Өтіп бара жатқан жылдың ерекше оқиғасы ел Тәуелсіздігінің 20 жылдық мерекесін халық болып толымды табыстармен атап өту болды. Бұл туралы Елбасының Қазақстан Респбуликасы Тәуелсіздігінің 20 жылдығына арналған салтанатты жиналыста сөйлеген сөзінде жан-жақты айтылды.
Мысалы, алғашқы онжылдықта мықты экономика мен күшті мемлекетіміз қалыптасты. Екінші онжылдықта өсім мен күш жинақтау кезеңі болды. Елбасы осы жетістіктерді айта келіп, енді үшінші және төртінші онжылдықтарды еліміз үшін алға тарихи секіріс дәуірі болады деп тұжырды.
Оған, әрине, негіз бар. Қазақ елі өз тарихында тұңғыш рет ЕҚЫҰ-ға табысты төрағалық етті және Астанада ЕҚЫҰ-ның ХХІ ғасырдағы бірінші және әзірше жалғыз саммитін өткізді. Қасым-Жомарт Тоқаевтай азаматымыз БҰҰ-да Ұйым төрағасының орынбасары болып абыроймен өкілдік етуде. Мұның бәрі бүгінде біздің елге әлемдік қауымдастықтың сенімі артып келе жатқанын көрсетеді.
Дейтұрғанмен, Елбасы таяудағы жылдардың жауапкершілігінің зор екенін де айтып өтті. Елбасының тілімен айтсақ, Қазақстан – біртұтас жер, біртұтас халық, біртұтас болашақ. Сондықтан халқымыз Тәуелсіз ел болып аттаған алтын ғасырды ардақтай білейік. Басымызға қонған бақты өз қолымызбен үркітіп алмайық. Айтаққа еріп, аттанға қосылудың соңы – адасу. Еліміздегі тұрақтылық пен келісім, үдемелі индустрияландыру, инновациялық даму мен интеграция бағытын бір атаның баласындай, бір қолдың саласындай қорғап, қолдай білсек қана бақытқа жетеміз.
Қоян жылына қош-қош айтып, ал келе жатқан Ұлу жылын қуана қарсы алып тұрып, замандастарыма және жастарға айтар ақ тілегім осы.
Бағбан ТАЙЫМБЕТОВ, Жамбыл облысының прокуроры.
Жамбыл облысы.
