Мемлекет басшысының ұсынысымен 2019 жыл Жастар жылы деп жарияланды. Жастың қуаты – білімі мен білігінде, бірлігі мен патриоттығында. Біз бабалардан мирас болған атамекенімізді тәуелсіз ел еттік. Тұрмысы шалқып, түтіні түзу ұшқан бақуатты мемлекетке айналдырдық. Елбасының Жарлығымен биылғы жылды Жастар жылы деп жариялауы – жастар саясатына, жастар проблемасын шешуге көзқарастарды түбегейлі қайта қарауға, өзгертуге бағытталған игі іс.
Жыл бойы әр шараның сипаты, нәтижесі барысына мониторинг жүргізіп, жауапты адамдардың кәсіби деңгейі дұрыс бағаланып отыру көзделуде. Жақсы нәтиже көрсеткендерді марапаттау, елге насихаттаумен қатар, нәтижесіз жұмыс істеп, қаржыны тиімсіз жаратқан адамға қарсы қолданылатын амал-шараның түрлерін әзірлеу жоспарлануда. Тек осыларды қолға алғанда ғана жылдан дұрыс нәтиже күтуге болады.
Еркебұлан БАЗАРБАЕВ,
Меркі ауданы әкімдігі ішкі саясат бөлімі «Жастар ресурстық орталығы» КММ-нің директоры
Жамбыл облысы
Мамандық таңдауда қателеспейік
Мемлекет басшысы жастарды қолдау жөнінде Үкіметке бұрыннан тапсырма беріп келеді. Осыған орай Қызылорда облысының әкімі Қырымбек Көшербаев жастарды қолдауда өзге аймақтарға үлгі болатындай бастамалар көтерген. Көршілес Ресейде білім алып, елге оралған алғашқы түлектер – осы бастаманың оң нәтижесі.
Мен де облыс әкімдігінің қолдауымен осы мүмкіндікке ие болған жас ретінде салыстыра айтар болсам, екі елдің жастары бірдей деңгейде. Мемлекет тарапынан жасалатын жағдайға келер болсақ, қоғамдық көлік жолақысына жеңілдікке бізде мектеп оқушылары ғана ие болса, Ресейде студенттер мен магистранттарға да жеңілдік қарастырылған. Меніңше, біздің ел жастарына мамандық таңдауда, ЖОО-ға құжат тапсырарда көбірек көмектесу қажет. Оқушы кезінде дұрыс мотивация беріліп, әлемдік деңгейдегі ЖОО-ға не жұмыс орнына керекті құжаттар тізімін көрсете отырып, болашақтағы перспективалармен қызықтыра білсе жақсы болар еді. Әйтпесе бірен-саран әбден ізденіп, зерттейтіндер болмаса, көпшілігі шетелде оқу мүмкіндігінен бейхабар қалып жатады. Дәл осы секілді, отандық кәсіпорындардың қолдауы, жастарға қарастырылатын жеңілдіктер туралы жастар арасында үгіт-насихат жүргізілсе, артықтық етпейді. «Сайтта бар, интернетте тұр ғой» дегенмен, көбі дәл уақытында білмей қалып жатады.
Елбасының аймақтарда Назарбаев Университет сияқты жетекші оқу орындарының болу қажеттігі туралы айтқан ойы жастарымыздың шетелде алған білімді өзімізде де қол жеткізуге болатындығын көрсетеді. Өйткені сапалы білім күткен үдеге жеткізеді.
Еламан МЕҢДІҚҰЛ,
«Мәскеу болат және қорытпалар институты» ұлттық зерттеу технологиялық университетінің түлегі
Қызылорда облысы