Сан ғасыр еркіндік, бостандық жолында қилы-қилы заман өткізген ата-бабаларымыздың аруақтары риза болып жатқан шығар. Сол тәуелсіздікке жеткен бүгінгі ұрпақ соны сезіне отырып, Көк байрағын қолына берік ұстап өсіп-өркендеу, даму жолына өмірін арнауы керек деп білемін. Бұл жолда Елбасымыз Нұрсұлтан Назарбаев ерекше үлгі-өнеге көрсетуде.
Тәуелсіздіктің 20 жылдығы кең түрде тұрмыс-тіршіліктің қай саласында болмасын үлкен жетістікпен аталып өткенін көзіміз көрді. Мерейлі мереке, ұлы той болып өткені әр қазақстандықтың көңіліне нәр, бойына қуат қосқаны сөзсіз. Тәуелсіздікке арналған салтанатты жиында сөйлеген Н.Назарбаев еліміздің әлеуметтік-экономикалық, мәдени-ғылыми дамуына, Қазақстан халқының бірлігі мен ынтымағының нығаюына баса назар аударып, болашағымыздың бағыт-бағдарын айқындап берді. Төбең көкке жеткендей, көңіл-күйің өсіп көтеріліп қалады екенсің.
Жиырма жылда тәуелсіздікті баянды етіп, іргемізді бекітіп алу жеңіл өтті демесек керек. Әр түрлі қиындықтар, кедергілер, зиянкестіктер аз болған жоқ. Экономикалық-әлеуметтік және саяси қиыншылықтар да кездесті. «Алысқа сілтеп сонша қайда барады?» деп одырайғандар да болмай қалған жоқ. Осының бәрін жеңе отырып, еңселі ел, мықты мемлекет дәрежесіне жеткенімізді қалай мақтаныш етпей тұра аламыз. 1991 жылдың өзінде Қазақстан Республикасы аталуы, оның Мемлекеттік тәуелсіздігі туралы Конституциялық Заң қабылдануы, Мемлекеттік рәміздері – Елдің Туы, Елтаңбасы және Әнұранының қабылдануы естен кетпес ерекше құбылыс.
Қазақстанның Тәуелсіз елге, дербес мемлекетке айналғанына әлемдегі айтулы мемлекеттер де көз тігіп, мойындап отыр. Әрі тәуелсіздігінің қауіпсіздігіне кепілдік берді. Демек, олармен терезесі тең ел қатарына қосылғанымыз осы емес пе.
Міне, аса мақтанарлық зор дәрежеге жетуімізге Елбасының басшылық жасап, қиын да күрделі жылдарда елін соңынан ерте біліп, мол жетістіктерге жеткізуі көңілімізді көркейтеді. Алдағы асулар да аз емес. Сол үшін жанға қуат беретін көгілдір Туымыз мәңгі желбіресін.
Тоқтар БЕЙІСҚҰЛОВ, жазушы, профессор.
АЛМАТЫ.