Мемлекеттің жастарға бағытталған оң саясатының арқасында Қытайда, Ұлыбританияда білім алдым. Жастық шағымның біраз жылы Америка Құрама Штаттарында өтті. Бастапқыда ісімді жарнама саласынан бастағаныммен, қазір бизнестегі әріптестеріммен бірге өндіріске қатысты жобаларды жүзеге асыруға кірістік. Елімізде бұрғылау тұрбаларын шығаратын зауыт салу жөнінде жоспарымыз бар. Сондай-ақ отандық әншілерді қолдауға бағытталған жобамыз да жүзеге асырылуда.
Жалпы, Елбасының қатысуымен өткен салтанатты жиында Мемлекет басшысының жастарға қатысты мәселелерге өте тереңнен қарайтындығына тағы бір мәрте көз жеткіздім. Президенттің әрбір ұсынысы мен тапсырмасы жастардың әл-ауқатын арттырып, әлеуметтік тұрғыда қолдау болатындығына кәміл сенемін.
Мен шет мемлекеттерде көп жүрген жандардың бірі ретінде елімізде жастардың білім алып, кәсібін ашуына толық жағдай жасалғандығын нық сеніммен айта аламын. Ел экономикасының қай саласын алсақ та, әлі түрен түспеген бағыттар бар. Демек, білім алғысы келген, байығысы келген замандастарымыз да жердегі жұмақты шеттен іздемеуі тиіс.
Ең бастысы, Мемлекет басшысы жастарға толық қолдау көрсетуде. Мен елге келгенде жастардың елдегі маңызды бағдарламалардан, жобалардан хабарсыз екендігіне көз жеткіздім. Сондықтан құзырлы орындар жастар арасында ағартушылық қызметке көбірек көңіл бөлсе екен. Өйткені әсіресе, шалғай ауылдағы жастар мемлекет тарапынан көрсетілетін жеңілдіктерді білмейді.
Ал қолына дайын балық емес, қармақ алған жастардың өсіп-өркендеуі өздеріне байланысты. Тәуелсіз Қазақстанның тарихында тұңғыш рет Жастар жылының жариялануы болашаққа сенімді арттыра түседі.
Шалқар АМАНБАЕВ,
жеке кәсіпкер
