13 Ақпан, 2019

Цифрлы эфирлік телехабар енгізу кестеге сай жүргізілуде

249 реткөрсетілді

«Цифрлы Қазақстан» мем­лекеттік бағдарламасын іске асыру бүгінгі таңдағы басым міндеттердің бірі. Осы бағ­дар­лама аясында Қазақстан­да цифрлы эфирлік телехабар таратуды енгізу жобасы белсенді түрде іске асырылуда. Аналогты эфирлік телехабар таратудың қалай өшіріліп, цифрлы эфирлік телехабар таратудың қалай енгізіліп жатқаны туралы «Қазтелерадио» АҚ Басқарма төрағасы Искандер ТӘЖІБЕКОВПЕН әңгімелескен едік.  

− Искандер Ерманұлы, ЦЭТТ (цифрлы эфирлік телехабар тарату) енгізу жобасын іске асыру әлдеқашан басталып кетті. Былтыр Қазақстанның үш облысында аналогты эфирлік хабар тарату өшіріліп, цифрлы эфирлік телехабар таратуға 100% өтті. Жүргізілген жұмыстар туралы егжей-тегжейлі әңгімелеп берсеңіз... Өшіруге дайындық барысында қандай қиындықтар кездесті? 

− Қазақстанда аналогты эфирлік хабар таратуды өшіріп, цифрлы эфирлік хабар таратуға көшу бекітіл­ген кесте бойынша жүріп жатыр. 2018 жылы аналогты эфирлік хабар таратуды өшіру және цифрлы эфир­­лік телехабар таратуға көшу Қазақ­­станның үш облысында іске асты. Енді Маңғыстау, Жамбыл және Түркі­стан облыстары мен Шымкент қала­сының тұрғындары сапалы цифр­лы телевизияға еркін қол жеткізіп отыр. Үш облыста ЦЭТТ енгізу жобасын сәтімен іске асыру үшін 144 ра­дио­телевизиялық станса құрылысы са­лы­нып, жаңғыртылды. Осының нәти­жесінде цифрлы эфирлік телехабар таратумен қамту аймағына үш облыстың 99,8% халқы кірді. 

− 2018 жылы үш облыста аналогты телехабар таратуды өшірген­нен кейін ЦЭТТ қамту аймағына кірмей қалған елді мекендер бо­йынша не айта аласыз? Олар үшін сапалы телевизия қолжетімді ме? Елді цифрлы қабылдағыштармен қамтамасыз ету жөнінде қандай жұмыстар жүргізілді? 

− Аналогты хабар тарату өшіріл­ген үш облыста 40 елді мекен цифрлы эфирлік телехабар тарату­мен қам­тылмай қалды. Көрсетіл­ген ауыл­дардың тұрғындарына еркін қолжетімділік беру үшін «Қазтелерадио» АҚ мамандары сол өңірлердің облыстық және аудандық әкімдіктерімен бірлесіп жүргізген жұмыстарының нәтижесінде үш облыста 2700 үй шаруашылығы «OTAU TV» ұлттық жерсеріктік телевизияға қосылды. 

Халықаралық тәжірибені және цифрлы эфирлік хабар таратуға көшуді жүзеге асырған елдерде ЦЭТТ-қа көшу қорытындыларын ескере отырып, елді цифрлы қабылдағыштармен қамтамасыз етуде дүрлігуге жол бермеу шаралары қабылданды. Өңірлерде қабылдағыштардың қажетті санына жетіспеушілік болмауы үшін тұрақты негізде сату нүктелерінде абоненттік жабдықтың бар-жоқтығына мониторинг пен талдау жүргізіліп тұрады. 2018 жылы аналогты телехабар таратудан Маңғыстау, Жамбыл, Түркістан облыстары және Шымкент қаласы өшірілді. Бұл өңірлерде елді цифр­лы эфирлік қабылдағыштармен қам­тамасыз ету үшін 98 сауда нүктесі ұйым­дастырылып, олар «Sulpak», «Technodom» және «Alser» сияқты электроника дүкендерінің ірі желілері арқылы сатылымға шығарылды. 

Сонымен қатар жергілікті атқару органдарымен бірлесе отырып, атау­лы әлеуметтік көмек алуға тіркел­ген отбасыларды цифрлы қабыл­дағыштармен қамтамасыз ету бойынша қызу жұмыс жүргізіліп жатқанын атап өту керек. Үш облыста ғана шамамен 40 мың отбасы цифрлы сигнал қабылдағышты тегін алды, Маңғыстау облысында абоненттерге 1900 қабылдағыш берілсе, Жамбыл облысында – 8975, Түркістан облысында – 27 509, ал Шымкент қаласында 1125 қабылдағыш тегін тапсырылды. 

– Осының бәрі халыққа қалай түсіндірілді? Үш облыстың халқы аналогты телехабардың өшірілуін қалай қабылдады? Абоненттер қоғам­ның call-орталығына қанша­лықты жиі хабарласады және қан­дай сұрақтарды көбірек қояды? 

− «Қазтелерадио» АҚ, Ақпарат және коммуникациялар министрлігі, сондай-ақ аудандық және облыстық әкімдіктермен бірге бірлесе күш қосып, республиканың барлық облысында халықты ақпараттандыру жұ­мыс­тарын белсенді түрде жүр­гізу­де. Халыққа қызмет көрсету орта­лық­тарында және «Қазпошта» бөлім­ше­лерінде жарнамалық бейнеро­ликтер ойнатылады. Сондай-ақ респуб­лика­лық және өңірлік телеарналар мен радиостансаларда бейне-аудиороликтер айналдырылуда. Жергілікті әкімдіктердің қолдауымен роликтер қалалардың LED-дисплейлерінде көрсетіледі, жарнамалық билбордтар орнатылған. Республикалық және өңірлік БАҚ-да цифрлы эфирлік хабар таратуға көшу туралы мақалалар, лифлеттер мен ақпараттық хабарламалар жарияланып тұрады. Сондай-ақ цифрлы эфирлік хабар таратуды әлеуметтік желілерде жылжыту мен таны­ту бойынша жұмыс жүргізіліп жа­тыр. Тұрақты түрде филиал­дардың қызмет­­керлері жергілікті әкімдік­тер­мен бір­лесіп, азаматтармен кездесу үшін елді мекендерге сапарларға шығады. 

