Сонымен 2005 жылы «Қазақстан – Оңтүстік Корея» достық қоғамының бастамасымен, Қазақстан Сыртқы істер министрлігінің Алматыдағы кеңсесі де қолдап, ЮНИСЕФ-Қазақстан Балалар қоры мен Қазақстандағы оңтүстіккореялық іскерлер қауымдастығы қолпаштап, жақсы бір жоба жүзеге асқан еді. Осылайша мемлекетаралық қарым-қатынастар тәжірибесіне ресми емес дипломатиялық бірлік еніп − Қазақстан мен Оңтүстік Корея халықтары арасында бейбітшіліктің бала елшісі пайда болды.
Содан бері де зыр етіп бір мүшел уақыт өте шыққан екен. Ендеше Қазақстан корейлері қауымдастығының Алматыдағы бас кеңсесінде 16 жасқа толған Нари Ермұхановаға Қазақстан Республикасының азаматы куәлігі салтанатты түрде тапсырылды.
Қарап отырсақ, Наридың дүниеге келгені де қызық. 2002 жылы УДЗ көрсетуі бойынша ұл күтіп жүрген Ермұхановтардың отбасында керісінше... екінші сүп-сүйкімді қыз дүниеге келеді. Дәл осы сүйіншілі сәтте Азия құрлығында өтіп жатқан футбол матчтары да аяқталып, судья ысқырығы естіледі. Сол сәтте Оңтүстік Корея ұлттық командасының Еуропаның азулы командасын жанкештілікпен жеңуі «футбол фанатына» жігерлі әсер беріп, дүниеге келген сәбиіне корей халқының есімін беруге шешім қабылдайды. Сол сәтте әріптесіміз Манарбек Ермұханов өз қиялында келешекте Қазақстанның ұлттық құрамасы да теңбіл доптың әлемдік тарландарын ойсырата жеңетін ойыншыларға айналса деген арман болғанын айтады.
Он алты жыл бұрын журналист Манарбектің нәрестесіне Нари есімін беруге Қазақстан корейлері қауымдастығы ғана емес, еліміздің футбол федерациясы да араласып, қуанышына ортақтасады. Және бұл жаңалық көп ұзамай «KBS» корей ұлттық телеарнасынан да көрсетіледі. Осыдан кейін араға үш жыл салып «Жас отау» неке сарайында өткен Оңтүстік Корея елі тәуелсіздігінің 60 жылдығына арналған салтанатты жиында Нари Әлем елшісі атанады.
13 жылды артқа тастаған осынау қоғамдық бастама екі мемлекеттің президенттері – Нұрсұлтан Әбішұлы Назарбаев пен Но МуХен тарапынан қолдау тауып, белді басылымның бірінде аталып өткені де есте.
Және бұл оқиға осы салтанатты сәтке куә болған Ресей халық жазушысы Анатолий Кимді де толқытып, «Арина» атты кезекті романының сюжетіне әсерлі өзгерістер енгізеді.
Міне, сол Нари да кәмелеттік жасқа толды. Қазір Алматыдағы №111 гимназияның үздік шәкірттерінің бірі. Сүйікті пәндері бойынша өз мектебінің намысын қалалық, республикалық байқауларда қорғап жүрген озат оқушы. Баскетбол мен спорттық би жарыстарында да замандастарына дес бермейтін дарын. Оның шебер қолдары саз балшықтан тамаша мүсіндер тудырып, кесте тоқудан да жалықпайды.
Ана тілімен қоса ағылшын тілін еркін меңгерген тәуелсіздіктің төлі Қазақстан корейлері қауымдастығы ұйымдастырған барлық шаралардың ең жас та сүйкімді қонағы.
Болашақта дипломат болуды ойластырып жүрген Нари бүкіл өркениетті әлем көксегендей, келешекте КХДР мен Оңтүстік Кореяның бірігіп, бірегей елге айналуын армандайды.
Айнаш ЕСАЛИ,
«Egemen Qazaqstan»
АЛМАТЫ
