Егер бұл жайттар уақытында орындалмаса, тұрғындар тарапынан түрлі түсінбеушіліктер туындауы мүмкін. Сондықтан толғақты әлеуметтік-тұрмыстық мәселелерді дер кезінде реттеудің маңызы мен рөлі жоғары. Осы мақсатта өңірде «Өзекті мәселелер картасы» құрылды. Соған сәйкес тиісті талдаулар мен зерттеу жұмыстары жүргізіліп келеді. Құжатқа көз салсақ, қазіргі кезде шұғыл шешуді қажет ететін 72 өзекті мәселе бар екенін көруге болады. Оның дені тұрғын-үй коммуналдық шаруашылығына қатысты болса, келесі кезектегі өзекті мәселелер тізбегін автокөлік жолдарына қатысты түйткілдер құрайды. Сонымен бірге тұрғын үй құрылысы, мәдениет, спорт және денсаулық сақтау салаларында да түбегейлі шешімін тауып үлгермеген мәселелер бар екені айқын көрінеді. Оның көлемі 22 пайыздық көрсеткішке тән.
Картаға қарап көп жайтты көңілге тоқуға болады. Өңірдегі өзекті мәселелердің қазіргі жағдайын ой безбенінен өткізуге де мүмкіндік мол. Ең бастысы, аймақта картаның көмегімен шешімін күткен мәселелерді жедел әрі көрнекі түрде бақылауға жол ашылған. Содан соң тиісті құзырлы органдардың назарына беріледі. Өз кезегінде олар ресурстардың көлемі мен істің орындалу мерзімін айқындап, нақты шешім қабылдайды.
Айталық, аймақта аудан орталықтары мен қалалардың картасын жасақтаудың бастапқы кезеңінде 14 мәселе болды әрі оның шешімі бюджет қаражатын бөлуге байланысты өрістеді. Бүгінде оның жетеуі оң шешімін тапқаны белгілі болып отыр. Атап айтқанда, аталған жобалар бойынша 2,4 миллиард теңге бюджет қаражаты бөлінді. Сонымен бірге 2019 жылы жүзеге асатын жобаларға 894,3 миллион теңге, сондай-ақ 2020 жылы атқарылатын жобаларға 490,6 миллион теңге бөлу қарастырылған. Қысқасы, бүгінде өңірдегі жергілікті атқарушы органдар, соның ішінде облыстық басқармалар мен аудандық әкімдіктер картада көрсетілген мәселелерді шешуге бір кісідей жұмылған. Мұндағы басты ұстаным – орын алған өзекті мәселелерді қоян-қолтық өзара бірлесіп шешу.
Темір ҚҰСАЙЫН,
«Егемен Қазақстан»
АҚТӨБЕ