Үш облыста аналогты телехабар таратуды өшіру қорытындылары бо­йынша call-орталыққа хабарласқандар саны күрт артқан. Өткен жылдың 22 қазанынан 31 желтоқсан аралығында «193» нөміріне цифрлы эфирлік телехабар тарату бойынша 10212 қоңырау түскен. Сұрақтардың бәрі кеңес алу сипатында болған. ЦЭТТ бойынша call-орталыққа жүгінгендердің ең көп саны 2018 жылдың желтоқсанына тиесілі, 5500 абонент цифрлы қабыл­дағыштарды күйге келтіру, қосылуға өтінім беру және басқа да мәселелер бойынша хабарласқан. 

− Аналогты телехабар таратуды 2019 жылы қай облыстарда өшіру жос­­пар­ланып отыр? Осы облыстар­да ана­логты өшіруге дайындық ба­ры­сы туралы толығырақ айтып берсеңіз... 

− 2019 жылы аналогты хабар таратуды өшіріп, цифрлы эфирлік хабар таратуға көшу Алматы, Павло­дар және Қостанай облыстарында жоспарланып отыр. ЦЭТТ енгізу бойынша жобаны табысты іске асыру мақсатында аталған облыстарда 1784 елді мекенді қамтитын 178 рад­ио­телевизиялық станса салынып, жаңғыртылды. 

Алматы облысында 1 млн 963 мың халқы бар 772 елді мекенді қам­туға мүмкіндік беретін 90 РТС ор­на­тылды. Облыста цифрлы эфир­лік телехабар таратуды енгізу жөнін­дегі жобаны іске асыру толығы­мен аяқталғанын атап өткім келеді. Қазір­­гі сәтте Талдықорған қаласын­да цифр­лы эфирлік хабар тарату желі­сінде 30 шақты телеарна, ал облыс орта­лы­ғынан төмен елді мекендерде 15 шақ­ты телеарна қолжетімді. 

Павлодар облысында да ЦЭТТ енгізу жөніндегі жобаны іске асыру аяқталды. Қазіргі кезде облыста 385 елді мекен бар, оның 356-сы цифр­лы эфирлік хабар таратумен қам­тыл­ды. Алға қойылған мақсат­қа қол жет­кізу үшін облыста 29 радио­теле­ви­зия­лық станса құрылысы салынып, жаңғыртылды. Сонымен қатар ЦЭТТ қамту аймағына кірмейтін 29 елді мекенде сапалы телевизияға ер­кін қолжетімділікті қамтамасыз ету бойынша жұмыс жүргізілді. Бұл елді мекендерде 1600-ден астам або­нент «OTAU TV»-ға тіркелді. Облыс бо­йынша «OTAU TV» ұлттық жерсерік­тік телевизиясына қосылу саны 45 мыңнан асты. 

Қостанай облысында аналогты телехабар таратуды табысты түрде өшіруді ұйымдастыру мақсатында 59 РТС салынып, жаңғыртылды, оның 32-сінің құрылысы жаңадан салынған. РТС саны цифрлы эфирлік хабар таратумен облыстың 98% халқын қамтуға мүмкіндік береді. Бұл дегеніңіз – облыстың 627 елді мекені. 49 елді мекен ЦЭТТ сигналын қабылдау аймағына кірмей қалды, бұл шамамен 2000 үй шаруашылығы. Олардың ішінен 1500 үй қазірдің өзінде OTAU TV ұлттық жерсеріктік телевизиясына қосылып тұр. 

Халықаралық тәжірибені және цифр­лы эфирлік хабар таратуға көшу­ді жүзеге асырған елдерде ЦЭТТ-қа көшу қорытындыларын ескере отырып, елді цифрлы қабыл­дағыштармен қамтамасыз етуде дүр­лігуге жол бермеу шаралары қабылданды. Өңірлерде қабыл­дағыш­тардың қажетті санына жетіс­пеу­шілік болмауы үшін тұрақты негізде сату нүктелерінде абоненттік жаб­дықтың бар-жоқтығына мониторинг пен талдау жүргізіліп тұрады. 
Сондай-ақ үш облыста әкімдік­термен бірлесе атаулы әлеуметтік көмек алушы отбасыларды цифрлы қабыл­дағыштармен қамтамасыз ету жө­ніндегі жұмыс жүргізілді. Алматы облысында 4967 отбасына қабылдағыштар берілді. Биыл үш облыста 4 мыңнан астам отбасыға цифрлы қабылдағыш тапсырылады деп жоспарланған. 

Цифрлы эфирлік телехабар таратуды енгізу бойынша жобаны іске асыру «Цифрлы Қазақстан» мемлекеттік бағдарламасы аясында жүргізіліп жатқанын тағы бір мәрте атап өткім келеді. Бұл бағдарламаға сай 2021 жылға қарай Қазақстан толық­аналогты хабар таратудан бас тартатын болады. 

Әңгімелескен Думан АНАШ,

«Egemen Qazaqstan»

Соңғы жаңалықтар

Жақсылық жүрек жылытады

Қазақстан • Кеше

Ұқсас жаңалықтар