Халықтың әлеуметтік жағдайын жақсарту жолдары ұсынылды. Президент ІЖӨ-нің 10%-ін білім, ғылым және денсаулық сақтау саласына бағыттап, бұрын-соңды болмаған шешім қабылдады. Айтулы Жолдау әлеуметтік бастамаларды жүзеге асыруда «әлеуметтік мемлекет пен ұлттық әл-ауқаттың қазақстандық үлгісін» құру идеясын әрі қарай дамытуға жол ашады.
Бүгінде жастарға ғаламдық өлшеммен білім беру мәселелері стратегиялық маңызға ие. Еңбек нарығын қанықтыра отырып, оның бәсекеге қабілеттілігін қамтамасыз ету де аса маңызды. Елбасының пікірінше, экспортқа бағытталған индустрияландыру экономикалық саясаттың басты элементі болуы керек. Осы стратегияны іске асыру үшін экономиканың әртүрлі секторларына жан-жақты білім алған, келешекті кеңінен ойлайтын, отансүйгіштік қасиетке ие жалынды жастарды тарту аса қажет.
Мемлекет басшысы баламалы энергетика, биомедицина, ауыл шаруашылығы, IT-технологиялар саласындағы ғылыми зерттеулерді жандандыру арқылы экономиканың инновациялық әлеуетін дамытудың маңыздылығын түсіне отырып, осы мақсатқа қосымша 100 млрд. теңге бөлді. Бұл жоғары оқу орындарының ғылымы үшін қолданбалы зерттеулерді кеңейтіп, олардың нәтижелерін экономикада сынақтан өткізіп, жүзеге асыруға зор мүмкіндік туғызады.
Елбасы Үкіметке халық денсаулығын жақсарту мақсатындағы кезек күттірмейтін мәселелердің оң шешім табуын тапсырды. Саламатты өмір салтын қалыптастыру – денсаулық кепілі. Осы тұрғыда Мемлекет басшысы қазақстандық оқушылардың қоғам үшін маңызды денсаулығына, қабілеттеріне және болашағына мұқият қарау туралы өз ойын білдірді. Әр баланың жүрегіне жол табу арқылы, олардың білім алуына жағдай туғызу арқылы жас өскіннің әлеуетін ашуға болады. Президентіміз қай кезде де ұстаздар қауымына қолдау танытып келеді, осы Жолдауда да мұғалімдердің кәсіби тұрғыдан шыңдалуына баса назар аударды. Алдағы уақытта Мемлекет басшысының бастамасы бойынша «Мұғалімнің мәртебесі туралы» Заң қабылданатын болады, ол бұл мамандықтың қоғамдағы беделін арттырып, ең тәжірибелі, дарынды, өзіндік көзқарасы қалыптасқан мақсаткер жас мамандардың күшті ағынын қамтамасыз етеді.
Бүгінгі күні жұмыс берушілердің сауалнамасы негізіндегі рейтингтік көрсеткіштер мен жоғары оқу орнын тәмамдаған түлектердің жұмысқа орналастырылуындағы талдаулар университеттің қызметін бағалауда зор маңызға ие. Аталған рейтингке бір ғана мысал, ««Атамекен» ҰКП және Қазақстан Республикасы Білім және ғылым министрлігінің бірлескен жұмысының аясында жүргізілетін рейтинг бойынша Е.А. Бөкетов атындағы Қарағанды мемлекеттік университеті Халық шаруашылығы университеті (Жаңа экономикалық университет) және ҚБТУ-мен қатар өз мамандықтарының сапасы, өзектілігі мен заманауилығы бойынша ең жоғары баллдарды көрсете отырып, қазақстандық жоғары білім көшбасшыларының қатарына енді. Университет ұжымы Елбасының Жолдауын басты назарда ұстай отырып, жұмыс берушілермен қарым-қатынас жасау арқылы түлектерді табысты жұмысқа орналастыру жолдарын анықтап, бәсекеге қабілетті білім беру бағдарламаларын енгізу арқылы қызметтің осы бағытын нығайтады.
Отандық жоғары оқу орындары үшін Қазақстанда табысты жұмыс істейтін инновациялық университеттердің тәжірибесін жинап, қолдануға мүмкіндік зор. Еліміздегі жоғары мектептің көшін бастап тұрған Назарбаев Университетімен Е.А. Бөкетов атындағы Қарағанды мемлекеттік университеті арасындағы нәтижелі байланыс заманауи білім беру технологиялары мен бағалау әдістерін білім ордамыздың жұмыс тәжірибесіне енгізуге мүмкіндік туғызды. Аталған жұмыстың оң нәтиже берері хақ, бұл білімді бағалаудың объективтілігін арттырып, білім алушылардың өзіндік жетістіктерін ескере отырып, оқу үрдісін ұйымдастырудағы ашықтықты көрсетеді.
Президенттің бастамалары сондай-ақ, жеңілдікті шағын несие арқылы халықтың кәсіпкерлік белсенділігін дамытуға ықпал етеді. Президенттің кредиттік қаражатты пайдалану тиімділігі туралы алаңдаушылығы терең экономикалық талдауға негізделеді. Көптеген жағдайларда қаржы қаражаттарын тиімсіз пайдалану себептері өз бизнесін ұйымдастырғысы келетін адамдардың кәсіпкерлік сауаттының аздығынан орын алады. Жастардың кәсіпкерлік дағдыларын қалыптастыру – «Құқық негіздері және кәсіпкерлік» оқу пәні аясында стартап қозғалысқа студенттерді тарту арқылы Қарағанды мемлекеттік университетімен бірге сәтті шешімін тапқан міндеттердің бірі. Университетте стартап жобаларға қатысу арқылы мол тәжірибе жинаған студенттеріміз болашақта өз істерін бастайды деп сенеміз.
Президент Жолдауында қазақстандықтардың өмір сүру сапасын жақсарту, өңірлердің, қалалар мен ауылдардың әлеуметтік инфрақұрылымын дамыту бастамаларына басымдылық берілген. Мемлекет азаматтардың жарқын болашаққа бастайтын бастамаларын қолдауға дайын. Жоғары оқу орындары жас ұрпақтың әлеуметтік жауапкершілігін қалыптастыра отырып, сапалы білім беруді басты бағдарда ұстайды. Елбасының кезекті Жолдауы да мемлекетіміздің тұрақты даму жолындағы сындарлы, сарабдал саясатына серпін бере отырып, ел игілігін еселейді.
Еркін КӨБЕЕВ,
Е.А. Бөкетов атындағы ҚарМУ-дың ректоры,
Қарағанды облыстық мәслихатының депутаты
ҚАРАҒАНДЫ
