Елбасы іс-шара басталмас бұрын әскери-патриоттық орталық музейінің экспозицияларымен танысты. Онда Қазақстан армиясына арналған әскери суретшілер студиясының туындылары мен «Орбұлақ шайқасының» диорамасы қойылған. Сонымен қатар Елбасы 3D-mapping шоу технологиясы бойынша ұйымдастырылған көрмені тамашалады.
Қазақстан Президенті алдымен шараға қатысушыларды өскелең ұрпақты отаншылдыққа тәрбиелейтін «Жас сарбаз» қозғалысының құрылуымен құттықтады. Мемлекет басшысы ұлттық рухты қалыптастырып, ел тарихын терең зерттеудің маңыздылығын айрықша атап өтті.
– Жақында жарияланған Жолдаудағы маңызды мәселелердің бірі – патриоттық тәрбие беру ісі. Егер біз Отанымызды қорғай алмасақ, онда тәуелсіздіктің 27 жылы ішінде атқарған барлық жұмысымыздың мәні жоғалады, – деді Нұрсұлтан Назарбаев.
Елбасы бүгінде мемлекет тарапынан атқарылып жатқан шаралардың бәрі келер ұрпақ үшін жақсы жағдай жасауға бағытталғанын айтты.
– Осының бәрі жастарымыз – біздің болашағымыз үшін. Атқарылып жатқан жұмыстар сіздердің өмірлеріңізді одан сайын жақсартып, Қазақстанымызды одан әрі байыта түсу үшін жасалуда, – деді Мемлекет басшысы. Нұрсұлтан Назарбаев еліміздегі жас буынды «Жас сарбаз» қозғалысы мүшесінің қатарына қосылуға шақырды.
– «Жас сарбаз» қозғалысы еліміздің барлық өңірінде құрылуы тиіс. Еліміздегі жастар осы қозғалыстың қатарынан табылуы қажет. Сондықтан дене шынықтырумен айналысып, әскери мамандықтарды игерген жөн. Бұл қозғалыс Қорғаныс министрлігімен бірлесіп, патриоттар тәрбиелеу ісіне белсенді атсалысуы керек. Сонда ғана сіздер өз халқыңыздың тірегіне айналасыздар, – деді Қазақстан Президенті. Мемлекет басшысы «Ұлы даланың жеті қыры» атты мақаланың қазақстандық патриотизмді күшейту ісіндегі ерекше маңызы барын атап өтті. Сонымен қатар Қазақстан қоғамының гүлденуі үшін тұрақтылық пен ұлтаралық келісімді сақтаудың маңыздылығына тоқталды.
– Елімізде көптеген этнос өкілдері тұрады. Біз бәріміз де – Қазақстан азаматтарымыз. Бай тарихымыздың арқасында төзімділік пен құрметтеуді бойымызға сіңірдік. Бұл құндылықтар Қазақстанды біріктіреді, мемлекетті қуатты және сыйлы мемлекетке айналдырады. Сондықтан Отанымыздың патриоты болу – баршамыздың парызымыз, – деді Елбасы. Сөз соңында Мемлекет басшысы барлық қатысушыларға табыс пен жаңа жетістіктер тіледі.
Кездесу барысында жас сарбаздар Мемлекет басшысына «Жас сарбаздың» құрметті төрағасы» куәлігін, төсбелгісі мен арнайы киімін табыстады.
Осыдан үш жыл бұрын дәл осы күні Мемлекет басшысы – Қазақстан Республикасы Қарулы күштерінің мәдени ошағы − Ұлттық әскери-патриоттық орталықты салтанатты түрде ашқан болатын. Салтанатты жиында «Жас сарбаз» балалар мен жасөспірімдер әскери-патриоттық қозғалысы» республикалық қоғамдық бірлестігінің жұмысы баяндалып, қозғалыстың өңірлердегі филиалдары өз жұмысын бастады. Сонымен қатар қозғалыс тәрбиеленушілерінің жаңа киім үлгісі таныстырылды.
Бүгінде «Жас сарбаз» балалар мен жасөспірімдер әскери-патриоттық қозғалысы» республикалық қоғамдық бірлестігінде 2828-ге жуық әскери-патриоттық клуб пен сыныптар бар. Онда 73 164 бала қамтылған. Аталған орталықта соңғы екі жыл ішінде әскери-патриоттық тәрбиелеу бойынша 992 іс-шара өткізілген. Оның ішінде жыл сайын «Айбын» республикалық әскери-патриоттық жастар жиыны да бар. Былтырдан бастап аталған шара халықаралық дәрежеде ұйымдастырылып келеді.
Салтанатты шарада сөз алған аға лейтенант Мейірбек Меңдіғалиев: Мемлекет басшысының тапсырмасы бойынша балалар мен жасөспірімдер әскери-патриоттық қозғалысы» қоғамдық бірлестігі құрылды. Алдағы уақытта республика бойынша «Жас сарбаздың» жаңа сыныптары мен әскери-патриоттық клубтары ашылады. Біздің мақсатымыз – төл тарихын білетін, бүгінін бағалайтын, тәуелсіздігімізді көзінің қарашығындай сақтайтын ұлағатты жас өренді тәрбиелеу», деді. Ал Астана қаласындағы 66-шы мектеп-лицейінің 11-сынып оқушысы Данияр Бекетов замандастарының тек білім, ғылым, инновация салаларын меңгеріп қана қоймай, өз ұлтының мәдениеті мен төл тарихын білуге ұмтылатынын жеткізді. «Өз Отанымызды қорғайтын жігерлі, білімді сарбаз болуды мақсат етеміз. Қатарластарымызды спортпен шұғылдануға, ұлттық таным көкжиегін кеңейтуге шақырамыз», деді ол.
Қазақстан Республикасы Тұңғыш Президенті күні қарсаңында ұйымдастырылған кездесуде жас сарбаздар шағын концерт ұйымдастырып, жеткен жетістіктерімен бөлісті.
Еркежан АЙТҚАЗЫ,
«Егемен Қазақстан»
