Қазақ спортшыларының бүгінгі жеңісі мен жетістігінің барлығы Тәуелсіздіктің арқасында деп білемін. Ел өміріндегі ең еңсесі биік, тегеуріні текті мереке – Тəуелсіздік мейрамы. Өйткені бұл күннің мағынасы мен мəн-мазмұны аса терең.
Менің Қытайдағы балалық шағым Алтай облысындағы Ертіс өзенінің бойында өтті. Қарапайым қазақ ауылында туып өстік. Есейе келе әлемде Қазақ елі бар екенін білдік. Қытайда жүріп ең алғаш бокс үйірмесіне барғанда жаттықтырушы ағай бізден «мұнда неге келдіңдер» деп сұрады. Бәріміз бір ауыздан чемпион болуға келгенімізді айттық. Сонда ол кісі «маған чемпионның керегі жоқ. Бірінші адам болуларың керек» деп еді. «Сендер чемпион болып, артынан тілдеріңді шайнап, бір жерде топыраққа аунап жатсаңдар немесе ел амандаса алмайтындай дәрежеде талтаңдап жүрсеңдер ол дұрыс болмайды» деген еді. Сонда ғана чемпион деген атақтың артында ұлттық мүдде, қаншама жауапкершілік жатқанын түсінгендей болдым. Қай салада, қай кәсіпте болсын ұлттың мүддесі биік тұрмаса, ол адам үлкен жетістікке жете алмайды.
«Қазақстанға кетеміз» деген сөз бала күннен құлаққа әбден сіңісті болып қалған әрі үлкен медеу болатын. Мен Қытай елінде де Қазақстанды арқаланып жүрдім. Қазақстанның азаматтығын алуға шешім қабылданған кезде Қытай бокс федерациясы басшыларына: «Жүрегім – қазақ деп соғады. Отбасым осында. Атажұртымда шаңырақ көтердім. Ағайын-туыстарымның барлығы осы жақта. Сондықтан Қазақстан атынан жұдырықтасуға рұқсат етіңіздер», деп алдарынан өтіп, өтініш хат жаздым. Мақсатым – Қазақстанның көк байрағы астында Олимпия ойындарына қатысып, алтын жүлде иелену болатын. Дегенмен ортаға саясат араласып, Олимпиадаға бара алмайтын болдым. Қытай жағы рұқсат бермей қырсығып отырып алды. Әйтпесе бас бапкер Мырзағали Айтжановтың шақыртуымен ұлттық құрамамен бірге жаттығу жұмыстарына да қатыстым.
Лондонға бара алмайтынымды білген кезде көңіл күйім қатты түсіп кетіп еді. Олимпия ойындарына бара алмасам да, сол уақытта «Астана арландары» бокс клубында Қазақ елінің намысын қорғадым. Бұл да мен үшін жұбаныш болды. Қытайдан келгендегі мақсатым қай жарыста болсын қазақтың намысын қорғау еді. Сол күнге жеткізген Құдайға шүкір деймін. Сондықтан Тəуелсіздігіміз ұзағынан әрі баянды болсын! Тəуелсіз елдің бағы да жоғары, аспаны да кең. Біз сондай баққа жеткен халықпыз. Еліміз гүлдене, нұрлана берсін!
Қанат ИСЛАМ,
кәсіпқой боксшы
