Биылғы жылы қазылар алқасы 125 елден 4,5 мың фотосуретшінің 73 мыңға жуық таңдаулы суретін керім көріністер ретінде бағалады. Жеңімпаздар мен жүлдегерлер қатарына 42 адам кірді. Қазақстандықтар еліміздің тек төрт қаласында ғана, яғни Астана, Қарағанды, Алматы және Шымкентте фотожурналистердің бүкіл әлемнен жіберілген ең үздік фотосуреттерін көруге мүмкіндік алып отыр.
World Press Photo – 2018 – бұл фотожурналистика саласындағы ең беделді халықаралық байқау жеңімпаздарының көрмесі болып саналады. Кәсіби фотосуретшілерден және БАҚ фоторедакторларынан тұратын халықаралық тәуелсіз қазылар алқасы жыл сайын жер жүзінің түкпір-түкпірінде жұмыс жасайтын фотожурналистердің, агенттіктердің, газет пен журналдардың үміткерлерінің жұмыстарын 9 түрлі санатта бағалайды.
Сондай-ақ World Press Photo халықаралық фотобайқауы жеңімпаздарының көрмесі аясында Нидерланд корольдігінің елшісі 2018 жылдың 10 желтоқсанындағы Халықаралық адам құқығы күніне орай әлеуметтік маңызға ие тақырыптарға арналған фотосуреттер онлайн-байқауын ұйымдастырады.
Астана мен Қарағандыдағы көрме аяқталды. Алматыдағы көрме 2 аптаға созылады. Қазақстанда көрме үшінші мәрте өткізілуде. Осыған дейін көрме Астана, Алматы, Қарағанды және Өскеменде 2013 және 2014 жылдары өткізілген болатын.
Сапарбай ПАРМАНҚҰЛ,
«Егемен Қазақстан»
АЛМАТЫ
