Энергетика вице-министрі Болат Ақшолақовтың айтуынша, сауалдамаға қатысқан кәсіпорындарды цифрлы жүйеге көшіруде министрліктің көмегіне мұқтаж екені белгілі болды. Министрлік «Цифрлы Қазақстан» бағдарламасы бойынша ұзын саны 15 ірі жоба ұсынған. Оны жүзеге асыруға қажетті қаражат жобаның басты орындаушылары саналатын ұлттық компаниялар есебінен бөлініп, цифрлы жүйенің енгізілуінен экономикаға 143 млрд теңге көлемінде қосымша қаржы түседі деп жоспарланған.
2017-2022 жылдарға арналған «Интеллектуалды кен орны» ақпараттық жүйесі аясында «ҚазМұнайГаз» ұлттық компаниясы цифрлы жүйеге көшуге 25 млрд теңге жұмсап, оның қайтарымы 56 млрд теңгені құрамақ. Жобалардың тікелей экономикалық әсерін санамағанда, министрлік осы арқылы мұнай саласындағы көлеңкелі сауданың да алдын алмақ.
«ҚазТрансОйл» компаниясы мұнай тасымалында «ақылды» технологиялардың көмегімен саладағы операциялық шығындарды еселеп азайтуды көздеп отыр. Сол сияқты, «ҚазМұнайГаз»-дың жанармай құю бекеттері Астана қаласында «smart-бекет» қызметін енгізіп жатыр.
– Бұл қарапайым тұтынушыларға арзан және сапалы жанармайды барынша оңай әрі қауіпсіз жеткізудің тиімді тәсілі,– дейді Болат Ақшолақов.
Сонымен қатар вице-министр өз сөзінде алдағы уақытта елдегі үш ірі мұнай өңдеу зауыттарының да цифрлы жүйемен жұмыс істей бастайтынын айтты. Бұл бастаманың аясында мұнай өңдеу зауыттары бұрынғыдай жыл сайын бір ай бойы жөндеуді күтіп тұрмай, үш жылда бір-ақ рет қысқамерзімді жоспарлы жөндеуден өтетін болды. Осы бастамалардың арқасында елдегі жанармай тапшылығы да жойылып, бағаның арзандап қалуы ғажап емес.
Бұдан бөлек, қоршаған ортаны қорғау жұмыстарының тиімділігін арттыру үшін министрлік цифрлы жүйеге инвестиция құйылатыны туралы құлағдар етті.
Шынарбек ЖОМАРТҰЛЫ,
журналист
