«7–20–25» бағдарламасын іске асыру барысы туралы Ұлттық банк төрағасы Данияр Ақышев баяндады. Оның айтуынша, бұл бағдарлама қазақстандықтардың тұрғын үй жағдайларын жақсартуға бағытталған. Қатысу шарттары өткен жылдың ортасында бекітілді. Ипотека нарығын дамыту үшін заңнамалық түзетулер енгізілді. Бағдарлама операторы болып «Баспана» ұйымы құрылды. Бағдарлама 2018 жылғы шілдеде іске қосылды. Бағдарламаны іске асыруға 8 банк қатысады.
Биылғы 17 қаңтардағы жағдай бойынша «7–20–25» бағдарламасы аясында 52 млрд теңгеге 4350 өтінім мақұлданды.
«Бағдарламаны іске асыру барысы бұқаралық ақпарат құралдарында, әлеуметтік желілерде жүйелі түрде жарияланады. Тәулік бойы колл-орталық жұмыс істейді. Ұлттық банктің аумақтық бөлімшелері мен “Баспана” ипотекалық ұйымы барлық өңірлердегі халықпен және еңбек ұжымдарымен кездесу өткізуде. Халықпен белсенді түрде түсіндіру жұмысын жүргізуге 6 млн-нан астам азамат қамтылды», — деді Д. Ақышев.
ҚР Ұлттық банкі Бағдарламаны жандандыру үшін бірқатар шараны ұсынады:
- тұрғын үйге сұранысты, демографиялық өсімді және халық көші-қонын ескере отырып, тұрғын үй құрылысын еліміздің перспективалық өңірлерінде қамтамасыз ету;
- ЖАО-ға «Баспана» ИҰ қаражаты есебінен тұрғын үй салуға қаржы тарту құқығын беру;
- «Нұрлы жер» бағдарламасы бойынша салынған үйлерді Тұрғын үй құрылыс жинақ банкі арқылы салымшылар мен кезекте тұрғандарға және барлық азаматтарға «7-20-25» бағдарламасы бойынша ипотекалық қарыздар арқылы сату.
- Тұрғын үй сертификаттарын беру нақты сипатқа ие болуы керек және бағдарламаның басында ғана болуы мүмкін;
- Үкіметтің бағдарламаға меншік құқығында баспанасы бар азаматтарға қатысу құқығын беру мүмкіндігін зерделеуі;
Бес әлеуметтік бастаманың екінші бағытын іске асыру аясында жалақысы төмен жұмысшылардың еңбекақысын көбейту үшін олардың салық жүктемесін азайту бойынша атқарылып жатқан жұмыстар туралы Ұлттық экономика бірінші вице-министрі Руслан Дәленов баяндады.
«Барлық дайындық жұмыстары жүргізілді және аяқталды. Заңнамалық өзгерістер 2019 жылдың 1 қаңтарынан бастап күшіне енді, салық төлеушілердің арасында түсіндіру жұмыстары жүргізілді, жергілікті бюджеттердің шығындарын өтеу көзделген, нормалар қолданылуда», — деді Р. Дәленов.
Бірінші вице-министр заңнамалық өзгерістерге қатысты, Салық кодексінде жалақысы 63 125 теңгеден төмендер үшін тәртіп өзгергенін айтты. Олардың салық жүктемесі 10 есе төмендетілді және 2 млн-ға жуық жұмысшы жылына 15 мың теңгеге дейін қосымша кіріс алады.
Жергілікті бюджеттердің шығындарын өтеу бойынша айтар болсақ, өзгерістер жергілікті бюджеттердің шығындарына әкеледі. Осыған орай, аталған шығындар республикалық бюджет комиссиясының отырысында қаралды және мақұлданды. Республикалық бюджетте трансферттер көзделген. Осылайша, жергілікті бюджеттердің кірістері жеңілдіктердің арқасында азаймайды.
Бұған қоса, Р. Дәленов барлық жұмыс берушілер өзгерістермен танысқанын, халық арасында түсіндіру жұмыстары жүргізілгенін атап өтті.
Сонымен қатар, екінші бастамада жеке табыс салығының прогрессивті шкаласын енгізу мүмкіндігін зерделеу тапсырылған. Бірінші вице-министрдің айтуынша, халықаралық тәжірибе зерделенді және жалдамалы еңбекке ақы төлеудегі ағымдағы жағдайға егжей-тегжейлі талдау жүргізілді.
Жалпы, ҰЭМ деректеріне сәйкес, жалақысы төмен жұмысшылардың салық жүктемесін азайту туралы тапсырма орындалды.
