Маңызды жиынға Батыс Қазақстан облыстық басқарма басшылары мен өкілдері, қала және аудандар әкімдері, Батыс Қазақстан облысы Қазақстан халқы Ассамблеясы құрылымдық бөлімшелері, этномәдени және қоғамдық бірлестіктер, бұқаралық ақпарат құралдары өкілдері қатысты.
Кеңестің күн тәртібінде Батыс Қазақстан облысы Қазақстан халқы Ассамблеясы сессияларының, кеңестерінің шешімдерінің Орал қаласында орындалуы, 2019 жылға арналған мемлекеттік әлеуметтік жобаларды бекіту, қоғамдық келісім кеңестері қатысуымен аудан мен ауылдық округтердегі жергілікті бюджетті тиімді пайдаланудың ережесін бекіту, Батыс Қазақстан облысы «Жаңғыру жолы» жастар қозғалысының 2019 жылға арналған жұмыс жоспары, Батыс Қазақстан облысы Қазақстан халқы Ассамблеясы этномәдени бірлестіктерін қоғамдық аккредитациялау комиссия мүшелерінің құрамын бекіту және Ассамблея Кеңесінің және құрылымдық бөлімшелерінің құрамына өзгерістер енгізу туралы мәселелер қаралды.
Жиында Батыс Қазақстан облысы әкімі аппараты «Қоғамдық келісім» мекемесінің басшысы Медхат Қамбетов 2019 жылы өткізу жоспарланған 15 мемлекеттік әлеуметтік жобаны кеңес мүшелеріне таныстырып өтті. Мұның ішінде «Үздік елдімекен», «Шекара жүректерді бөлмейді», «Бабалардың көзіндей қасиетті домбыра», «Алғыс айту күні» сияқты шаралар бұрыннан дәстүрге айналған. Сонымен қатар «Мықты елдің мықты адамдары», «Ұлт қазынасы», «Этнофешн» сән фестивалі сияқты бірқатар жаңа жоба биыл тұңғыш рет қолға алынғалы отыр.
Алдағы 2019 жылдың жастарға арналатынын Елбасымыз Жолдауда жариялаған еді. Батыс Қазақстан облыстық «Жаңғыру жолы» жастар қозғалысының төрағасы Владимир Шек «Жастар жылы» аясында өңірдің барлық ауыл-аймағын қамтитын кешенді шаралар ұйымдастырылатынын айтады.
Орал қаласының әкімі Мұрат Мұқаевтың айтуынша, қала аумағында Батыс Қазақстан облыстық Қазақстан халқы Ассамблеясының сессиялары мен кеңестері шешімдері дер кезінде, толығымен орындалып келеді. Қала іргесіндегі Зачаганск, Круглоозерное, Желаев кенттерінде және Орал қаласындағы 78 кәсіпорын-ұйымда қоғамдық келісім кеңесі құрылған.
– Біздің жастарымыз өте талантты. Олар осы қабілеті мен білімін одан әрі дамыта беруіне біз барлық жағдай жасаймыз. Ұрпақтар сабақтастығы, дәстүр жалғастығы үзілмеуі тиіс, - деді өз сөзінде өңір басшысы Алтай Көлгінов.
Батыс Қазақстан облысы әкімінің мәлімдеуінше, кеңесте көтерілген мәселелердің бәрі де келешек жұмыстарды атқаруда ескерілетін болады. «Мұның бәрі өңірде ұлтаралық, дінаралық келісімді сақтауға қолғабыс етеді. Қоғамның әрбір мүшесі ел азаматы ретінде Қазақстанның тәуелсіздігі мен тұрақтылығына, бейбітшіліктің сақталуына қызмет етуі тиіс» деп қорытындылады кеңес отырысын Алтай Көлгінов.
Қазбек ҚҰТТЫМҰРАТҰЛЫ
«Егемен Қазақстан»
Батыс Қазақстан
