Қазақстан Президенті екі ел арасындағы өзара байланыстардың достық сипатын атап өтіп, оны одан әрі дамыту қажеттігін айтты.
«Президент мырза, Cіз ЭКСПО-2017 халықаралық көрмесіне арнайы келіп, бізге қолдау көрсеттіңіз. Ал бүгін Әлемдік және дәстүрлі діндер көшбасшыларының VI съезіне қатысу үшін Қазақстанға ресми сапармен келдіңіз. Мұның бәрі біздің елімізге деген сіздің нағыз достық ниетіңізді білдіреді. Біз мұны жоғары бағалаймыз», деді Н.Назарбаев.
Мемлекет басшысы екіжақты экономикалық қатынастарды ілгерілету мүмкіндіктеріне арнайы тоқталып, бірқатар салаларды жандандыруға мүмкіндік мол екенін жеткізді.
«Менің Сербияға сапарым барысында қол жеткізілген уағдаластықтарға сәйкес логистика, көлік және коммуникация, қорғаныс өнеркәсібі, ауыл шаруашылығы, фармацевтика және құрылыс салаларында ынтымақтастығымызды кеңейту қажет. Сіздің бүгінгі сапарыңыз өзара ықпалдастығымызды жаңа деңгейге көтеруге мүмкіндік береді», деді Елбасы.
Кездесу барысында Нұрсұлтан Назарбаев Қазақстан Республикасы мен Сербия Республикасы арасында достық пен ынтымақтастықты және бейбітшілікті нығайтуға қосқан үлесі үшін Александр Вучичті І дәрежелі «Достық» орденімен марапаттады.
«Сербия барлық халықаралық мәселелерде бізді қолдап келеді. Біз де Сербия тарапына қолдау білдіреміз. Осынау достық қарым-қатынастарды ескере келе, Сізді шетелдік дипломаттарға арналған ең жоғары награда – бірінші дәрежелі «Достық» орденімен марапаттау туралы Жарлыққа қол қойдым», деді Елбасы.
А.Вучич өз кезегінде Н.Назарбаевқа қонақжайлылық көрсетіп қарсы алғаны үшін және халықаралық аренада Сербияға жан-жақты қолдау білдіргені үшін ризашылығын жеткізді. Елбасының екі ел арасындағы екіжақты қарым-қатынасты дамытудағы рөлін атап көрсетті. Сонымен қатар Қазақстан Президентін ең жоғары мемлекеттік деңгейдегі І дәрежелі «Сербия Республикасының Орденімен» марапаттады. Айта кету керек, мұндай құрметке Ресей Президенті Владимир Путин мен Қытай Төрағасы Си Цзиньпинь ғана ие болған.
Екіжақты келіссөздерден кейін мемлекеттер басшылары ресми сапар қорытындысы бойынша бұқаралық ақпарат құралдары өкілдері үшін брифинг өткізді.
Қазақстандық және шетелдік БАҚ өкілдері алдында сөйлеген сөзінде Елбасы Сербия Президентіне Қазақстанға алғаш рет ресми сапармен келгені үшін ризашылық білдіріп, екі ел арасындағы ынтымақтастықтың даму қарқынын ерекше атап өтті.
Н.Назарбаев бүгінгі өткен келіссөздер нәтижесінде қол жеткізілген келісімдерге тоқталып, «Біздің жоғары деңгейдегі кездесулеріміз тараптардың өзара байланыстарды дамытуға мүдделі екендігін білдіреді. Ең алдымен, бұл – сауда-экономика саласындағы кооперацияны одан әрі ілгерілету. Елдеріміздің экономикасы бірін-бірі толықтырып тұрады. Жеткізілетін өнімдер түрлерін кеңейтуге дайынбыз», деді.
Мемлекет басшысы Қазақстан мен Сербия арасындағы қатынастарды одан әрі ілгерілететін басым бағыттарды да атады.
«Біз Сауда-экономикалық ынтымақтастық жөніндегі үкіметаралық комиссия алдына жаңа міндеттер қойдық. Жақында бұл комиссияның екінші отырысы өтті. Онда басым бағыттар айқындалды. Олар – ауыл шаруашылығы, өнеркәсіп, құрылыс, көлік, энергетика және басқа да салалар. Біз Азия мен Еуропа арасында жүк тасымалын жеделдету үшін тиісті инфрақұрылым қалыптастыруға мүдделіміз», деді Елбасы.
Қазақстан Президенті қазіргі уақытта Еуразиялық экономикалық одақ пен Сербия арасындағы еркін сауда аймағын құру үшін сараптамалық келіссөздер жалғасып жатқанын атап өтті. Сондай-ақ келіссөздер барысында өңірлік және халықаралық саясат мәселелері талқыланғанын айтты.
Соңында Мемлекет басшысы Әлемдік және дәстүрлі діндер көшбасшыларының VI съезіне қатысуға шақыруын қабыл алғаны үшін Сербия Президентіне ризашылық білдірді.
Өз сөзінде А.Вучич қонақжайлылық көрсеткені үшін Н.Назарбаевқа алғыс айтып, келіссөздердің жемісті болғанын атап өтті.
«Меніңше, Орталық Азияда Астана сияқты қарқынды өзгеріп әрі өркендеп келе жатқан қала жоқ. Президент Назарбаевтың және оның көрегендігінің, күш-жігері мен іске берілгендігінің арқасында Қазақстанның қол жеткізген жетістіктері мені таңғалдырады. Сіздердің «Қазақстан-2050» стратегиясында белгілеген мақсаттарыңызға жететіндеріңізге кәміл сенемін», деді А.Вучич.
Сербия Президенті екі ел арасындағы сауда-экономикалық ынтымақтастықтың маңыздылығын айтып, оны әрі қарай күшейту үшін зор әлеуеттің бар екенін атап өтті.
«Келешекте ынтымақтастығымызды нығайта түсіп, тауар айналымымызды арттыратындығымызға сенімдімін. Өйткені екі ел арасындағы байланысты нығайта түсуге мол мүмкіндік бар. Алдағы уақытта Белградта Қазақстан елшілігін ашсаңыздар, қуанышты болар едік. Бұл – біздің үлкен өтінішіміз», деді Сербия Президенті.
Сонымен қатар Сербия Республикасының Президенті екі мемлекеттің халықаралық деңгейде бір-біріне өзара қолдау көрсетуін нығайту қажеттілігіне тоқталды.
Айта кетейік, Сербия басшысы Қазақстан Президенті Н.Назарбаевтың шақыруымен ресми сапармен келіп отыр. Сапар аясында Александр Вучичтің Қазақстан-Сербия іскерлік форумына, Әлемдік және дәстүрлі діндер көшбасшыларының VI съезінің ашылуына қатысуы жоспарланған.
Абай АСАНКЕЛДІҰЛЫ,
«Егемен Қазақстан»