– Осы айда қолыма 42 700 теңге аламын. Бергенді кім жек көрсін, кәдімгідей қуандым. Қазір мұның өзі біреулер үшін аса көп қаржы емес шығар, бірақ мен үшін бұл аз емес. Қазір коммуналдық төлемдерден бастап, дастарқандағы азықтың бәрі сатулы ғой. Қосылған ақша соның бірін өтейді. Берекесін берсін. Елбасына рахмет! Елдің жағдайы түзеліп келеді, ал «елде болса, ерінге тиеді» деген осы, – деді Д.Ержанов.
Бұл элеватор Кеңес Одағы кезінен қалған, 90-жылдары ешкімге керек емес болған нысан еді. Соны «Элеватор Агрофуд» кәсіпорны қолдан келгенше қалпына келтіріп, қазір Торғай өңірінде өсетін аз болса да саз, қамырлылығы 30-дан айналатын сапалы бидайды сақтап, сатып отыр.
– Біздің Торғай өңірінің бидайына бір жағы Қытай, бір жағы арабтар, қасымыздағы Ресей қызығушылық танытады. Таяу уақытта тәулігіне 70 тонна ұн тартатын германиялық қуаты мықты диірмен қоямыз, сонда тағы да 10-15 адамға жұмыс береміз. Жалақыны тағы көбейтуге де жағдайымыз келіп қалар деп ойлап отырмыз. Бүгінде элеваторда 22 адам жұмыс істейді. Соның арасынан айына 32-33 мың теңге алатын 5-6 адамға жалақыны көбейттік. Бұл тек негізгі жалақы ғана. Ауыл шаруашылығындағы жұмыс уақытпен санаса бермейді ғой, кейде қосымша жұмыстарды атқару керек болғанда сағатына тағы да үстеме төленеді, – дейді элеватордың атқарушы директоры Құрман Абдрахман.
«Элеватор Агрофуд» жауапкершілігі шектеулі серіктестігі қатты бидайды сапалы сақтауды, өңдеуді одан әрі дамытуға бет алған. Қазір Иранға сұлы арту үшін оны тазалап, сұрыптап жатыр.
– Елбасы тапсырмасы мүлтіксіз орындалады. Экономиканы дамытпасақ, елге пайдамыз тимесе неге жүрміз? Бұл әр кәсіпкердің парызы болуы тиіс, – дейді Құрман Тұрғанұлы. Ісіне тиянақты кәсіпкер сөзіне де берік.
Нәзира ЖӘРІМБЕТ,
«Егемен Қазақстан»
АРҚАЛЫҚ
