Фестиваль барысында Ақмола облыстық «КÓKSHE» телеарнасының «Родина» агрофирмасы» жауапкершілігі шектеулі серіктестігінің директоры, Қазақстанның Еңбек Ері Иван Адамович Сауэр туралы түсірген «Рожденный, быть успешным!» телеочеркі жүлделі орынға ие болып, арнайы дипломмен марапатталды. Жас журналист Юрий Обердиенконың телешығармасында есімі елімізге кеңінен танымал осы бір іскер басшының ауыл шаруашылығы саласындағы ерен еңбегі туралы әсерлі әңгіме өрбіп, әйгілі агроөнеркәсіп кешенінің бүгінгі тыныс-тіршілігі сәтті бейнеленеді.
Жыл сайын ТМД елдері және шетелдік телевизиялық компаниялар арасында өткізілетін халықаралық байқау биыл тұңғыш рет Ташкент қаласында ұйымдастырылды. Байқауға 12 елден 13 шығармашылық жұмыс іріктеліп алынған. Солардың ішінде топ жарып, байқау жүлдегерлері қатарынан көріну жалғыз «КÓKSHE» телеарнасы емес, бүкіл ақмолалық бұқаралық ақпарат құралдары үшін үлкен мерей деп білеміз. Жүлде құтты болсын, қымбатты әріптестер!
Байқал БАЙӘДІЛ,
«Егемен Қазақстан»
Ақмола облысы
