Астанадағы Л.Н.Гумилев атындағы Еуразия ұлттық университеті «Алаш» мәдениет және рухани даму институты көрнекті Алаш қайраткері, ғалым, алғашқы математика оқулығы авторларының бірі Ә.Ермековтің туғанына 120 жыл толуына орай «Тәуелсіз Қазақстан және Әлімхан Ермеков мұрасы» атты ғылыми-практикалық конференция өткізді. Ғылыми жиынды ұйымдастырушылар Алаш Орданың және қазақ зиялыларының ұлт тарихындағы, тәуелсіздік пен білім-ғылым бастауындағы миссиясын қайраткер, ғалым Ә.Ермековтің мұрасы арқылы зерделеуді мақсат еткен. Конференцияға академик Мұхтарбай Өтелбаев, Адам құқықтары жөніндегі өкіл Асқар Шәкіров, жазушы Алдан Смайыл, Ұлттық мұрағаттың бас директоры Марат Әбсеметов және басқа да ғалымдар мен мамандар қатысып, баяндама жасады. Танымал ғалымдардың тәуелсіздік үшін күрескен, қазақ жерінің тұтастығын большевиктер көсемі В.И. Лениннің алдында дәлелдей алған азамат-тұлға туралы жан-жақты ойлары елорда зиялыларына, студент қауымына ерекше әсер етті.
Шара барысында Әлімхан Ермековтің немересі Олег Мағауияұлы бастаған Алаш тұлғаларының ұрпақтары естеліктер айтты. Қайраткер сөзінің түпнұсқа мәтіні хатталған аудиожазба тыңдалынды.
Ғылыми жиын қорытындысында Алаш қайраткері, алғашқы математиктердің бірегейі Ә.Ермековтің аты мен еңбегін республика және елорда көлемінде ұлықтау, еске алу туралы қарар қабылданды.
«Егемен-ақпарат».
