Үш ғасырға жуық уақыт бойы бодандықтың бұғауында болып, осыдан 20 жыл бұрын егемендігін алған еліміздің әр азаматы үшін Тәуелсіздік күні мерекесінің орны айрықша. Бұл күн – ата-бабаларымыз аңсаған арманның жүзеге асқан, кеудесін мақтаныш кернеп мерейі тасқан, елімізге еркіндік сыйлаған Ұлы күн. Міне, кең байтақ қазақ даласында аспанкөк туымыздың желбірегеніне 20 жыл толды. Жиырма жылда еліміз жүз жылға татитын жұмыс жасады. Әлеуметтік-экономикалық реформалар, индустриялық-инновациялық даму қарқыны өз нәтижесін берді. 46 конфессия мен 130-дан астам этностың ортақ ордасы болып отырған елімізде береке-бірлік, татулық қалыптасқан. Тәуелсіздіктің туын биік көтеріп келе жатқан Елбасы халқымызды қыспаққа ұрындырмай, ұлы жолға бастап келеді. Ол елімізді баянды бақытқа жетелейтін азаттық жолы.
Аудан жұртшылығы жыл сайын Тәуелсіздік күнін үлкен қуанышпен мерекелейді. Аудан орталығындағы мерекелік іс-шаралар Мойынқұм ауданының әкімі Сәкен Арубаев пен Желтоқсан оқиғасының құрбаны, ««Халық Қаһарманы»» Қ.Рысқұлбековтың анасы Дәметкен Асанбаеваның мекеме-ұйым басшыларының Желтоқсан көтерілісі ерлерінің бірі, ««Халық Қаһарманы»» Қ.Рысқұлбековтің Жастар саябағындағы ескерткішіне гүл шоғын қоюдан бастады. Көпшілік қатысқан митингіде аудан әкімі Сәкен Арубаев сөз сөйледі.
1986 жылғы Алматыдағы Желтоқсан оқиғасы кемерінен асып тұрған шовинистік отаршыл саясатқа қазақ халқының қарсылығынан туындаған еді. Біздің жерлесіміз, «Халық Қаһарманы» Қайрат Рысқұлбеков қатарында болған бұл көтеріліс Кремль билеушілеріне қарсы үн қатқан жастарымыздың жалынды дауысы жаңа заманға жол ашты. Қайрат Рысқұлбеков Желтоқсан оқиғасының бас қаһарманы ғана емес, ауыртпалығын арқалаған бас құрбаны, қыршын жас Қайраттың есімін бүгінде бүкіл қазақстандықтар құрметтейді. Қашанда зұлымдықты әділдік жеңумен келеді. Бұл жолы да әділдік салтанат құрып, тарих таразысы бәрін өз орнына қойды.
Елбасымыз Н.Ә. Назарбаевтың кемеңгерлігі мен сарабдал саясатының арқасында біз бүгін тек тәуелсіз ел болып қана қоймай, әлем елдері мойындаған іргелі мемлекетке айналып отырмыз. Тәуелсіздікке қол жеткізуден гөрі, оны сақтап тұру бағасы қымбат. Сондықтан біздер кешегі тәуелсіздік жолында жанын қиған ардаларымыздың асыл армандарын ақиқатқа айналдырып қана қоймай, баянды етуге тиіспіз.
Біздің алдымызда тұрған Қайраттың өжет бейнесі бүкіл жастарымызды Тәуелсіздік жолында ерлік істерге шақырып тұрғандай сезінеміз. Ол барша қазақ жастарының аяулы тұлғасына айналарын тіршілігінде біле алған жоқ. Ол азаматтық іс атқарды, намыс пен ар-ожданның тапталуына жол берген жоқ. Қайрат біз үшін мәңгі тірі, мәңгі жасай береді, – деп түйіндеді сөзін аудан басшысы.
Ал аудандық ардагерлер кеңесінің төрағасы, ауданның Құрметті азаматы Жашаралы Қойгелдиев Желтоқсан оқиғасы, ел бірлігі, өрімдей жас жігіттер мен қыздардың шовинистік көзқарастағы тоталитарлық жүйеге қарсылығы жайында айтса, Қайраттың анасы Дәметкен Асанбаева жастарға Қайраттың ержүректігін, намысшылдығын берсін, еліміздің айтулы азаматтары болыңдар, деген ізгі аналық тілегін жеткізді.
Тәуелсіздік күніне арналған мерекелік шара Абылайхан алаңында жалғасты. Шара барысында аудан басшысы Тәуелсіздіктің 20 құрдасына естелік сыйлық, әлеуметтік жағынан аз қамтылған 20 отбасыға қайырымдылық пакетін тапсырды. Әрі қарай мерекелік іс-шара аудандық мәдениет үйі өнерпаздарының концертіне ұласты.
Сол күні түс қайта аудан әкімі Сәкен Арубаев бастаған аудан басшылары Желтоқсан оқиғасының құрбаны, «Халық Қаһарманы» Қайрат Рысқұлбековтың туған ауылы Бірлікте болып, Қайраттың ескерткішіне гүл шоғын қойды және мерекеге жиналған қауымды өзге мерекелерге қарағанда шоқтығы биік ел Тәуелсіздігінің 20 жылдығымен құттықтады.
Жолдыбай ДӘМЕТОВ, журналист.
Жамбыл облысы, Мойынқұм ауданы.