Қазақстан • 26 Қараша, 2018

Металлургтердің еселі еңбегі

490 рет
көрсетілді
4 мин
оқу үшін

Қазіргі кезде ел экономикасына сүбелі үлес қосып отырған ірі өндіріс орындары қайта жаңғыртылып, цифрландыруға қадам бас­ты. Соның нәтижесінде өнім өндіру көлемі арта түсті. Жуырда Павлодар өңірінде алюминийдің 60 миллионыншы тоннасы өндірілді. Бүгінде отандық  алюминий тотығы Ресей, Беларусь, Өзбекстан мен Еуропа елдеріне жіберілуде.  

Металлургтердің еселі еңбегі

ERG компаниялар тобы боксит өндіреді, оны өңдеу арқылы металлургиялық глинозем алады. Кәсіпорын жылына 1,5 млн тонна глинозем өндіреді. Компания құрамында «Қазақстан алюминийі» АҚ, «Қа­зақстан электролиз зауыты» АҚ, Майқайыңдағы «Керегетас» әктас кеніші, Қостанайдағы Краснооктябрь, Торғай боксит кен басқармалары бар. 

– Атаулы мерейтойлық тон­наның шығарылымы – бұл металлургтердің отандық эконо­миканың дамуына қосқан үлесі. Өйткені бүгінде алюминий кластері еліміздің ме­­таллургия саласының басты тірегі, – дейді «Қазақстан Алю­минийі» АҚ президенті Роман Романов. 

Облыс орталығының шет­кі жағында орналасқан «Қа­­зақстан алюминийі» АҚ, «Қа­зақстан электролиз зауыты» АҚ еліміздегі өндірістің негізі. Жыл басынан бері 750 мың тонна гли­нозем,     2 млн тонна боксит, 1 млн тонна әктас, 127 мың тонна алюминий өндірілген. 

Жалпы, алюминий күміс сияқ­ты жарқыраған ақ түсті, өте жеңіл металл. Оңай иіледі, тоттанбайды, электр тогын жақсы өткізеді. Ұшақ­тан бастап қасық, азық-түлік орайтын алюминий қа­ғазына (фольга) дейін күнделікті өмірде қолданылады. Автобөл­шектерді, авиақозғалтқышты, көлік дискі­лерін жасау үшін алю­минийге кремний, мыс, магний қосады.

Өндіріс мамандарының айтуын­ша, кәсіпорынның ерекшелігі алюминий тотығын құ­рам­даст­ырылған бірізді «Байер-жентектеу» әдісімен өн­діреді. Бұл әдіс әлем бойынша қазақстандық алюминий зауытында ғана қолданылады. Байер әдісі боксит шикізатының химиялық құрамына байланыс­ты жүзеге асады. Зауытта алюминий тотығы шикізат даярлау цехы, гидрометаллургия цехы, жентектеу цехында өндіріледі. Кәсіпорын өндірген алюминий тотығы электролиз зауытына жө­нел­тіледі. 

Жалпы, алып кәсіпорынның инвестициялық бағдарламасы өндірістік қуатты қолдауға, қол­даныстағы өндірістік нысан­дарды қайта құру мен жаңғыр­туға, құрылғыларды жөндеп, жаңартуға бағытталған. Биыл 25,5 млрд теңге инвестиция құйыл­ды. Зауытта іске қосылған жобалардың қатары да аз емес. Мысалы, гидро­металлургиялық цехтың төртінші телімінде бу­ландырғыш қондырғы іске қосылды. Жоба кәсіпорынның инвестициялық бағдарламасының аясында өндірістік тиімділікті және жоспарлы алдын алу жұмыс­тарының сапасын арттыруға бағытталды. 

Бұдан бөлек, глинозем өнді­рісіндегі технологиялық үрдістің сенімділігін, үздіксіз жұ­мысын қамтамасыз ететін ша­ралар жалғасуда. Газ тазар­ту қондырғысын қайта жа­ңарту жөніндегі ұзақмерзімді бағ­дарламасын іске асыру басталды. Электрсүзгілер біртіндеп еуропалық стандарттардың талаптарына сай келетін заманауи қондырғыларға алмастырылады. Кәсіпорынға қарасты жылу электр орталығының қоршаған ортаға әсерін төмендету мақсатында қажетті заманауи технологияларды орнату үшін дайындық жұмыстары жүргізілуде. 

Бұл күндері «Қазақстан алю­минийі» АҚ зауытында өндірістік саланы цифрландыру жолында жаңа технологиялар енгізілуде. Еліміз бойынша алдыңғы қатарлы осындай кәсіпорындар әрі қарай дами берсе, олардың айналасында кіші және орта кәсіпкерлік топтасатыны да сөзсіз. Сонымен бірге кәсіпорын облыс орталығының 40 пайызын жылумен қамтамасыз ететін жылу электр стансасын басқарады. ERG компаниясы мен облыстық әкімдік арасында жасалған меморандумға сәйкес, жыл сайын бизнестің әлеуметтік жауапкершілігі аясында жаңа спорт нысандары ашылып, көпқабатты үйлер бой көтеруде. 

Фарида БЫҚАЙ,

«Егемен Қазақстан»

ПАВЛОДАР