз елінің атынан өкілдік ашуды жоспарлап отырғанын білген соң, сол елдегі елшісін кері шақырып алған еді. Енді Кабул бейбіт келіссөзге шет мемлекеттер араласпайтын болса, өкілдік ашуға кедергі жасамайтынын қуаттап отыр.КИМ ЧЕН ИР ӘКЕСІНІҢ ЖАНЫНА ҚОЙЫЛДЫ
КХДР астанасы – Пхеньян қаласында 17 желтоқсанда көз жұмған ел көсемі Ким Чен Ирмен 3 сағаттық қоштасу рәсімі аяқталды. Рәсім қалың жауған қарға байланысты 4 сағат кейін өткізілді. Қоштасуға көз жастарын көл еткен жүз мыңдаған адам қатысты. Қаралы рәсімде Ким Чен Ирдің «ұлы мұрагері» – кіші ұлы Ким Чен Ын мен күйеу баласы Чан Сон Тхэктің болғаны айтпаса да түсінікті. Сөз жүзінде енді елге билікті Ким Чен Ын жүргізеді делінгенімен, іс жүзінде билік Чан Сон Тхэктің тікелей қатысуымен жүзеге асырылатын болады. Ал Ким Чен Ирдің бальзамдалған мәйіті мавзолейде жатқан әкесі Ким Ир Сеннің қасына қойылды.ЕУРОКОМИССИЯНЫҢ ЕСЕБІНЕ КҮМӘН БАР
Еуропарламент Еурокомиссияға Сербияны ЕО құрамына тезірек қабылдату үшін елде бұған дейін орын алған сот құқығына қатысты фактілер туралы үндеместік танытты деген күдік білдірді. Сөз орайында айта кетсек, Еурокомиссия үстіміздегі жылдың шілдесінде Белградқа Сербиядағы сот жүйесіне баға беру үшін сарапшылар тобын жіберген еді. «Жасылдар» партиясынан еуродепутат Франциска Брантнер еурокомиссарлардан Сербиядағы жағдай туралы ресми есеп сарапшылар деректерімен салыстырғанда не себепті жұмсартылғанын түсіндіруді талап етті. Еуродепутаттың сөзіне қарағанда, есептің шындыққа сәйкестігі Сербияны ЕО-ға қабылдау туралы шешім шығаруда маңызды рөл атқаратын болады.ЖЕҢІЛСЕК ЖЕР КӨТЕРЕДІ ҚАҒИДАТЫМЕН
Ресейдің Орталық сайлау комиссиясы кеше РЛДП-ның серкесі Владимир Жириновский мен РФКП-ның басшысы Геннадий Зюгановты Ресей президенттігінен үміткерлер ретінде тіркеді. Сөйтіп, Ресей басшысы болғысы келетіндер саны әзірше төртеуге жетіп отыр. В.Жириновский президенттік додаға бесінші мәрте түсіп отыр. 1991 және 2008 жылдары ол сайлау нәтижелері бойынша үшінші орынға тұрақтаса, 1996 және 2000 жылдары бесінші орынды қанағат тұтқан еді. Г.Зюганов үш мәрте бағын сынап көрсе (1996, 2000 және 2008 жылдар), әркез мәреге екінші келіп отырыпты. Ал ОСК құжаттарын қабылдағандар қатарында «Яблока» серкесі Г.Явлинский, бизнесмен М.Прохоров, т.б. бар.ҚЫЗЫЛ ТҰРҒЫНДАРЫ МЕКТЕПТЕ ТҮНЕУДЕ
Шығыс Сібірде қуаты айтарлықтай жер сілкінісі тіркелді. Мәселен, алғашқы дүмпуден кейін билік Тыва астанасы – Қызыл қаласының тұрғындарына мектептер мен балалар бақшасында және спорт кешенінде түнеп шығу туралы ақыл-кеңес берген. Алдын ала деректер бойынша, қираған нысандар мен зардап шеккен адамдар жоқ. Хакасия мен Кемеров облысының кеншілері шахталардан дереу шығарылыпты. Ресей төтенше жағдайлар министрі Сергей Шойгу табиғат апатына орай селекторлық мәжіліс өткізген. Жер сілкінісінің магнитудасы (жер астындағы қуаты) 6,7 баллды құраған көрінеді. Ал жер асты дүмпулерінің эпицентрі Қызылдан шамамен 100 шақырым жерде болған.Қысқа қайырып айтқанда:
Аргентина президенті Кристина Фернандес де Киршнер ханымның рак ауруына шалдыққаны белгілі болды. Сырқат медициналық тексеру кезінде анықталған. Енді оған ісікті алып тастау бойынша операция жасалатын болады.
Қырғызстанның Ош қаласының әуежайында Ту-134 ұшағы апатқа ұшырады. Нақтыланған дерек бойынша, 18 адам зардап шексе, 7-еуі ауруханаға жатқызылған. Қалғандарымен, араларында экипаж мүшелері де бар, дәрігерлер мен психологтар жұмыс істеп жатқан көрінеді.
NASA спутнигі Қызыл теңізде жаңа аралдың пайда болу үдерісін суретке түсірген. Арал Йеменнің батыс жағалауларына жақын жерде пайда болыпты. Жалпы, бұл маңда вулкан туындатқан көптеген шағын аралдар бар.
Түркіменстан президенті Гурбангулы Бердымұхамедов елдегі орыс тілді жалғыз газет – «Нейтральный Туркменистан» басылымының бас редакторы Владимир Губановты отставкаға жіберді. Отставканың себебі белгісіз.
Интернет материалдары негізінде әзірленді.