Қарағанды құю-машина жасау зауыты облыстағы ірі кәсіпорындардың бірі болып саналады. Мұнда негізінен тау-кен және шахта құрылғыларын жасап шығарады. Сонымен қатар зауыт «Қазақмыс» корпорациясы» ЖШС кәсіпорнын қосалқы бөлшектермен және машина жасау бағытындағы жабдықтармен қамтамасыз етеді.
Зауытты жаңғырту 2014 жылы «Өнімділік-2020» мемлекеттік бағдарламасы бойынша қолға алынған болатын. Соның нәтижесінде кешенді жоспарды әзірлеуге кеткен шығынды жабуға қажетті 7,9 млн теңге қаржы және несие алынды. Жабдықты ауыстыруға кеткен қаражаттың негізгі бөлігін «БРК-Лизинг» компаниясы ұсынды. Ал зауытты қайта жарақтандыруға арналған қалған 61,5 млн доллардың 15 пайызын «Қазақмыс» корпорациясы бөлді.
Құйылған инвестицияның арқасында ҚҚМЗ сандық бағдарламалық басқару жүйесі бар, дәлдігі жоғары заманауи ондаған станок сатып алынды. Чехия және Корея мемлекеттерінен әкелінген бұл станоктар тау-кен жұмыстарында пайдаланылатын техникалар мен жабдықтарға қажетті 4,5 мыңға жуық бөлшектер шығаруға мүмкіндік береді.
Жалпы кәсіпорынның қарапайым құйма өнімдерінен бастап машина жасап шығаруға дейін жететін әлеуеті бар. Оның өнімдерінің қатарында скиптер, крандар, жер асты автобусы, вагонеткалар, флотациялық машиналар, конвейер желісі және басқа да көптеген бөлшектерді айтуға болады.
Жоғарыда айтқанымыздай, бүгінде зауытқа 12 млрд теңгенің 287 бірлік негізгі, қосымша және өлшеуіш жабдықтары жеткізіліп, іске қосылған. Екі жылдың ішінде өнім шығару 3,1 млрд теңгеден 6,6 млрд теңгеге дейін өскен. Ал жылдың соңына дейін кәсіпорын өнім көлемін 8,9 млрд теңгеге жеткізуді көздеп отыр.
«Біздің мақсат, – дейді зауыт басшылары, – 2019 жылдың соңына дейін номенклатуралық өнім шығаруды 5-5,5 мың бөлшекке дейін арттыру. Сәйкесінше, біз тауардың өзіндік құнын төмендетіп, сыртқы, тіпті импорт нарығына шыға алатын бәсекеге қабілетті кәсіпорын болуымыз керек. Бізге тапсырыстың дені «Қазақмыс» корпорациясынан келеді. Бірақ мұнымен шектеліп қалмаймыз, қазіргі әлеуетіміз сырттан да тапсырыс қабылдауға жетеді».
Зауыт қазір номенклатураны дамытып жатыр. Бұрын технологиялық база шектеулі болғандықтан, қолдан келген бөлшектерді ғана шығарып келсе, қазір жағдай өзгерген. Бүгінде зауыт өте күрделі тораптар мен агрегаттар шығара бастады. Яғни, импорт алмастыру пайызы жоспарлы түрде артып, шығарылатын өнімдер саны көбейе түскен.
Қазіргі таңда зауытта 700-ге жуық адам жұмыс істейді. Оның ішінде, жобамен алғанда 100 шақты қызметкер сандық бағдарламалық басқару учаскесінде еңбек етеді. Кәсіпорында даяр кадрларға деген зәрулік байқалғандықтан, Қарағанды мемлекеттік техникалық университетімен бірлесе отырып тірек кафедрасы ашылған. Сондай-ақ Қарағанды машина жасау колледжімен де әріптестік байланыс орнатылған.
Кәсіпорын өз қызметкерлерінің кәсіби шеберліктерін жетілдіруге ерекше мән береді. Осы мақсатта Ресейдің «Клио-Софт» АҚ компаниясымен бірлесіп, сандық бағдарламалық басқару станогының операторы, сол станокта жұмыс істейтін инженер-бағдарламашы, инженер-технолог, инженер-құрастырушы және құю өндірісінің инженер-технолог мамандықтары үшін оқу бағдарламасы әзірленген. Бүгінге дейін мұнда 41 жұмыскер мен 52 инженерлік-техникалық маман білімін жетілдіріп шыққан.
Қарағанды құю-машина жасау зауытының алдына қойған мақсатының бірі – бірыңғай инженерлік кешен және заманауи индустриялық парк құру. Мұның өзі төртінші өнеркәсіптік революция жағдайындағы дамудың жаңа белесіне шығуға мүмкіндік беретіні сөзсіз.
Қайрат ӘБІЛДА,
«Егемен Қазақстан»
ҚАРАҒАНДЫ
