30 Желтоқсан, 2011

Өз тауарларымыз көбейе түсті

292 рет
көрсетілді
4 мин
оқу үшін
11 айда шағын және орта бизнес субъектілері өндірген өнім көлемі 2,5 пайызға артты. Кәсіпорындар саны Қазақстанда 2011 жылдың қаңтар-қазан айларында 4,2 пайызға ұлғайды. Бүгінде елде белсенді жұмыс істейтін ШОБ субъектілері саны 695 635 бірлікті құрайды. Мұндай тенденция, халықаралық сарапшылардың айтуынша, елдегі бизнес-ахуалдың жақсаруынан пайда болған. Барлығы тәуелсіздік жылдарында шағын және орта бизнес субъектілері 35 еседен астамға артты, деп атап өтті Президент Нұр­сұл­тан Назарбаев 15 желтоқсанда Тәуелсіз­діктің 20 жылдығына арналған салтанатты жиналыста. 1993 жылғы 19 мыңнан 2011 жылы 671 мыңға дейін ұлғайды. Біздің 2 миллионнан астам азаматтарымыз осы салада өздеріне жұмыс тапты. Соңғы 10 жылда экономиканың осы секторының шығарған өнімдері 20 есе өсіп, бүгінде 7 триллион теңгені құрайды. Биыл Бүкіләлемдік банктің рейтингінде Қазақстан бизнес жүргізуде, ТМД-ның бүкіл елдерін артқа қалдыра отырып, құрметті 47-ші орын алды, деді Мемлекет басшысы. Бүкіләлемдік банк пен Халықаралық қар­жы корпорациясының бағалауы бойынша, «Биз­несті жүргізу-2012» рейтингінде Қазақ­стан шетел инвесторлары үшін Орталық Азиядағы неғұрлым тартымды ел болып та­былады. «Қазақстан мүдделі жақтар арасын­дағы мәмілелерді қуаттауға қатысты талап­тарды өзгертіп және мүдделі жақтар ара­сындағы мәмілелерден олқылық шыққан жағ­дайда талап-арыз беру үдерісін жеңілде­тіп, инвесторлар құқын қорғауды күшейтті», делінген Бүкіләлемдік банктің баяндама­сында. Еліміз 11 сатыға көтеріліп, 47-ші орын алды – бұл ТМД елдері арасындағы ең жақсы көрсеткіштердің бірі. «Doing Business» рейтингінде кәсіпкерлік қызметті реттеу және инвесторлардың құқықтары мен мүдделерін қорғау жөніндегі реформаларды енгізуге, сол сияқты 183 елдің жергілікті компанияларына ықпал ететін реттеуші нормаларға баға беріледі. Бүтіндей алғанда, көптеген позициялар бойынша, тіпті салық салу мен әкімшілендіру сияқты бөлік­те де оң нәтижелер алынды, деді Кәрім Мәсімов 15 қарашадағы Үкімет отырысында. Сонымен бірге, ол екі индикатор бойынша Қазақстан позициясының жоғары емес екенін атап өтті. Жүргізілген жұмыстарға қара­мас­тан «Құрылысқа рұқсат алу» және «Халық­аралық сауда» индикаторлары бойынша республика тиісінше 147 және 176-шы орындар алады. Құрылыс және тұрғын үй-коммунал­дық шаруашылық істері агенттігі базасында топ құрып, құрылыс бойынша қомақты нәтижелерге жетуіміз үшін түбе­гейлі шаралар қабылдау қажет, деді Үкімет басшысы. Ол нәтижелерді жақсарту үшін белгілі бір ұсыныстар әзірлеп, енгізу жөнінде Эконо­микалық даму және сауда министрлігіне Қаржы министрлігімен бірлесе жұмыс істеуді тапсырды. Оның сыртында Қаржы министрлігіне ең қысқа мерзімде электронды декларацияға көшуді жүктеді. Бүгінде Қазақстанда кәсіпорындар өнді­ре­тін өнімдер көлемі 2,5 пайызға артты, бұл жөнінде Экономикалық даму және сауда министрі Қайрат Келімбетов 28 желтоқсандағы Үкіметтің қорытынды отырысында хабар­лады. Кәсіпкерлік дамуының неғұрлым жақсы көрсеткіштері Солтүстік Қазақстан, Қостанай, Ақмола облыстарында байқалады, деді ол. Сонымен бірге, Астанада қаланың статистика департаментінің мәліметтері бойынша, рынокта белсенді жұмыс істейтін шағын және орта кәсіпкерлік субъектілерінің саны 2011 жылдың 1 желтоқсанына қарасты 44,4 пайызға артып, 38926 бірлікті құраған. Соң­ғы 2 жылда Астанада шағын кәсіпорындар­дың 10,8 мың, белсенді кәсіпорындардың 7,4 мың бірлікке төмендеу динамикасының байқалып отырғанын атап көрсету қажет. Статистика агенттігінің мәліметтері бойын­ша оңтүстік Астанадағы белсенді жұмыс  істейтін кәсіпорындар саны тіркелген кәсіп­орындардың 50,2 пайызын құрайды. Зарина КӘРІМОВА.