Биылғы жыл Қалибек Қуанышбаев атындағы Қазақ музыкалық драма театры үшін де табысты жыл болды. Президенттің шешімімен бұл өнер ордасына академиялық театр мәртебесі берілді. Тәуелсіздіктің төл құрдасы Қаллеки театрының ұжымы, осынау аз жылдардың ішінде көптеген жетістіктерге қол жеткізді.
Театр тарихы 1991 жылдың 15 қарашасында Жақып Омаров сахналаған Ғ.Мүсіреповтің «Ақан сері – Ақтоқты» қойылымынан басталды десем, өнер ұжымы осы аз ғана жылдың ішінде көптеген белестерді бағындырып үлгерді.
Тәуелсіздік мерекесі қарсаңында ғана академиялық мәртебеге ие болған Қ.Қуанышбаев атындағы музыкалық драма театры осы жаңа жыл қарсаңында тағы бір қуанышқа куә болды. Театрдың үш бірдей әртісі Мейрам Қайсанов, Нүркен Өтеуілов, Алтынай Нөгербек Қазақстанның еңбек сіңірген қайраткері атағын алса, Гүлжан Әспетова «Құрмет» орденімен марапатталды. Ал енді осы қос қуанышқа орай, өнер ұжымының белсенді өкілдеріне сөз кезегін берелік.
Жұмагүл ҚУАНЫШБЕКҚЫЗЫ, «Егемен Қазақстан».
* * *
Тілектес МЕЙРАМОВ, Қазақстанның халық әртісі: Қаншама жылдан бері осы өнердің қазанында қайнап келеміз. Кезінде Ж.Омаров іргетасын қалаған, Әзекеңдер қолтаңбасын қалдырған бұл киелі шаңыраққа академиялық мәртебе берілуі заңдылық деп білемін. Елбасымызға, әртістердің әр қадамын қадағалап, өнеріне баға беріп отырған қала әкімі Иманғали Тасмағамбетовке айтар алғысымыз шексіз. Мәдениет министрі М.Құл-Мұхаммед мырза да мәдениетіміз бен өнеріміздің даму жолында аянбай еңбек етіп келе жатқан жандардың бірі. Сондай-ақ, 3 жылдан бері театрымыздың мәртебесін көтеруге жанын салып қызмет етіп келе жатқан Еркін Жуасбекке де мың алғыс.* * *
Гүлжан ӘСПЕТОВА, Қазақстанның халық әртісі: Еңбегің еленіп, халықтың бағасын алып жатқанына не жетсін. 20 жылдық тарихы бар осынау өнер ордасының осындай мәртебеге ие болуы бүкіл қазақ халқының қуанышы деп білемін. Иә, бұл осы театр ұжымының күндіз-түні төккен маңдай терінің ақысы.* * *
Лейло Бекназар-ХАНИНГА, Қазақстанның еңбек сіңірген қайраткері, профессор: Халық қаһарманы Ә.Мәмбетов осында келгенде, біз де жолдасым екеуміз ол кісімен бірге келгенбіз. Одан бері де 12 жыл өтті. Әзекең театрдың осы мәртебеге ие болатынына нық сенетін. Тәубе, театр биік деңгейге көтерілді. Дүниежүзілік, халықаралық конкурстарға қатысып, үлкен олжаларға ие болды. Соңғы 3 жылда театрымызды театр сыншысы Е.Жуасбек басқарып отыр. Осындай өнер адамының басқаруынан кейін театр өзінің екінші тынысын ашқандай болды. Әрбір қойылған спектакльге, әрбір ойналған образға анализ жасалынуы, талқылануы ұжымды жаңа ізденіске жетелеп отыр. Енді көрермен мол сиятын театр ғимараты болса, ұжымның жоғы түгенделер еді деген ойымды да осы қуаныш үстінде жасырғым келмейді.* * *
Болат ҰЗАҚОВ, режиссер, Қазақстанның еңбек сіңірген қайраткері: Біз үлкен қуаныштың үстінде отырмыз. Академиялық мәртебе жыл сайын немесе 10 жылда бір беріп отыратын атақ емес. Бұл 50 жылда, 70 жылда жететін дәреже. Қазақстан Тәуелсіздігімен бірге өсіп келе жатқан театрымыз үшін бұл үлкен баға! Шынайы көзқараспен қарағанда, театрдың осы дәрежеге лайық болуында шығар. Республикалық, халықаралық фестивальдарда жоғары жүлделерге ие болып жүргені ұжымның мүмкіндігі өте жоғары екенін көрсетеді. Театрдағы аға буыннан бастап, орта буын жастар Астанамен бірге өсіп-өніп жатыр. Осының айқын айғағы үш әртісіміздің Қазақстанның еңбек сіңірген қайраткері атағын алуы дер едім. Иә, айтса айтқанда й, тәуелсіз елімізбен бірге өсіп-өркендеп келе жатқан астаналық театрдың қол жеткізген биігі аз емес. Әйтсе де академиялық деген атағына сай алар асуы, шығар биігі алда деп білеміз. Ләйім, солай болғай!
