Ел Тәуелсіздігінің 20 жылдығына орай Түрксібтің бел баласы, Үштөбе қаласының байырғы тұрғыны, Алматы облысындағы қазіргі бірден-бір көзі тірі Кеңес Одағының Батыры, «Қаратал ауданының құрметті азаматы», «Құрметті теміржолшы» Иван Васильевич Косенков «Қазақстан Республикасының Тәуелсіздігіне – 20 жыл» мерекелік медалімен марапатталды. Осылайша хас батырдың омырауындағы егемендікке қол жеткен тәуелсіздік жылдары иеленген «Құрмет» ордені мен «Ерен ерлігі үшін» медалінің қатары тағы бір айшықты наградамен толыға түсті. Бүгінгі таңда толықтай мемлекет қамқорлығына алынған ерен ерге Үкімет наградасын Қаратал ауданының әкімі Сұлтан Дүйсенбінов салтанатты жағдайда табыстап, қарт майдангерге зор денсаулық, қажымас қайрат тіледі. Өз кезегінде даңқты батыр өзіне жасалып отырған тұрмыстық жағдайға, Елбасының сарабдал саясатына аталық ризашылығын білдірді
Өткен ғасырдың 1941-1945 жылдары адамзат баласына қисапсыз қайғы-қасірет әкелген Отан соғысына бастан-аяқ қатысып, жалындаған от пен ысқырған оқ көрген аға буынның суарылған құрыштан да бетер болып жаратылған өкілі бүгінгі таңда сексеннің сеңгіріне шықса да өзін сергек сезінеді. Хақ Тәңірінің шарапаты тиіп, ұзағынан сүйсіндіре берсе, батыр ағамыз араға екі жыл салып (1923 жылы туған) тоқсан деген асуды да бағындырғалы тұр. Шағын қала – Үштөбенің ғана емес, күн шұғылалы Қазақстанның мақтанышы саналатын Иван Косенковтың өнегелі өмір жолы жастарды отансүйгіштікке және патриоттық рухта тәрбиелеудің жарқын мысалы, ізгі көрінісі бола алады.
Қараша ҚАРАМАН.
Алматы облысы, Үштөбе қаласы.