24 Қаңтар, 2019

Ольга Довгун Токио олимпиадасы қарсаңындағы басты міндеттерді атады

361 рет
көрсетілді
2 мин
оқу үшін

Нысана көздеуден Қазақстан ұлттық құрамасы жыл басынан бері Алматы облысында жаттығу жиынын өткізуде. Бағанашылдағы жиында мергендер жалпы физикалық дайындықты реттеуге көңіл бөлген болатын. Команданың бас бапкері, тәжірибелі спортшы әрі Олимпиада ойындарына қатысушы Ольга Довгун Olympic.kz сайтына шағын сұхбат беріп, Токио қарсаңында қандай міндеттер күтіп тұрғанын айтты. 

Ольга Довгун Токио олимпиадасы қарсаңындағы басты міндеттерді атады

«Ұлттық құрама Алматы облысында жаттығу жиынында өткізіп жатыр. Бұл біздің спортшылар үшін көптен күткен жиын болатын. Себебі, бізде мұндай шаралар жиі ұйымдастырыла бермейді. Иә, жаңа жылмен бірге жаңа маусым да басталды. Бұл маусымның біз үшін оңай болмасы анық. Өйткені, алда Олимпиада ойындары келе жатыр», - дейді Ольга Довгун.

Бас бапкер 2020 жылғы Токио ойындарына жолдама қалай таратылатынын түсіндірді. 

«Мергендер Олимпиада жолдамасын әлем кубогі кезеңдері мен Азия чемпионатында сарапқа салады. Атап айтар болсақ, біздің спортшыларды төрт бірдей әлем кубогі кезеңі күтіп тұр. Әлемдік додада әр жаттығу түрінен екі олимпиадалық квота беріледі. Егер 1-2 орындағы спортшылар жолдамаға иелік еткен болса, квота 3-4 сатыдағы мергендерге өтеді. Ал Азия чемпионатында әр жаттығудан төрт квота таратылатыны анықталды», - дейді бас бапкер.

Ольга Довгун мергендер алдында қандай талап барын да жасырмады. Бас бапкердің айтуынша, команда мүшелеріне 3 жолдама жеңіп алу тапсырылған. 

«Олимпиадаға үш жолдама иеленсек деген мақсат қойдық. Сол себепті, жылдың басты жарыстарына негізгі құрам спортшыларын апарамыз. Әрине, бұл жастар шет қалады деген сөз емес. Талантты жас мергендерді де қатарға қосамыз», - дейді ол. 

Нысана көздеуден Қазақстан ұлттық құрамасының биылғы маусымдағы алғашқы ресми турнирі Үндістанда өтеді.