Онда 5 жастағы балалардың мектепалды даярлығы мектепке дейінгі білім беру ұйымдарының санатына жататындығы, ал 5 жастағы нөлдік сынып жалпы білім беретін ұйымдар санатына жатпайтындығы көрсетілген. Бұл «Білім туралы» заңның талаптарына сай келмейтіндіктен, осы нөлдік сыныптардың бағдарламалары мектептерде қалай жүзеге асырылып жатқаны туралы сұрақтар туындаған болатын.
Үкіметтің біздің депутаттық сауалымызға 2017 жылғы 20 қазанда берген жауабында: «Бүгінгі күні 12 жылдық білім беруді енгізудің нақты құрылымы мен алгоритмі түпкілікті анықталған жоқ және қаралу сатысында... 12 жылдық білім беруге көшу алгоритмін 2017-2018 оқу жылындағы сынақ қорытындылары бойынша және түпкілікті шешім қабылдау үшін барлық тәсілдерді педагогикалық және ата-аналар қоғамдастығымен алдын ала кеңінен талқылау жүргізу жоспарлануда» делінген.
Президент Н.Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында қойылған міндеттерді іске асыру аясында білім беру сапасын халықаралық стандарттарға сәйкес түбегейлі жақсарту керектігіне баса назар аударған. Осыған орай және аталған сынақтың нәтижелері мен қорытындылары туралы жариялылықтың жоқтығы, сондай-ақ осы мәселеге білім саласы мамандарының әртүрлі көзқарастары бірқатар сауалдар туғызып отыр. Атап айтқанда:
1. Бүгінгі күні 5 жасар балаларға арналған нөлдік сыныптар мектептерде және мектепке дейінгі білім беру ұйымдарында жұмыс істеуде. Егер мектептерге енгізілген нөлдік сынып жалпы білім беретін ұйымдардың санатына жатпайтын болса, онда нөлдік сыныптың мемлекеттік стандарттары, бағдарламалары қалай бекітіліп жатыр?
2. Нөлдік сыныпта оқитын балалардың оқу-әдістемелік құралдары қандай қаржы көзінен қаржыландырылып жатыр, әлде ата-аналар есебінен бе?
3. Мектептерде нөлдік сыныптардың сабақтарын мұғалім-педагог жүргізетін болса, балабақшаларда тәрбиешілер жүргізеді. Сонда балабақшадағы және мектептегі нөлдік сыныптарда оқыған балалардың мектепке даярлық деңгейі қандай болмақ, оған қандайда бір талдау жасалды ма?
Білім және ғылым министрлігінің ұстанымы бойынша 12 жылдық оқытуға көшу нөлдік сыныпты енгізу арқылы жүзеге асырылмақшы. Демек 5 жастағы балалардың мектепалды даярлығы шын мәнінде 12 жылдыққа көшудің бірінші сыныбы болып табылады.
Өкінішке қарай, қазір мектепалды даярлық пен бастауыш мектептің үлгілік бағдарламасының арасындағы сабақтастықтың тұжырымдамалық негізінің әлсіздігі, 12 жылдық білім берудің жаңартылған мазмұны жұртшылықтың түсінуіне қиыншылықтар туғызып отыр. Осының негізінде, Біз Үкімет басшысына мынадай ұсыныстар жасадық:
1) Білім және ғылым министрлігі ұсынған 12 жылдық оқытуға көшудің 0+11 құрылымдық схемасын қолданыстағы «Білім туралы» заңның талаптарына сәйкестендіру;
2) 12 жылдық білім беруге көшудің нақты алгоритмі туралы педагогтар мен ата-аналар арасында жан-жақты түсіндіру жұмыстарын жүргізу.
Әбдіманап БЕКТҰРҒАНОВ,
Мәжіліс депутаты
